Tula-tulando rasulu 26
26
Paulus notunduꞌao wutono ne wiseno Agripa
26:1-11
1Ambano kolaki Agripa ne Paulus, “Dowaꞌangko kasalawa tumunduꞌao wutomu.” Paulus nofoehe limano maka nopugau ambano, 2“Kolaki Agripa nefosibhalaku, akodawua sepaliꞌa seꞌoleo itu dofolalesa kanau atumunduꞌao wutoku ne wisemu atumagali sabhaha kasangkati nesungkuꞌaondo miendo Yahudi ini. 3Nekodawuaꞌaoku sepaliꞌa mbaꞌinomo pandeꞌaane mpuu adhatindo miendo Yahudi bhe kahengetano agamando. Dadiꞌanomo aesalo ne wisemu tasabahamo fetingke kanau kadeki aetula-tula.
4Kosasawindo miendo Yahudi dopandeꞌaane dadiku mpini nandoo kaanaꞌiku, kapaꞌamo mpini kabhao-bhaono aeate-ate bhe saliwuku we Yerusalem. 5Nomponamo dopandeꞌa kanau. Ane damoindalo, naembali daetula-tula putae idi ini aembali seemie Farisi mangkafino tubho foliuno kakii ne agamantoomu ini. 6Aini dobhitahaki kanaumo mbaꞌinomo afintahaki dhandino Lahataꞌala ne awuaꞌintoomu. 7O dhandi anaꞌa nentaa-ntaandomo dua miendo Israel ompulu haa sampuꞌano, kakampuu-mpuuꞌandomo dosombai Lahataꞌala mentae mohondo. Kolaki Agripa nefosibhalaku, kasungkuꞌando miendo Yahudi ini ingka mbaꞌinomo aposahunaꞌao ne dhandi anaꞌa. 8Noafa fisikopahaaneomu putae Lahataꞌala nefowanu mie mate?
9Daanumo, endefiꞌini wutoku dua kunaꞌekumo tabeano amewangie nekonando Yesus miendo Nasaret maitu ampa kaꞌosaku. 10Anaꞌaemo nehabuku we Yerusalem. Aeꞌawa kaowu kuasa maiꞌaono ne meangkaꞌindo imamu, dobhahi umati mongkilono nefopesuaku weo katohongku. Suano kaowu taꞌo anaꞌa, bhahamoa aangkafi dua ane dobhotusie dopongkoda. 11Idi nentela afodee-deeda weo lambu kasambaheaꞌa maka afosuhuda dahumunsa kaparasaeando. Kaꞌosano kaheheno bhakeku sampe aꞌambada mahingga we kotando koliwuno.”
Paulus netula-tulaꞌao netompaloino
26:12-32
Tul 9:1-19, 22:6-16
12“Pedamo anaꞌa aeꞌawa kuasa bhe taka maiꞌaono ne meangkaꞌindo imamu maka akala we kotano Damsyik. 13Gahaꞌa, kolaki Agripa, tambaꞌomo toho-toho indotu oleo we laano sala awoha tilanga nekamondawu nomaiꞌao te lani, nentalea anoa bhe oleo. Tilanga amaitu nokalibu kanau bhe sabhangkaꞌiku poowaꞌaku. 14Kosasawi mani tatihambitao we wite maka afetingke suaha nopugau ne idi weo wamba Ibrani ambano, ‘Saulus, Saulus, noafa fodee-dee kanau? Ingka so kaowu modee-deeꞌao wutomu, kabeanga seꞌulu sapi nekantada katuko mohokoꞌano.’ 15Tamaka ambaku, ‘Laꞌae gahaꞌa hintu itu waompu?’ Ambano, ‘Idi ini Yesus nefodee-deemu. 16Aitu wanuꞌo toha maka ehe! Afotiwoha wutoku ne hintu hampano asumangkeko membali palima-limaku. Hintumo so sumakusiiꞌaono kosasawiꞌae madano newohamu bhe so nefotiwohaku ne hintu mada kaowu. 17Amosalamatiko maiꞌao ne saliwumu miendo Yahudi bhe ne mie suano Yahudi. Hintu atumuduko kumala ne mie suano Yahudi naꞌa, 18so molosaꞌao matando, neanomo dahumunsamo kahohondo maka damesua we mentaleaꞌano, damaiꞌao ne kuasano Kafeompuꞌando seetani dadumoli ne Lahataꞌala. Neanomo dua dhosando natiꞌamponi hampano kaparasaeando ne Idi, pakade daeꞌawa dawua nefotantuno Lahataꞌala so mie mongkilo.’
