Tula-tulando rasulu 2
2
Pentakosta, oleono kasampuꞌano Rohino Lahataꞌala
2:1-13
1Nohato hohaeaꞌano Pentakosta, kosasawindo mie marasaeano dopohompu-hompu ne seꞌonu lambu. 2Gahaꞌa tambaꞌomo dofetingke huhu nomaiꞌao te lani pasae kawea moꞌosa, koseꞌonuꞌae lambu kapohompu-hompuꞌando tanehuhu-huhumo. 3Tadowohamo dua hendeno efi peda katuno lela nopogaa-gaa nopee te wawondo seemie-seemie. 4Kosasawindo nokabhintidamo Rohino Lahataꞌala maka dotanda dopugau depake wambado koliwuno ⸤ tapaꞌo nepandeꞌaondo⸥ , seemie-seemie ampa kadawuꞌaono ne Rohino Lahataꞌala.
5Wakutuu anaꞌa dobhahi miendo Yahudi lumebeno maiꞌaono ne sabhaha liwu te dhunia ini dohato we Yerusalem. 6Dofetingke huhu amaitu mie bhahi ini dosipumpumo, andoa tadotongo, hampano dofetingke rasulu maitu dopugauꞌao wamba nepakendo ne liwu kamaiꞌaoꞌando seemie-seemie. 7Tadotonto bhe nopuli mentendo. Ambado, “O mie mugauno ini ingka sanea miendo Galilea! 8Peda amai bhahaa inia? Ingka dofetingkedaomu dopugau depake wamba we liwu kamaiꞌaoꞌantoomu seemie-seemie? 9Intaodiomu ini miendo Parsia, Media, Elam, miendo Mesopotamia, Yudea, Kapadokia, Pontus bhe Asia, 10Frigia bhe Pamfilia, miendo Mesir bhe kadieno Libia pomaꞌotiꞌano bhe kotano Kirene, mie humato maiꞌaono we Roma, 11miendo Yahudi bhe sigaoꞌano mangkafino agama Yahudi, miendo Kreta bhe miendo Arabu. Ingka dofetingkedaomu depake wamba we liwu kamaiꞌaoꞌantoomu seemie-seemie, detula-tulaꞌao giu timenteꞌaono nehabuno Lahataꞌala.” 12Kosasawindo tadentongo-ntongomo bhe tadopofee-feenamo, “O ae bhahaa inia?” 13Tamaka nandoo dua bihidhingida ambado, “Andoa ini dololanuꞌao angguru momeko.”
Kapedatono Petrus
2:14-40
14Tamaka Petrus noehemo bhe rasulu ompulu seemieno maka nopugau nofekabhala-bhalaꞌie ne mie bhahi, ambano, “Miendo Yahudi bhe kosasawimiu meateno we Yerusalem ini, fetingkeeꞌomu bhe tandaiꞌeomu pugauku ini. 15Mie andoa ini miina dalolanua peda fekihimiu itu, kapaꞌamo oleo kaneꞌo hambi siua mata. 16Tamaka ainiꞌaemo nekobhoasaꞌaono Lahataꞌala nefosampeno anabii Yoel,
17⸤ Peda aini bhoasaono Lahataꞌala,⸥
‘Nahumato pandano dhamani
amosampu Rohiku ne kosasawindo manusia;
anaꞌimiu namoꞌane nahobhine damandemo dakosuaha nada anabii,
ana moꞌanemiu amaꞌanda powoha,
kamungkulaꞌimiu amaꞌanda monifi.
18Ne oleo anaꞌa mahingga ne bhatuaku namoꞌane nahobhine
amosampu dua Rohiku,
sampe dakosuaha nada anabii.
19Aefokonandoo giu timenteꞌaono te wawo, te lani tatu,
bhe tanda tapa mentela we panda, we dhunia ini:
o hea, o efi bhe gawu mokapa.
20Oleo naembali doloma mposo,
o wula nameda hea.
Aini nakumadhadhia paeꞌo nahumato oleono Ompu,
oleo bhalano, oleo kumalabhiaꞌano.
21Ne oleo anaꞌa kosasawindo metondalano ne Ompu tetewei dasumalamati.’ #Yoel 2:28-32
22Miendo Israel, fetingkeeꞌomu pugauku ini. Nepulaoꞌaoku naꞌa Yesus miendo Nasaret, seemie nesangkeno Lahataꞌala. Nosangkee Lahataꞌala ini notiwoha ne kuasa, giu timenteꞌaono bhe tanda tapa mentela nehabuno Lahataꞌala ne wunta-wuntamiu noangka ne limano Yesus ini. Kosasawiꞌae ini ingka pandeꞌaanemoomu. 23Noposahataa bhe patudhuno bhe kalentuno Wutono, Lahataꞌala nobhotusiemo nofolapasaangkoeꞌomu. Tamaka hintimiu katahoeꞌomu ne bansando mie modai dokantaiꞌe te sau salipu bhe dopongkoe. 24Tamaka Lahataꞌala nofodadie, nofolapae nomaiꞌao ne kakadee-deeno mate, hampano pae bhe kapoolia nasumadaa-daa nakumuasaiꞌe mate. 25Kapaꞌamo Daud nopugau nopulaoꞌao Anoa peda aini,
‘O idi sadhia awoha Ompu Lahataꞌala te wiseku;
hampano Anoa neehe-ehe ne suanaku,
idi miina akakenda-kendaa.
