Roma 16

1Nipeleka kwinu Foibe ndumbu witu, uyu ayii wakulitumakila kanisa lya pa Kenkrae: nausi munjupe pa Bambo, umu mulinganila wawalafu, ni kukita muntangatile poha poha wona alonda kandu kwinu: 2pakuya mwene nayombe akawatangatili wa mahele, na nenga namwene kawili.

3Muwalamuse Priska nu Akula wayangu pa lihengo lya Kristo Yesu, 4wala nuwombe ndawa ya wumi wangu wakawikiti pasi singo yawe wene; wala nukuya nenga nakape niwasengusa, koma makanisa goha ga Mihuku kawili: 5ni kanisa lila liyii pa nyumba yawe. Mundamuse Epeneto wakuganika wangu, uyu ayii kyakulosa kya pa Asia mwa Kristo. 6Mundamuse Maria, uyu akakiti lihengo lya mahele kwa mwenga. 7Muwalamuse Androniko ni Yunias, wa nsafi wangu, na wayangu mu migoyi, wala wayii ni lihina pagati pa maapostolo, nawombe kawili wakayili mwa Kristo palongolo pa nenga. 8Mundamuse Ampliato wakuganika wangu mwa Bambo. 9Mundamuse Urbano njitu pa lihengo mwa Kristo ni Staku wakuganika wangu. 10Mundamuse Apelle wakulingika nnofu mwa Kristo. Muwalamuse wa pa Aristobulo. 11Mundamuse Herodion wa nsafi wangu. Muwalamuse wa pa Narkisso, wala wayii mwa Bambo. 12Muwalamuse Trufina nu Trufosa, wala wakangamala pa lihengo lya Bambo. Mundamuse Persis wakuganika, yula akahengiti lihengo lingi mwa Bambo. 13Mundamuse Rufo wakuhagulika wa Bambo, nu nyongolo wa yombe ni wa nenga. 14Muwalamuse Asunkrito, Flegoni, Herme, Patroba, Herma, na walongo wala wayii nawo. 15Muwalamuse Filologo nu Julia, Nereu nu mhachamundu, nu Olumpa, na wawalafu woha wayii pamonga nawo. 16Mulamuse ni kununa kuwalafu yungi nu njini. Makanisa goha ga Kristo gawalamusa mwenga.

17Ni niwapembesa, walongo, kuwalola wala wakita mapatukano ni fyakukuwasa, kupindika mayigaliso gala mukayigalisi: ni mupatukane nawo. 18Pakuya wa ntundu uwu wantumakila Bambo witu lepa, koma lileme lyawe wene; leka kwa malowe gakunogela gawe ni gakwiganisa wayikongela mioyo ya wala wangali kuwipa. 19Pakuya kuyufwa kwinu kuwafikila wandu woha. Mumu nihekelela pa mwenga: koma nilonda muye wene malango mpaka pa kila kiyii kinofu, leka wahimu pa kila kiyii kiwifu. 20Ni Mulungu wa kindamba yankupule Shetani pasi pa njayo sinu nukusyela lepa.

Neema ya Bambo witu Yesu Kristo yiye pamonga nu mwenga.

21Awalamusa mwenga Timoteo njangu pa lihengo; nu Lukio nu Yason, nu Sosipetro, wa nsafi wangu. 22Nenga Tertio, wakulemba epistola iyi, niwalamusa mwa Bambo. 23Gayo, yuanikemelekesa, ni wa kanisa lya mfilimila, awalamusa. Erasto, wakugoha fyuma fya likaya awalamusa, nu Kwarto ndongo witu. 24Neema ya Bambo witu Yesu Kristo yiye nu mwenga mwawoha.

25Leka kwa yula wakuhotola kuwakangamasa mwenga kwa ndingo wa evangel yangu nu kuwandisa kwake Yesu Kristo, kwa ndingo wa mafunukuliko ga kya kuhyetu kyakuwikika teke kitumbulile lukumbi lwa miaka ni miaka, koma hino kilasiki pa lulanga, 26ni pa malembo ga wakulweta, kwa ndingo wa luwimbi lwa Mulungu wa miaka ni miaka, kimanyasiki pa mihuku yoha kwa kukiyufwana kiyitakiso; 27kwa Mulungu wakape mwene malango, pa Yesu Kristo, kwa yula kukwisika kwa miaka ni miaka. Amen.

Currently Selected:

Roma 16: MGS1937

Highlight

Copy