Makitiko Ga Maapostolo 19

1Leka yikayili kukita apa Apollos akayili pa Korinto, Paolo pakagenditi pa malundu munani, akachiti ku Epheso, ni akawakolili wanafunsi wangi: 2ni akawajowili, Mukanjupiti Roho Mbalafu pakukela? Leka wakajowiti, Lepa, haka tayufwini lepa ya Roho Mbalafu kukita apelewa. 3Ni akajowiti, Mumu mukabatasiki kuyingila pa kiki? Ni wakajowiti, Kuyingila pa ubatiso wa Yohana. 4Leka Paolo akajowiti, Yohana abatisyaga nu ubatiso wakupela, kuwajowela wandu kukita wankele kikelile yombe yuayili mu kuhicha panyuma pake, yuyu Yesu. 5Leka pawakayufwini, wakabatasiki mwa lihina lya Bambo Yesu. 6Ni apa Paolo akawawikili mawoko, Roho Mbalafu wakachiti pa wombe; ni wakalongili ni nimi ni wakalwetiti. 7Ni awa wohawa wakayili wagosi ngati kumi na wawili.

8Leka akayingili pa sunagoge ni akalongili mwa kusindimala kwa miesi yidatu, kukotana ni kukonga panani pa findu fya utwa wa Mulungu. 9Leka baha na baha wangi wayili wakuyuma nu wangayufwana kwijowa fiwifu Ndila iyi pa miho ga lipuga, pakapatukini nuwombe akawapatwili wanafunsi, ligono ni ligono kukotana pa shule ya Turano. 10Leka iki kikitile kwa lukumbi lwa miaka yiwili; mpaka woha wakuhwela pa Asia wakayufwini lilowe lya Bambo, waYehudi ni waGriki kawili. 11Nu Mulungu akakiti fya mbafu fikulungu pa mawoko ga Paolo: 12mpaka twatoliki kwa awa wakulwala tunguo ni mipati kuhumila pa mbili wake, ni fitamu fikawalekiti, ni roho siwifu sikawukiti. 13Leka wangi wa waYehudi nawombe kawili wamanya kugendagenda, wakuwusa roho siwifu, wakikamulisi kuluwula panani pa awa wayili ni roho siwifu lihina lya Bambo Yesu, kujowa, Niwalapalakisa kwa Yesu uyu Paolo ambwandisa. 14Leka wayili wana mhano na wawili wa nunuyu Skeva, mYehudi, kasisi nkulungu, wakukita iki. 15Leka roho mbifu akahigiti nakawajowili, Yesu nimmanya, nu Paolo nimbalalila; koma mwenga muyii wa nani? 16Nu mundu akawajumbili, uyu ayili ni roho mbifu mugati mwake, ni kuwalepelela woha wawili, ni akawahotwili mpaka wakakimbili pa nyumba ukengele na wakutemeka mawamba. 17Leka iki kikapatiti kumanyika na woha, waYehudi ni waGriki kawili, wakuhwela pa Epheso; ni woga ukawagwilili woha, ni lihina lya Bambo Yesu likakwisiki. 18Na wingi wa awa wamaliti kukela wakachiti kuwandisa ni kukokosa makitiko gawe. 19Leka wingi wa awa wakitaga fya uhawi wakakokanisi fitabu fyawe, ni wakafikungiti mwoto pa miho ga woha: ni wakawalingi uhemesi wake, ni wakakolili kukita ndalama fipingili elfu makumi mhano. 20Wiwi kwa mbafu lilowe lya Bambo likakuliti ni kulinganila.

21Leka apa findu ifi fikamalasiki, Paolo akapangiti luhala pa roho, pamaliti kugendela pagati pa Makedonia ni Akaya, kugenda mwanja mpaka ku Yerusalem, kujowa, Panyuma pakuyicha kuko nilinganila kulola Roma kawili. 22Leka pakatumiti wawili wa awa wakuntumakila, Timoteo ni Erasto, mwene akahweliti lukumbi lungi pa Asia.