26Dadiꞌanomo laloku noꞌia sepaliꞌa,
alusuku nokei nosambo;
aeate-ate weo posahunaꞌao ne Lahataꞌala.
27Kapaꞌamo alusuku pae humunsae weo dhuniando mie mate,
mbadhano bhatuamu mongkilono pae nahumansurua.
28Hintu fosusu kanau kaangkaꞌa so adumadiꞌao;
ne wisemu nopontalabhi-labhi kaꞌiaku.’ #Mzm 16:8-11
29Bhahitieꞌiku! Naetaa aetula-tulaangkoomu awuantoomu Daud mentalea-mentalea. Daud nomatemo, padamo dokobuhue. Kobuhuno nandooꞌe ampa aini ne liwuntoomu ini. 30Lahataꞌala padamo nodhandie bhe nofemata putae namaiꞌao ne sampuꞌano nandumandoo naseemie so nesangkeno Lahataꞌala naembali Omputo. #Mzm 132:11 Daud ini nopandeꞌaane dhandino Lahataꞌala naꞌa. Anoa seemie dua anabii, 31dadiꞌanomo o ae so kumadhadhiaꞌano te wise nowohaemo. Nopugauane wawo putae Mesias Omputo Fosalamatino namanu namaiꞌao ne mate. Ambano Daud, ‘Pae dahumunsae weo dhuniando mie mate, mbadhano pae nahumansurua.’ 32Nepulaoꞌaono Daud naꞌa o Yesus, nefowanuno Lahataꞌala nomaiꞌao ne mate. Kosasawiꞌa mani ini mohaꞌaono wuntano mata mani kadhadhia anaꞌa. 33Pada nosangkee Lahataꞌala te melangkeꞌano bhe nowaꞌane kuasa, notahimamo Rohino Lahataꞌala nedhandiꞌaono maitu. Rohi aitu nofosampuemo dua ne insaodi ini, peda newoha bhe nefetingkemiu aitu. 34Kapaꞌamo suano wutono Daud monino te surugaa, tamaka Daud nopugau ambano,
‘Ompu Lahataꞌala nokowambamo ne Ompuku,
35Mengkohamo ne suanaku ini,
ampa kosasawindo kaewamu ahumabuda so kafindaꞌamu.’ #Mzm 110:1
36Dadiꞌanomo kosasawindo miendo Israel tabeano mandeꞌaaneomu kotu-kotuꞌu putae Yesus nosangkeemo Lahataꞌala nembali Ompu bhe Mesias, Omputo Fosalamatino. Yesus ini padamo kantaiꞌeomu te sau salipu.”
37Dofetingke peda naꞌa nosabhamo handado maka dofeenamo Petrus bhe rasulu sigaoꞌano ambado, “Bhahitieꞌi, kaowua taeafaꞌimo bhahaa insaodi ini?” 38Ambano Petrus, “Fetompaaneomu dhosamiu maka mefekadiuꞌomu seemie-seemie weo neano Yesus Kristus, so natiꞌamponiꞌao dhosamiu. Mada aitu damaꞌangkoomu kawaꞌaono Rohino Lahataꞌala. 39Kapaꞌamo dhandi aini so hintimiu bhe sampuꞌamiu bhe kosasawindo mie sigaoꞌano we liwu mokodoꞌoꞌano dua, ampa kabhahino so nesaliꞌino Ompu Lahataꞌalantoomu.” 40Nandoo dua nobhahi nepugauꞌaono Petrus. Nompuu-mpuunie notangahida bhe nefeꞌulaianda ambano, “Fekakodoꞌo wutomiu ne mie modaino ini, so sumalamatiꞌaoꞌomu.”
Koeatendo umati kabhao-bhaono
2:41-47
41Dobhahi mie marasaeano ne pugauno Petrus, maka dokadiuda. Oleo itu umati dotitubhahi, kabhahindo dapetolu hewu. 42Andoa sadhia dokampuu-mpuu dofintahaki kafoinaꞌundo rasulu, dopohompu-hompu bhe dosekakolalo. Andoa sadhia dua dopoharoa bhe dosambahea.
43Nobhahi giu timenteꞌaono bhe tanda tapa mentela nehabundo rasulu, sampe kosasawindo mie doteꞌi sepaliꞌa. 44Kosasawindo marasaeano dosekakolalo, fehebuaꞌano seemie mbalimo dua fehebuaꞌando kosasawindo. 45Sadhia nandoo dua masono fehebuaꞌano maka olino dopodawu-dawue ampa kafaraluuno seemie-seemie. 46Andoa dokampuu-mpuu dosekakolalo, seꞌo-seꞌoleo dopohompu-hompu weo Lambuno Lahataꞌala. Andoa doꞌia bhe nohelasi lalondo dopoharoa ne lambudo seemie-seemie dopali-paliꞌaane. 47Sadhia dua dopudhi Lahataꞌala bhe doasianda sabhaha mie. Seꞌo-seꞌoleo Ompu nofodhulu kabhahindo mie nefosalamati.
Currently Selected:
Tula-tulando rasulu 2: mnbSD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.