Roma 9
9
1Nijowa fya chakaka pa Kristo, nideta lepa, chengo kya pa mwoyo wangu kinilasile ulungamakiso pa Roho Mbalafu, 2kukita niyii ni kuniongoneka kukulungu ni kuwina mwoyo wangu kiwinile. 3Pakuya nihotola kuluwa kukita nenga namwene niyii wakupatulika ni Kristo pa mihalo ya walongo wangu, walongo wangu kwa ndingo wa nyama: 4wala nawombe waIsrael; kwa wala kukitika wana, nu kukwisika, na malagano, ni kupelewa torah, ni kumhengela Mulungu, ni filago; 5kwa wala wayii wakadadi, ni kipitile pa wala Kristo kwa ndingo wa nyama, nuyombe panani pa fyoha, Mulungu wakupelewa kihomo kwa miaka ni miaka. Amen. 6Koma nukuya ngati lilowe lya Mulungu likitiki lya waka. Pakuya nukuya woha wayii Israel wala kipitile pa Israel: 7haka woha wana, ndawa wayii mbeyu ya Ibrahim: koma, Pa Isaak mbeyu yayiwalangike mahina kwako. 8Kuku, kujowa, nukuya wana wa nyama wayii wana wa Mulungu; koma wana wa kilago wawalangika kwa mbeyu. 9Pakuya lilowe lya kilago liyii, Kwa ndingo wa lukumbi ulu yanihiche, nu Sara yaaye nu mwana. 10Ni nukuya iki kyakape; koma Rebekah kawili akayimiti luleme nu yumonga, 11yuyu dadi witu Isaak — pakuya wana awa wakona nukuhogoleka, haka wakona nukukita kandu kanofu pangi kawifu, nausi malango ga Mulungu kwa ndingo wa kuhagula gahwele, nukuya kipitile pa makitiko, koma pa yula akemela, 12kukajowiki kwa yombe, Nkulungu yantamile nchoko mbanda. 13Umu yilembekili, Yakobo nikanganiti, koma Esau nikambipili.
14Mumu yatijowe kiki? Kuyili kuwifu pa Mulungu? Kisiya wiwi. 15Pakuya anjowela Musa, yaninkitile lukolo uyu ninkitila lukolo, ni yanimpwelekele lipyana uyu nimpwelekela lipyana. 16Mumu nukuya wa uyu wakulonda, haka wa yula wakukimbila, koma wa Mulungu wakukitila lukolo. 17Pakuya lilembo linjowela Farao, Kwa ndawa ya iki nikakuyimwisi, nausi nilase pa wenga makakala gangu, ni lihina lyangu liwandasike pa milima yoha. 18Mumu ankitila lukolo uyu andonda, na uyu andonda anonopesa.
19Mumu yamunijowele, apela wuli mhalo? Pakuya nani apindika kilondo kyake? 20Mundu wenga, haka pachokope, wenga uyii nani kumhigila kumpindika Mulungu? Ati, kila kyakuwumbika yakinjowele wakukiwumba, Kwa ndawa kiki ukanipangili wila? 21Pangi ati wakuwumba fiwiga ayilepe ni chengo pa lidupi, pa liwuli lililalila kukita lilundu limonga kiwiga kya liginiko, ni lingi kyangali liginiko? 22Wuli wona Mulungu, pakulonda kulasa kudada kwake, ni kumanyisa mbafu syake, akayisingiti ni fiwiga fya kudada fyakulinganila kuyanangika; 23ni nausi amanyise ukafi wa kukwisika kwake pa fiwiga fya lukolo, fila akawikilingani palongolo kwa kukwisika, 24wawa tenga, akatikemili kawili, nukuya kipitile pa waYehudi wakape, koma kawili pa wa Mihuku? 25Umu ajowela pa Hosea,
Yanikemele awa nsafi wangu, wawa wakayili lepe nsafi wangu;
Ni wakuganika wake, yula akayili lepe wakuganika.
26Ni yayiye kukita pandu pala kukajowiki kwawe, Mwenga nukuya nsafi wangu,
Bahalapala yawakemeleke wana wa Mulungu wakulama.
27Nu Isaya akuwa panani pa Israel, Haka kawalangiko ka wana wa Israel kayii ngati muhanga wa mu nyanja, ka kusigala yakayokoleke: 28pakuya Bambo yalikite lilowe lyake pa ndima, kulimalakisa ni kulidumulila ngani. 29Na umu Isaya akajowili palongolo,
Akalemiti Bambo wa Sabaoth kutilekela mbeyu,
Ngatitemi ngati Sodom, ngatikitiki kuhwanangana ni Gomorra.
30Mumu yatijowe kiki? Kukita wa Mihuku wala wakisiti lepa ugolofu, wakafikili ugolofu, wuwu ugolofu kipitile pa kiyitakiso: 31koma Israel, wakukisa torah ya ugolofu, wakafikili lepe pa torah yila. 32Kwa kiki? Ndawa nukuya kipitile pa kiyitakiso, leka ngati kipitile pa makitiko. 33Wakakuwili pa liganga lya kukuwalila; umu yilembekili,
Lola, niwika pa Sion liganga lya kukuwalila ni liganga lya kukuwasila;
Nu uyu akela pa yombe yaaye nukukoseka lihamu lepa.
Currently Selected:
Roma 9: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
