Makitiko Ga Maapostolo 6

1Leka pa magono aga, pakufuluka wanafunsi, kukayili kuniongoneka pa waHebrayo wakujowa kiGriki, ndawa wafwili wawe wakalolaliki lepa wicho pa kutumakila kula ligono ni ligono. 2Leka kumi na wawili wala wakakemili kwawe lipuga lya wanafunsi, na wakajowiti, Nukuganika kukita tenga tileke lilowe lya Mulungu, ni kutumakila pa mesa. 3Mumu mulolele walongo, wandu saba wa mwenga wene mbili yinofu, wakumema nu Roho wa malango, wala yatiwawike kuyimalila lihengo ili. 4Koma tenga yatikangamale pa kusali, ni pa kutumakila kwa lilowe. 5Leka lilowe ili likaganiki pa miho pa lipuga lyoha: na wakahagwili Stefano, ngosi wakumema ni kiyitakiso nu Roho Mbalafu, nu Filipo, nu Prokoro, nu Nikanor, nu Timon, nu Parmena, nu Nikolas, mproselute wa Antiokia: 6awa wakawawikiti pa miho pa maapostolo: leka pala wakasaliti, wakawawikili mawoko.

7Ni lilowe lya Mulungu likakuliti; ni lipuga lya wanafunsi likafulwiki pa Yerusalem nyahope; ni lipuga likulungu lya makasisi wakayii mu kuyufwanila kiyitakiso iki.

8Leka Stefano, wakumema ni neema nu mbafu, akitaga finyantiti ni fiwalalilo fikulungu pa nsafi. 9Leka wangi wakayimi wa sunagoge lyakukemaleka lya wa Libertino, ni lya wa Kurene, ni lya wa Alexandria, ni lya wa Kikilia ni wa Asia, kukotana nako Stefano. 10Na wakalinganili lepa kupindika luhala nu Roho uyu akayili kulongela nako. 11Bahalapala wakalaliki wagosi kuhyeto, nawo wakajowiti, Tiyufwini uyu ni alongela blasfemia kumpindika Musa, ni Mulungu. 12Na wakayimusiti nsafi, nu wakulu‐wakulu, nu wakulembela, na wakamfikili, ni wakankamwili, na wakachiti nako pa chengo, 13na wakawikiti walungamakiso wa mageya, kujowa, Mundu uyu akotoka lepa kulongela malowe ga kupindika pandu apa pawalafu, ni torah: 14pakuya tiyufwini uyu kujowa kukita uyu Yesu wa Nazareti yabombonyole pandu apa, na yayandungane mikuwu yila Musa akatipelekili. 15Na woha wakulungu pa chengo, pawakandolakisi yombe, wakaweni kyene kyake ngati kyene kya malaika.

Currently Selected:

Makitiko Ga Maapostolo 6: MGS1937

Highlight

Copy