Tula-tulando rasulu 4
4
Petrus bhe Yohanes ne wiseno Sahano Agama
4:1-22
1Tangasano Petrus bhe Yohanes dopuga-pugau bhe mie bhahi, gahaꞌa domaiꞌidamo imamu bhe neangkando dhagano Lambuno Lahataꞌala bhe miendo Saduki. 2Andoa ini nosodo sepaliꞌa lalondo mbaꞌinomo Petrus bhe Yohanes dofoguhu mie bhahi putae Yesus nosuli nodadi. Aini nembalimo tandano kawanuꞌando kosasawindo mie mate. 3Kohoduando dohakoda maka dotohongkuda ampa nomentae, kapaꞌamo oleo nohondomo. 4Tamaka metingkeno kafoguhundo dobhahi marasaeano, sampe kosasawindo umati o moꞌane kaowu dapelima hewumo.
5Hato nomentae, Sahano Agama, kamungkulaꞌindo Yahudi bhe pande-pande Kitabi dohompumo we Yerusalem. 6Imamu Bhalano koneaꞌano Hanas, Kayafas, Yohanes bhe Aleksander bhe mie sigaoꞌano dua sampuꞌando Imamu Bhalano, dohompu bhe kamungkulaꞌi naꞌa. 7Pada anaꞌa Petrus bhe Yohanes doowadamo te wisendo maka dofee-feenada ambado, “Mepakeomu kuasa ae gahaꞌa, bhahaꞌi pakeomu nea laꞌae fekaꞌosaomu kalu aini?”
8Petrus nokabhintie Rohino Lahataꞌala maka notobhoosi ambano, “Neangkaꞌindo umati bhe kamu-kamungkulaꞌi! 9Oleo itu dofee-feena kainsamimo mbaꞌinomo taehabu metaaꞌano ne mie mosaki, pakade dofee-feena kainsami dua bhahaꞌi mie amaitu tafekaꞌosaane kuasa laꞌae. 10Dadiꞌanomo hintimiu bhe kosasawindo miendo Israel tabeano mandeꞌaaneomu putae mie aini noꞌosamo bhe neehe-ehe ne wisemiu ini, mbaꞌinomo kuasano neano Yesus Kristus, miendo Nasaret maitu. Hintimiu kantaiꞌeomu te sau salipu, tamaka Lahataꞌala nofowanue maiꞌao ne mate. 11Yesusmo ini nepulaoꞌaono Kitabi,
‘Kontu neꞌohondo mefelambuno, gahaꞌa nembalimo sandi bhalano.’ #Mzm 118:12
⸤ Mefelambuno naꞌa ingka hintimiumo itu.⸥ 12Ampamo kaowu Yesus fosalamatino, kapaꞌamo te dhunia ini we simbalino Anoa bhe naseemie miina bhe meꞌawano kuasa maiꞌaono ne Lahataꞌala so nafofosalamatiꞌao.”
13Dowoha katangkano lalondo Petrus bhe Yohanes, kamungkulaꞌi Sahano Agama maitu tadomente, kapaꞌamo dopandeꞌaanda andoa maitu mie ndidiki pata kokasikolano. Gahaꞌa dopandeꞌaomo lalondo ingka andoa mie mangkafino Yesus. 14Tamaka miina dakodiua, mbaꞌinomo dowoha mie kalu kafekaꞌosaꞌando maitu neehe-ehe ne sohihindo Petrus bhe Yohanes. 15Pada aitu kohoduando dotududa dalumimba, maka dopugau-gau ambado, 16“Damafaꞌiandaomu bhahaa mie andoa inia? Kosasawindo miendo Yerusalem dopandeꞌaanemo giu timenteꞌaono nehabundo, paemo natitagalia. 17Ampamo kaowu keana sadhulu-dhulu kabhahindo mie metingkeno lele aini, naetaa daꞌumeleꞌaanda bhe dalumambada keana dofendua dosambili nea amaitu ne laꞌae maka dua.”
