Roma 5

1Mumu tenga wakugoloseka pa kiyitakiso, titame pa kindamba nu Mulungu pa Bambo witu Yesu Kristo; 2pa uyu kawili tikayili nu kuhegelela kwitu pa kiyitakiso mpaka pa neema iyi pa yila tiyima; ni tihekelele pa kihuwalilo kya kukwisika kwake Mulungu. 3Leka nukuya iki kyakape, koma kawili tihekelele pa mahumbuso: pa kumanya kukita lihumbuso lihengela liyumalakilo; 4ni liyumalakilo ligeseko; ni ligeseko kihuwalilo: 5ni kihuwalilo nukulekela lihamu; ndawa kiganano kyake Mulungu kyayitiki pa mioyo yitu pa Roho Mbalafu uyu tapeliwi. 6Pakuya pala tikayili wakulegeleka, pa lukumbi lwake Kristo akafwilili wawifu. 7Pakuya kwali ndawa ya mundu ngolofu yumonga ngaafwili: pangi ndawa ya mundu nnofu nunuyu ngaasindamili kufwa. 8Koma Mulungu amanyisa kugana kwake mwene kwa tenga pa iki kukita tenga, kitamile wene sambi, akatifwilili. 9Kwa kulutila mumu, tenga wakugoloseka hino pa mwasi wake, yatiyokoleke pa kudada kwake Mulungu pa yombe. 10Pakuya wona, pala tikayili wa mitumba, tikatepulanisiki kwa Mulungu pa kufwa kwa Mwana mundu, kulutila iki, timaliti kutepulanasika, yatiyokoleke pa wumi wake; 11ni nukuya iki kyakape, koma kawili tihekelela pa Mulungu mwa Bambo witu Yesu Kristo, pa uyu hino tiyupiti kutepulana kula.

12Mumu, wona pa mundu yumonga sambi yikayingili mu ndima, ni kifwa pa sambi; ni wiwi kifwa kikalutiti mpaka pa woha, ndawa woha wakakiti sambi; 13pakuya mpaka pa torah sambi yikayili mu ndima: koma sambi yiwalangika lepa pala pangali torah. 14Haka wiwi kifwa kikayili mutwa kitumbulile Adam mpaka pa Musa, haka pa wala wangali kukita sambi kwa ndingo wa kuhoka kwake Adam, nuyombe kihwanakiso kya yula akayili mu kuyicha. 15Koma nukuya ngati kuhoka, wiwi kawili kya waka. Pakuya wona pa kuhoka kwa yumonga wingi wakafwili, kulutila neema ya Mulungu, ni kya waka pa neema ya mundu yumonga yula, Yesu Kristo, yikayolokili wingi. 16Na nukuya ngati kwa yumonga yula akakiti sambi, wiwi kya waka: pakuya lipaulo kipitile yumonga kwa kupisika mbifu, koma kya waka kipitile mahoko ga mahele kwa kugoloseka. 17Pakuya wona pa lihoko lya yumonga kifwa kikayili mutwa pa yumonga; kufuluka wa kufiyupa fya neema ni kya waka kya kugoloka yawaye watwa pa yumonga, yuyu, Yesu Kristo. 18Mumu umu pa lihoko limonga kukawafikili wandu woha kupisika uwifu; wiwi pa likitiko limonga lya kugoloka kukawafikili wandu woha kugoloseka kwa kulama. 19Pakuya umu pa kwangali kuyufwa kwa mundu yumonga wa mahele wapisiki wene sambi, wiwi kawili pa kuyufwa kwa mundu yumonga wa mahele yawapisike wakugoloka. 20Leka torah yikayingili pa ndemuko kukita lihoko lifuluke; koma pala sambi yikafulwiki, neema yikafulwiki nganila: kukita, 21umu sambi yikayili mutwa pa kifwa, wiwi kawili neema yiye mutwa pa kugoloka mpaka pa kulama kwa miaka mwa Yesu Kristo Bambo witu.

Currently Selected:

Roma 5: MGS1937

Highlight

Copy