Makitiko Ga Maapostolo 23

1Leka Paolo, kukwinulila wa chengo, akajowiti, Walongo, nalamiti palongolo pa Mulungu nu mwoyo wa pa chengo unofu mpaka ligono lya lilino. 2Leka kasisi nkulungu Anania akawatawukili awa wakayimi baho kuntowa pa ndomo. 3Bahalapala Paolo akajowiti kwa yombe, Mulungu yakutowe wenga, lihiliwiga lya kuwalasika: na wenga utama wakunipawula kwa ndingo wa torah ati, ni kuhokela torah kutawukila nitoweke? 4Leka awa wakuyima baho wakajowiti, Undoga kasisi nkulungu wa Mulungu? 5Ni Paolo akajowiti, Walongo nikamanyiti lepa kukita ayii kasisi nkulungu: pakuya yilembiki, Usijowa kiwifu panani pa wakupawula wa nsafi wako. 6Leka Paolo, pakawalalili kukita lilundu limonga liyii lya waSadukayo, ni lingi lya waFarisayo, akakwesiti pa chengo kukita, Walongo, nenga niyii mFarisayo, mwana wa waFarisayo: panani pa kihuwalilo kya kusyuka kwa wakufwa nipawulika. 7Na pakulongela yombe ili, njwawila yikayimiti pagati pa waFarisayo na waSadukayo: ni nkokano ukapatukiki. 8Pakuya waSadukayo wajowa kukita payilepe kusyuka, haka malaika, haka roho: leka waFarisayo wayitakila fyoha fiwili. 9Leka kukayili kuywawa kukulungu: na wangi wakulembela wa lilundu lya waFarisayo wakayimi ni kupindikana kujowa, Tikolela lepa haka kandu kawifu pa mundu uyu: leka kiki wona roho yikalongili nuyombe, pangi malaika? 10Leka pakutama baho njwawila yikulungu, kapitao wa elfu, pakayogwipi kukita Paolo yakachulike nawo, akawapawili askari kuselela ni kunnyaka ni mbafu pagati pawe, ni kuyicha nako kuhyetu ku lilinga.

11Leka kilo kikilakila Bambo akayimi payombe kujowa, Tama nu mwoyo: pakuya umu ukalekili ulungamakiso wa nenga pa Yerusalem, wiwilawila ulinganila kulasa ulungamakiso pa Roma kawili.

12Leka apa ukayili musi, waYehudi wakakokini, na wakakitini kilago pa kulapalakisa, kujowa kukita nukulya nukunywa lepa mpaka apa wakamaliti kunkoma Paolo. 13Leka wayili wakulutila makumi ncheche awa wakakiti kilapo pamonga. 14Na wakawachilili makasisi makulungu na wakulu‐wakulu, na wakajowiti, Kulapikisa tilapalakisi kukita yatilose lepa kandu mpaka timaliti kunkoma Paolo. 15Mumu hino mwenga pamonga ni chengo kyoha mundase kapitao wa elfu kukita aselele nuyombe kwinu, kihwanakiso kya kulonda mwenga kupawula mhalo wake kwa kumalakilana: na tenga, akona nukuwandamila yombe, tiwikilingani kunkoma. 16Koma mwipa mundu wa Paolo, pakayufwini kuyuwila kwawe, akachiti nakayingili pa lilinga, nakambuliti Paolo. 17Leka Paolo akankemili kwake yumonga wa ma‐kenturion, nakajowiti, Untole mpalo uyu kwa kapitao wa elfu: pakuya ayii ni kindu kya kumbula. 18Mumu akantoliti, akabiti nako kwa kapitao wa elfu, nakajowiti, Paolo wa mu migoyi akanikemili kwake, akanikotiti nihiche nako mpalo uyu kwako, pakuya ayii ni kindu kyakulongela nu wenga. 19Leka kapitao wa elfu akankamwili kiwoko, ni kuwuka pa mweya akankotiti, Kiki iki uyii nakyo kuniwula? 20Na akajowiti kukita waYehudi wakayitikisini kukukota nausi lukela uselele nu Paolo pa chengo, ngati ulonda kukotokesa ya yombe mwakumalakilana. 21Mumu wenga usikopeka nawombe: pakuya wanjuwili wa awa wandu kulutila makumi ncheche, wakayikungiti pa kulapalakisa, wasilya wasinywa mpaka wamaliti kunkoma yombe: na hino wayiwikilingani, kulindalila kilago kyako. 22Mumu kapitao wa elfu akampili mpalo mwanja, akantawukili kukita Usilongela nu mundu kukita ukanilasiti ndumi isi. 23Na akayikemalili kwake wawili wa ma‐kenturion, nakajowiti, Muwikile ngani asikari mia mbili wabite mwanja mpaka pa Kaisariya, na wakukwela pa mafarasi sabwini, ni wa migoha mia mbili, saa yakadatu kilo: 24ni kuwika baho nyama, nausi wambike baho Paolo, wanjokole mpaka pa Felike nduna. 25Ni akalembiti barua kihwanakiso iyi:

26Klaudio Lusia kwa nduna nnofu Felike, salaam. 27Mundu uyu akakamuliwi na waYehudi, nawo wakalonditi kunkoma, na nikafiki baho ni libanja, ni kunjokola, pakuyufwana kukita ayii mRoma. 28Ni pakulonda kuwalalila nyimu ya ndawa yake walungamakila yombe, nikaselili nako pa chengo kyawe: 29uyu nawalalili kulungamakika ya makoto ga torah yawe, leka nukuya kulinganila kwa kufwa haka kwa migoyi. 30Leka apa wakanilasiti kukita yawampangili uyu luhala kunjananga, bahalapala nikantumiti kwako, kuwataukila awa wakundungamakila nawombe kawili kumpela mhalo pa chengo kyako.

31Mumu asikari, umu akawatawukili, akantoliti Paolo, nakabiti nako kilo ku Antipatris. 32Leka lukela lwake wakalekiti awa wakukwela pa mafarasi nausi wawuke nuyombe, na wakakilawukili ku Boma: 33awa nawombe apa wakayingili pa Kaisariya, ni kumpela nduna barua, wakampeliki Paolo kawili kwa yombe. 34Leka yombe paakasomiti akankotiti ayii wa ndima wuli: na paakawalalili kukita ayii wa Kilikia, 35akajowiti, yaniyufwanile mhalo wako, apa awa wakukulungamakila yawayiche nawombe kawili: na akapawili agoheke pa pretorio wa Herode.

Currently Selected:

Makitiko Ga Maapostolo 23: MGS1937

Highlight

Copy