18Kohoduando suli toha dofopesuada maka dopahintangida paemo sepaliꞌa naembalia dasumambili neano Yesus tawa dafofoguhu damake nea anaꞌa. 19Tamaka Petrus bhe Yohanes tadotobhoosi ambado, “Tabhotusimoomu wutomiu bhahaꞌi nada amai metaaꞌanoa weo pomatano Lahataꞌala: tamangkafi pahintamiu bhahaꞌi tamangkafi pahintano Lahataꞌala? 20Kapaꞌamo insaodi ini pae bhe kapoolia tatumiehe tafofohatoꞌao newoha mani bhe nefetingke mani.” 21Sedhuluꞌa dua kaꞌosano dolambada, tamaka panda-pandano dofolapada dua mbaꞌinomo miina daewohaa dhala so katihukumuꞌandoa. Pakade doteꞌi dua mie bhahi mudhino neano Ompu hampano dowoha kadhadhia amaitu. 22Umuhuno mie kalu nefekaꞌosa weo kadhadhia timenteꞌaono naꞌa, nokolabhimo fato fulu taꞌu.
Mie marasaeano desalo katangkano lalo ne Lahataꞌala
4:23-31
23Dofolapada kaowu, Petrus bhe Yohanes dosulimo se sabhangkaꞌindo maka detula-tulaꞌao pugaundo neangkando imamu bhe kamungkulaꞌi. 24Dofetingke peda naꞌa, dosekakolalomo dofewise ne Lahataꞌala maka desalo ambado, “O Ompu, Hintumo mokonandoono lani bhe dhunia, o teꞌi bhe kosasawiꞌae iꞌindo. 25Weo kuasano Rohimu, awua mani Daud, bhatuamu, nofosampe wambamu peda aini,
‘Noafa mie tapa mandeꞌaono Ompu doꞌamahaꞌao?
Noafa sabhaha bansano liwu dopugau-gauꞌao tapa kofahalaaꞌano?
26Kolakindo dhunia dokanumo dapopahisa,
kafeompuꞌando dopokanagau
damewangi Ompu bhe Katuduno Fosalamatino.’ #Mzm 2:1-2
27Nopokantibhamo bhe anaꞌa Herodes bhe Pontius Pilatus, mie maiꞌaono ne sabhaha bansano liwu bhe miendo Israel dohompumo ne kota ini dopugau-gau doewangi Yesus palima-limamu mongkilono, nesangkemu mbali Omputo Fosalamatino. 28Andoa ini dodhalangimo kosasawiꞌae nefotantumu mpini kabhao-bhaono hampano kuasa bhe kapoindalomu Wutomu. 29Aitu, Ompu, ondoda dolamba kainsami, waꞌa kainsami katangkano lalo tamolele bhoasaomu, insaodi bhatuamu ini. 30Fosampu kainsami kabarakatimu so daoꞌosaꞌao mie mosaki bhe fotiwoha giu timenteꞌaono bhe tanda tapa mentela weo neano Yesus palima-limamu mongkilono.” 31Pada dosambahea, lambu kapohompu-hompuꞌando tanomagegomo. Kosasawindo nokabhintidamo Rohino Lahataꞌala maka notangkamo lalondo defolele bhoasaono Lahataꞌala.
Koeatendo umati kabhao-bhaono
4:32-37
32Kosasawindo marasaeano doseꞌise, dosefekihi bhe dosekakolalo. Bhe naseemie miina bhe kumonano fehebuaꞌano so wutono kaowu, tamaka fehebuaꞌano seemie mbalimo dua fehebuaꞌando kosasawindo. 33O rasulu dosakusiiꞌao putae Ompu Yesus nowanumo maiꞌao ne mate. Pugaundo noponoꞌao kuasa. Kosasawindo marasaeano nobarakatida mpuu Lahataꞌala. 34Ne olotando bhe naseemie miina bhe mokaeno. Kowiteno tawa kolambuno noaso witeno tawa lambuno naꞌa, 35maka olino nowaꞌandae rasulu mbali dodawu-dawuandae umati ampa kafaraluuno seemie-seemie.
36Pedamo dua aitu Yusuf, seemie sampuꞌano Lewi nomaiꞌao we witeno Siprus; o rasulu dokonae dua Barnabas (maꞌanano nea anaꞌa Folawesino lalo). 37Anoa ini noaso witeno maka olino nowaꞌandae rasulu.
© 2022, Wycliffe Bible Translators, Inc. All rights reserved.