23Leka ngati pa lukumbi lula‐lula yikayimiti njwawila yangakepa pa Ndila iyi. 24Pakuya mundu nunuyu lihina lyake Demetrio, wakuponda ndalama, wakukita mahekalu ga ndalama ga Artemis, akawapatili mafundi kipatapata kyangakepa; 25awa akawakemili pamonga, na awa wakuhenga lihengo lya fyoha ifi, nakajowiti, Wagosi, muwalalila kukita kyuma kitu kiwukiti pa lihengo ili. 26Ni mulolela wichu ni muyufwana, kukita nukuya pa Epheso pakape, koma papipi pa Asia poha, Paolo uyu akakopiti lipuga lyangakepa ni kuwang’anamula, kujowa kukita nukuya wakamulungu wala wapangiti nu mawoko: 27leka kuyii ulugu kukita nukuya malundu gitu gakape gahepeke; koma kukita kawili hekalu ya mulungu ndala nkulungu Artemis yiwalangike pawaka kindu, ni kawili haka ukulungu wake uyingile pakuyanangika, yula lingwilakimbo Asia lyamfilimila nu ndima woha kawili. 28Leka pala wakayufwini iki wakamemiti nu makeko, ni wakakwesiti malowe kujowa, Nkulungu Artemis wa waEpheso. 29Ni likaya likamemiti ni matimbilikanyo: na wakakimbili kwa mwoyo umonga pa teatro, wakakamwili Gaio ni Aristarko wa Makedonia, wala wa mwanja wake Paolo. 30Leka pala Paolo akalonditi kuwabitila wandu, wanafunsi wakanjitakili lepa. 31Leka wangi waAsiarko kawili, pakuya wakosi wake, wakapeliki kwake kumpembesa kukita asiyipeleka mwene pa teatro. 32Mumu wangi wakakwesiti kingi na wangi kingi: pakuya nkokano ukayili wakitimbilakini; na wingi nukumanya lepa ndawa kiki wamaliti kuhicha pamonga. 33Ni wakamhegalisi Alexandro palongolo pa lipuga, waYehudi wambikiti palongolo. Ni Alexandro akakinyili ni kiwoko, akalonditi kuwalanga kwa wandu. 34Leka pala wakawalalili kukita mYehudi ayili, woha wakakwesiti ni lilowe limonga ngati saa siwili, Nkulungu Artemis wa Epheso. 35Leka wakulembela, apa akaselisi mwoyo wa lipuga, akajowiti, Wagosi wa Epheso, nani ayii wangali kumanya kukita likaya lya Epheso liyii lyakupwagila hekalu ya Artemis nkulungu, ni lya kyakuhongola kila kikagwili pa Zeu. 36Mumu pakuwona kukita yangahotoleka kupindika findu ifi, mwenga mulinganila kuya nu mwoyo wa kwiselesa, musikita kandu kyakuyumbatika. 37Pakuya muchiti nawo wagosi awa kuni, nukuya wakuyupa findu fya mu hekalu, kawili nukuya wakunkitila mulungu ndala witu blasfemia. 38Mumu wona Demetrio, na mafundi pamonga nuyombe, wayii nu mhalo na mundu, fiyii fyengo na gayii manduna gene fyengo: walungamikilane. 39Koma wona mulonda kandu kya lilowe lingi, yayikokoseke pakukemaleka pamonga umu yiyitikalika. 40Pakuya tenga tiyii mu ulugu kukita yatipelewe mhalo ya njwawila ya lilino, pakuya pangali nyimu yake: ya aga yatihotole lepa kuwalanga wicho ya nkokano uwu. 41Na pakajowiti aga, akawapili mwanja wakukemaleka pamonga.

Currently Selected:

Makitiko Ga Maapostolo 19: MGS1937

Highlight

Copy