इफिसियनमन 6

आयो आबा आउर छउवामन

1-3पवितर किताब में लिखल अहे, अपन आयो-आबा केर आदर कर, तब तोर संगे भला होवी, आउर धरती में तोंय ढेइर दिन जिबे। इ पहिला आगया हेके जेके परमेश्‍वर एगो करार केर साथ देई हे। से लगिन हे छउवामन, तोहरे जे प्रभु उपरे बिसवास कराला, तोहर लगिन इ उचित अहे कि तोहरे अपन आयो-आबा केर आगया माना। 4आउर हे आयो आबामन अपन छउवामन के ना खिज-खिजवावा, मगर प्रभु केर डहर में चलेक केर शिक्षा, आउर उपदेस देते उ मनक लालन-पालन करा।

मालिक आउर धांगर

5हे धांगरमन, जेमन दुनिया में तोहर मालिक हेकैं, उ मनक ईमानदारी आउर सच्चाई केर साथ आदर आउर सम्मान करा, जइसन मसीह केर आदर आउर सम्मान कराला। 6इ सोउब सिरिफ देखावा या उमन के खुश करेक ले भइर निहीं, बल्कि मसीह केर दासमन नियर काम करा जेमन अपन पूरा मन से ओहे करैना जे परमेश्‍वर चाहेला। 7तोहरे खुशी से अपन सेवा काम के करते रहा, इ समइझ के कि तोहरे आदमीमन केर निहीं मगर परमेश्‍वर केर सेवा कराला। 8काले कि तोहरेमन जानाला, जे केऊ जइसन बेस काम करी, तइसनेहें प्रभु से इनाम पावी, चाहे उ गुलाम अहे, चाहे आजाद। 9एहे नियर हे मालिकमन, तोहरेमन के हों अपन धांगरमन के धमकी देवेक नी चाही, बल्कि उमन से ओहे नियर ब्यवहार करेक चाही, जइसन मोंय उमन के तोहरे से ब्यवहार करेक कइह हों, काले कि तोहरे दुयो केर मालिक स्वरग में अहे आउर उ केकरो से भेद-भाव नी करेला।

आत्मिक लड़ाई केर हँथियार

10तोहरेमन लगिन मोर आखरी गोइठ इ हेके, प्रभु केर शक्ति से आत्मा में मजबूत होवा। 11परमेश्‍वर केर सोउब हँथियार के धाइर लेवा, ताकि तोहरेमन शैतान केर चाल-बाजी से लाइड़ के जितेक पारबा। 12काले कि हमरे लोहू आउर माँस से बनल आदमीमन से नी लड़ाथी, मगर मुखियामन से आउर अधिकारीमन से, आउर अनदिस्तार शक्तिमन से जेमन उ आदमीमन उपरे राइज करैना, जेमन एखनो तक इ दुनिया केर अंधार में अहैं, आउर उ दुष्ट आत्मामन से जेमन फौजमन नियर आकाश में अहैं। 13इ लगिन परमेश्‍वर केर सोउब हँथियार के धाइर के तेयार रहा, ताकि जब बुरा दिन आवी तो जे कोनों करेक पराई उके करल पाछे तोहरेमन मजबूती से स्थिर रहेक पारबा।

14से लगिन परमेश्‍वर केर सच्चाई केर मोताबिक जिंदगी जिया, इ उ नियर अहे जइसन एगो फौजी लड़ेक ले अपन डाँड़ा के कसना से सकतायला, आउर धरमी आदमी नियर ब्यवहार करा, एइसन करेक शैतान केर तीर से बचेक ले छाती में झिलम पिंधेक नियर अहे। 15आउर शुभ समाचार उपरे भरसा करा जेकर में तोहरे के परमेश्‍वर केर शांति मिल हे, ताकि तोहरे मजबूती से खड़ा रहेक लगिन तेयार रहबा, इ उ नियर अहे जइसन एगो फौजी जूता पिंध के लड़ेक लगिन तेयार होवेला। 16आउर उ सोउब केर साथ परमेश्‍वर में बिसवास करा, इ अपने आप के रक्षा करेक लगिन एगो ढाल के धाइर रहेक नियर अहे, ताकि तोहरे दुष्ट शैतान केर तीर के रोकेक पारबा जे आइग नियर अहे। 17आउर परमेश्‍वर जे छुटकारा देई हे उके बिसवास से धाइर रहा, इ उ टोपी नियर अहे जेके एगो फौजी अपन मूँड़ के बचाएक लगिन पिंधेला, आउर परमेश्‍वर केर बचन के लेई लेवा जे एगो तलवाइर नियर अहे जेके पवितर आत्मा देवेला।

18आउर जइसन पवितर आत्मा तोहरे के अगुवाई करेला, सोउब बेरा प्रार्थना आउर बिनती करते रहा, आउर सोउब पवितर आदमीमन लगिन लगातार बिनती करेक ले जागते रहा। 19तोहरे मोर लगिन हों प्रार्थना करा जेकर से गोठियाएक बेरा मोके एइसन गोइठ देवल जाओक कि मोंय निडर होई के शुभ समाचार केर भेद के बताएक पारमूँ। 20इकरे लगिन मोंय बेरी से बाँधल राजदूत नियर सेवा कराथों। आउर एहो लगिन प्रार्थना करा कि मोंय जइसन मोके परचार करेक चाही, ओइसनेहें निडर होई के शुभ समाचार परचार करेक पारमूँ।

आखरी जोहार

21तुखिकुस जे दुलार भाई आउर प्रभु में बिसवास लाएक सेवक हेके तोहरेमन के सोउब गोइठमन के बताय देवी, ताकि तोहरेमन हों इके जाइन जावा कि मोंय का कराथों। 22उके मोंय तोहर ठिना इ लगिन भेइज हों कि तोहरेमन हमर दशा के जाना, आउर उ तोहरेमन केर मन के उत्साहित करोक।

23मोंय हमर आबा परमेश्‍वर आउर प्रभु यीशु मसीह से प्रार्थना करोना कि तोहरे बिसवासी भाईमन के शांति मिलोक, आउर तोहरे एक दोसर से प्रेम करा आउर मसीह उपरे बिसवास में बनल रहा। 24जेमन हमर प्रभु यीशु मसीह से सच्चा प्रेम करैना, उ सोउबमन केर उपरे किरपा होते रहोक।

Currently Selected:

इफिसियनमन 6: SCK

Highlight

Copy

Compare