रोमानियनमन 15
15
दोसरमन के बिसवास में मजबूत करा
1अगर हमरे केर बिसवास मजबूत अहे तो जेमन केर बिसवास कमजोर अहे, उमन केर मदइत करेक चाही, ना कि खुद के खुश करेक चाही। 2हमरेमन में से हरेक झन के अपन बिसवासी भाई-बहिन केर भलाई करेक चाही, जेकर से उमन खुश होबैं आउर बिसवास में हों मजबूत होबैं। 3काले कि मसीह खुद के खुश नी करलक, मगर जइसन पवितर किताब में लिखल अहे, “तोर निंदा करेक वालामन मोर निंदा करलैं।” 4जेतना गोइठमन पहिले से पवितर किताब में लिखल अहे, उमन हमरे हें केर शिक्षा लगिन लिखल जाय हे, ताकि हमरे धीरज आउर बिसवास में मजबूत होवब, जेके हमरे पवितर किताब से पाविला, ताकि हमरे ठिना आसरा रही। 5मोंय प्रार्थना करोना कि धीरज आउर बिसवास में बढ़ाएक वाला परमेश्वर तोहरेमन के एक दोसर संगे शांति से रहेक में मदइत करोक, जइसन तोहरे यीशु मसीह केर पिछे चलाला। 6ताकि तोहरेमन सोउब एक संगे परमेश्वर केर, जे हमरे केर प्रभु मसीह यीशु केर आबा हेके, उकर महिमा करबा।
सोउब केर लगिन शुभ समाचार
7इ लगिन एक दोसर के ग्रहण करा, जइसन कि मसीह तोहरे के ग्रहण करलक, इके इ लगिन करा ताकि आदमीमन परमेश्वर केर महिमा करबैं। 8इ लगिन मोंय तोहरेमन के कहोना कि जे करार परमेश्वर हमर पुरखामन से काइर रहे, उ करार के पूरा करेक लगिन मसीह यहूदीमन केर सेवक बनलक। जेकर से उ इ देखाएक पारोक कि परमेश्वर बिसवास लायक अहे। 9आउर परजाइत आदमीमन हों परमेश्वर केर दया केर चलते उकर बड़ाई करोक, जइसन कि भजन के लिखेक वाला लीख हे, “मोंय परजाइत आदमीमन में तोर धन्यबाद करमूँ, आउर तोर नाँव केर भजन गामूँ।” 10फिन दोसर ठाँव में इ लिखल अहे, “हे परजाइत आदमीमन, परमेश्वर केर परजामन केर संगे खुशी मनावा।” 11आउर फिन पवितर किताब में लिखल अहे, “हे परजाइत आदमीमन, प्रभु केर बड़ाई करा, आउर हे राइज-राइज केर सोउब आदमीमन, उकर गुणगान करा।” 12फिन यशायाह परमेश्वर केर संदेश के बताएक वाला पवितर किताब में लीख हे, “यिशै केर बंश में से एगो आदमी आवी, आउर परजाइत आदमीमन केर उपरे उ राइज करी, आउर परजाइत आदमीमन उकर उपरे आसरा करबैं।”#15:12 यिशै दाऊद केर आबा रहे (1 शमूएल 16: 11-13)। आउर मरियम जे यीशु के जनम देलक, उ दाऊद केर बंश रहे। यीशु यिशै केर बंश में से आलक आउर मनवा बनलक, आउर यशायाह परमेश्वर केर संदेश के बताएक वाला केर गोइठ पूरा होलक। 13मोंय प्रार्थना करोना कि परमेश्वर जे आसरा करेक केर सोता हेके, तोहरेमन के बिसवास करेक में सोउब रकम केर खुशी, आनंद आउर शांति से भरपूर करोक कि पवितर आत्मा केर शक्ति से तोहर आसरा बढ़ते जाओक।
साहस से लिखेक केर कारण
14हे मोर बिसवासी भाईमन, मोंय खुद हें तोहर बारे में पक्का जानोना कि तोहरेमन हों खुद हें भलाई से भरल अहा आउर पूरा-पुरी जानाला कि तोहरे के का करेक अहे, आउर तोहरे एक दोसर के सिखाएक पाराला। 15,16मगर मोंय तोहरेमन के याइद करवाएक लगिन लिखेक केर साहस करलों। परमेश्वर उ आदमीमन लगिन, जेमन परजाइत आदमीमन हेकैं, मोके अपन खास चेला केर रूप में चुनेक केर किरपा करलक। मोंय उमन के यीशु मसीह केर बारे में शुभ समाचार बताय के परमेश्वर केर सेवा करोना, इ नियर मोंय उमन के परमेश्वर लगिन पुरोहित नियर बलिदान केर रूप में चढ़ावना, जेकर से उ खुश होवेला, काले कि पवितर आत्मा उमन के शुद्ध काइर हे।