19Dadiꞌanomo, kolaki Agripa, pae bhe kapoolia pae amangkafi powohaku maiꞌaono te surugaa maitu. 20Mentalea-mentalea afohatoda, o mie tabeano dametompaꞌao podiu modaindo maka dadumoli ne Lahataꞌala. Pakade daehabu podiu posahataaꞌano bhe fetompando maitu. Nepugauꞌaoku ini kabhao-bhaono afohato miendo Yahudi we kotano Damsyik maka we Yerusalem bhe kosekaꞌewaꞌae kadieno Yudea. Pada anaꞌa afohatomo dua mie suano Yahudi. 21Nokotingkumo ne naꞌa miendo Yahudi dohako kanau weo Lambuno Lahataꞌala maka dofesoba damongko kanau. 22Tamaka notulumi kanau Lahataꞌala sampe nandoo adadi ampa seꞌoleo itu, neanomo naembali asumakusiiꞌao kosasawiꞌae ini, naetaa ne mie ndidiki, naetaa ne mie bhalano. Bhihita nefoleleku ini sakotuꞌuno nopototomo bhe nekosuahaꞌaono anabii Musa bhe ana-anabii sigaoꞌano. 23Bhihita anaꞌa peda ini: Mesias, Omputo Fosalamatino maitu, tetewei naenamisi kakadee-dee maka Anoamo so maꞌindulu manuno maiꞌao ne mate, pakade Anoamo dua so meowano tilanga fosalamatino, naetaa ne miendo Yahudi, naetaa ne bansano liwu sigaoꞌano.”
24Tangasano Paulus nopotunduꞌao wutono peda amaitu, nopugaumo gubernur Festus bhe nokei ambano, “Ingka mobheemo Paulus! Nofekabheekomo kapandemu itu.” 25Tamaka Paulus tanotobhoosi ambano, “Festus nefosibhalaku, miina aobheea! Pugauku ini nokotuꞌu, nomaiꞌao ne fekihi mentalea. 26Kosasawiꞌae ini nopandeꞌaane mpuu kolaki Agripa, kaokadoꞌakumo aetula-tula mentalea-mentalea ne wiseno. Aposahunaꞌao kosasawiꞌae ini miinaꞌo bhe pata nefetingkeno, kapaꞌamo ingka nokadhadhia we mohameꞌano, miina natifebunia. 27Kolaki Agripa, parasaea bhahaa ne ana-anabii? Apandeꞌaane parasaeada.”
28Nopugaumo Agripa ambano, “Kunaꞌemu sebantaha gahaꞌa mosarani kanau?” #26:28 Nembali dua domaꞌanakie: “Ingka nokomaꞌo mopesua kanau sarani!” 29Ambano Paulus, “Asumambahea ne Lahataꞌala, nasebantaha bhahaꞌi naompona, suano kaowu taꞌo hintu tamaka kosasawindo mie humatono metingkeno tula-tulaku ini, daembali miendo sarani nada idi ini. Tantumo miina natilentua hante katapuku inia.”
30Pada anaꞌa kolaki Agripa, gubernur Festus, Bernike bhe kosasawindo mie mengkohano ne itu doehemo. 31Dolimba kaowu detula-tulamo sapada-pada andoa ambado, “Mie aini ingka miina nakokaꞌa-kaꞌalaa so namantasiꞌao damongkoe tawa datumohongkue.” 32Ambano Agripa ne Festus, “Mie amaitu sakotuꞌuꞌano naembalimo damolapae ane pae noꞌendemo ne Omputo Kaisar.”
© 2022, Wycliffe Bible Translators, Inc. All rights reserved.