I Petro 1
1
1Petro, apostolo wa Yesu Kristo, kwa wakuhagulika wakwihadisa pandu pa Wakuyambanika pa Ponto, Galatia, Kappadokia, Asia, ni pa Bethunia, 2kwa ndingo wa kumanya palongolo pake Mulungu Dadi, pa kukwisika kwake Roho, mpaka pa kuyufwana ni kulapukisa mwasi wa Yesu Kristo: Neema kwinu ni kindamba kifulukasike. 3Apelewe kihomo Mulungu nu Dadi wa Bambo witu Yesu Kristo, uyu kwa ndingo wa lipyana lyake lukulungu akatihogwili kawili mpaka pa kihuwalilo kya kulama pa kusyuka kwake Yesu Kristo pa wakufwa, 4mpaka pa lipwela lyangayanangika, liwalafu, lyangayunda, lyakugoheka kunani kwa mwenga, 5muyii pa mbafu ya Mulungu wakugoheka pa kiyitakiso kwa uyokosi wakuwikika ngani kufunukulika pa lukumbi lwa kumalakisa. 6Pa iki muyangala, haka hino apa pa lukumbi lwa kukepa, wona yiyenaliki, mwenga wakuniongoseka pa mageseko ga mahele, 7nausi kulingika kwa kiyitakiso kinu, pakuya kya uhemesi wingi kulutila zahabu yila yiyanangika, haka yilingika nu mwoto, kuwoneke mpaka pa kulumba nu kukwisika ni liginiko pa kufunukula kwake Yesu Kristo: 8yula haka mumbweni lepa mungana; pa yula, haka hino apa mumbona lepa, leka pa kukela, muyangala ni kuhekelela kwangajoweka ni kwene kukwisika: 9kuyupa kumalakisa kwake kiyitakiso kinu, wuwu uyokosi wa mawumi. 10Pa uyokosi wula wakulweta wakalonditi‐londiti ni wakaweyiti ngani, wala wakalwetiti pa neema yila yayiwachile: 11pa kuweya lukumbi luliku nu lukumbi wuli Roho wa Kristo, iyo ikayili mwa wombe, ikayili mu kulasa, baho ikalekalili mahumbuso gake Kristo ulungamakiso palongolo, ni fya kukwisika fya kugakisa panyuma. 12Kwa wala kukafunukuliki, kukita nukuya kwa wene, koma kwa mwenga, watumakileye gago, gala hino gawandasiwi kwa mwenga pa wala wakawatolili evangel pa Roho Mbalafu wakupelekeka kuhumila kunani; pa ifi wamalaika wanyonyela kulingulila mumu.
13Kwa iki kwikunga mu fiwuno fya mioyo yinu, mwihotole, muhuwalile ngani pa neema yila yiyii mu kutoleka kwinu pa mafunukuliko ga Yesu Kristo; 14ngati wana wakuyufwana, wangali kwilinganisa matamilo ginu kwa ndingo wa manyonyelo ga mwandi baho mukamanyiti lepa: 15koma ngati umu yula akawakemili ayii mbalafu, mwenga namu muye wawalafu pa matamilo ginu goha; 16ndawa yilembiki, Yamuye wawalafu; pakuya nenga nambalafu. 17Ni wona munkemalela Dadi, yula pangali kuhagula fyene apaula kwa ndingo wa lihengo lya ayi yoha, mugende‐gende pa kuyogopa lukumbi lwa kwihadisa pandu apa: 18pa kumanya kukita kukakomboliki, nukuya ni fya kuyanangika, ni ndalama pangi zahabu, kipitile pa matamilo ga waka ginu gakupelewa ni wakadadi winu; 19koma nu mwasi wa uhemesi ukulungu, ngati wa lyana lya mbelele lya nyelelele lyangali machilili, wuwu wa Kristo; 20uyu akamanyiki palongolo pa kuwikika ndima, leka akalasiki pa kumalakisa pa ngumbi kwa ndawa ya mwenga, 21wakunkela Mulungu pa yombe, yula akansyusiti yombe pa wakufwa, ni akampili kukwisika; nausi kiyitakiso ni kihuwalilo kinu kiye pa Mulungu. 22Pakuwona kukita mwaguywili mawumi ginu pa kuyufwana fya chakaka mpaka pa kuwagana walongo pangali kwikangalakisa, muganane kipitile pa mwoyo: 23pakuya wakuhogoleka kawili, nukuya kipitile pa mbeyu ya kuyanangika, koma pa yangayanangika, pa lilowe lya Mulungu, lila lilama ni lihwela. 24Pakuya,
Nyama yoha yiyii ngati manyasi,
Ni kukwisika kwake kwoha ngati liluwa lya linyasi.
Linyasi liyunda, ni liluwa ligwa:
25Koma lilowe lya Bambo lihwela kihwelile.
Ni ili liyii lilowe lya evangel lila likawandasiki kwinu.
Currently Selected:
I Petro 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