17यीशु मसीह से मोर रिश्ता अहे, इकरे चलते मोंय परमेश्वर केर सेवा करेक केर घमंड करेक पारोना। 18आउर मोंय इ कहेक केर साहस करोना, काले कि यीशु मसीह मोर द्वारा काम करलक, जेकर से परजाइत आदमीमन परमेश्वर केर पिछे चलेक वाला बनलैं, उमन परमेश्वर उपरे भरसा करलैं जब उमन मोर गोइठमन के सुनलैं आउर मोर काममन के देखलैं। 19मोके पवितर आत्मा बटले शक्ति देवल गेलक जेकर से मोंय शक्तिशाली चिन्हामन आउर चमत्कार काममन के करलों। से लगिन मोंय यरुशलेम शहर से लेई के इल्लुरिकुम परदेस केर आसे-पासे जहाँव कहों रहलों, मोंय सोउब आदमीमन के यीशु मसीह केर बारे में शुभ समाचार केर परचार करलों। 20मगर मोर मन केर जोश इ अहे कि शुभ समाचार केर परचार ओहे ठाँवमन में होवोक, जहाँ मसीह यीशु केर बारे में आदमीमन एखन तक नी सुइन हैं, ताकि मोंय परमेश्वर केर काम के उ ठाँवमन में नी करमूँ जहाँ केऊ दोसर आदमी पहिलेहें शुरु काइर हे, जइसन कि एगो आदमी दोसर आदमी केर कोड़ल नेव में घर नी बनायला। 21मगर जइसन पवितर किताब में लिखल अहे तइसनेहें मोंय करेक चाहोना, “जेमन के उकर शुभ समाचार केर बारे में कहियो बताल नी जाय हे ओहेमन देखबैं, आउर जेमन उकर बारे में कहियो नी सुइन हैं ओहेमन बुझबैं।”
रोम देस जाएक केर पौलुस केर योजना
22एहे लगिन मोंय तोहर ठिना आवेक से घरी-घरी रुकल रहलों। 23मगर अब मोंय इ परदेसमन में, जहाँ यीशु मसीह केर बारे में नी सुइन रहैं, उमन के शुभ समाचार परचार करेक केर काम के पूरा काइर देलों। 24से लगिन जब मोंय स्पेन देस जामूँ तो तोहर ठिना होते हुए जामूँ, काले कि मोके आसरा अहे कि उ यात्रा में तोहरे से भेंट होवी, आउर जब तोहरे केर संगति से मोर मन भाइर जाई, तो तोहरेमन मोके थोरेक दूर आगे पोंहचाय देबा। 25मगर एखन तो मोंय पवितर आदमीमन के दान देवेक लगिन यरुशलेम शहर जाथों। 26काले कि मकिदुनिया आउर अखया परदेस केर आदमीमन अपन इच्छा से इ भला काम करेक केर फैसला करलैं कि जे परमेश्वर केर आदमीमन यरुशलेम शहर में अहैं आउर गरीब अहैं, उमन के थोरेक पैसा देवब। 27उमन इ काम खुशी से काइर हैं, उमन यरुशलेम शहर में रहेक वालामन केर कर्जदार हों हेकैं, काले कि यरुशलेम शहर केर बिसवासीमन, परजाइत आदमीमन के परमेश्वर केर बेस चीजमन के बाँइट हैं, से लगिन परजाइत आदमीमन के हों इ उचित अहे कि यरुशलेम शहर केर बिसवासीमन के दुनिया केर बेस चीजमन के बाँटोक। 28से लगिन पहिले मोंय यरुशलेम शहर जाथों कि इ मदइत करेक लगिन जमा करल पैसा के जिम्मा देई देमूँ। इकर पाछे मोंय रोम देस में तोहरे से भेंट काइर के स्पेन देस चाइल जामूँ। 29आउर मोंय जानोना कि जब मोंय तोहर ठिना आमूँ, तो मोर आवेक केर चलते मसीह तोहरे के भरपूर आशीष देवी।
30आउर हे बिसवासी भाईमन, मोंय प्रभु यीशु मसीह केर नाँव में तोहरे से बिनती करोना कि परमेश्वर से मोर लगिन प्रार्थना काइर के, मोर कठिन मेहनइत में शामिल होवा। इ सोउब तोहरे इ लगिन करा, काले कि तोहरे मोर से प्रेम कराला, जे प्रेम पवितर आत्मा बटले तोहरे के देवल जाय हे। 31ताकि मोंय यहूदिया परदेस केर अबिसवासीमन से बाइच के रहमूँ, आउर यरुशलेम शहर में परमेश्वर केर पवितर आदमीमन, जे मदइत केर पैसा मोंय उमन लगिन लेगमूँ उके लेई के खुश होबैं। 32आउर मोंय परमेश्वर केर इच्छा से तोहर ठिना खुशी से आय के तोहर संगे आराम पामूँ। 33मोंय प्रार्थना करोना कि परमेश्वर जे शांति देवेला, तोहरे सोउबमन केर संगे रहोक। आमीन।
Currently Selected:
रोमानियनमन 15: SCK
Highlight
Share
Compare
Copy
Want to have your highlights saved across all your devices? Sign up or sign in
Sadri Bible by The Love Fellowship is licensed under Creative Commons Attribution-ShareAlike 4.0 License.
