MAANGMUHNA 18
18
Babylon Khuapi A Cipna
1Tua khit ciangin vantung panin vantung midang khat a hong paisuk ka mu hi. Amah in aana a lian mahmah nei a, ama vang in leitung buppi a taan hi. 2Amah nakpitakin kiko a,
“A Lian Babylon khuapi kicim, kicim!
Tu-in dawite’ kua suak khinta-in,
kha gilote’ omna suak khinta a,
a kihhuai, a muhdahhuai
vasa namkim in omna-in
neita uh hi. #Isa 21:9; Jer 51:8; Mang 14:8; Isa 13:21; Jer 50:39.
3Bang hang hiam cih leh
ama hukna leenggahzu
mi khempeuh dawnsak a,
leitung kumpite tawh paktat a,
ama hukna hangin
leitung sumbawlte in
a hauhlawh uh hi,”
a ci hi.#Isa 23:17; Jer 51:7.
4Tua ciangin vantung panin aw dang khat ka za a,
“Keima mite aw, a mawh gamtatna-ah
kihel kha-in a gimthuakna
thuakpih kha ding na hih manun
hong paikhia un.#Isa 48:20; Jer 50:8; 51:6,45.
5Ama mawhna in van ban a,
a gamtat hoih lohnate
Pasian in phawk gige hi.#Pian 18:20-21; Jer 51:9.
6Amah in note hong bawl bangin
ama tungah gamta unla,
ama tungah
a zah nihin thukkik un.
Amah in note a hong dawnsak
a zah nihin a khauh leenggahzu
ama dawn dingin
a hai sungah sung un.#La 137:8; Jer 50:29.
7Amah kisialin
a kiphatsakna zah tawh a kizui-in
dahna le lungkhamna
thuaksak un.
Amah in, ‘Kei kumpinu ka hi a,
meigong numei lah ka hi kei a,
dahna ka thuak
ngei kei ding hi,’ ci ahih manin,
8gimna in
ni khatthu-in ban ding a,
pulnatna, kahna, le
kialpi in vatgawp ding hi.
Ama tungah thu a khen
Topa Pasian
vanglian ahih manin
mei tawh kihaltum ding hi,”
a ci hi.#Isa 47:7-9.
9Amah tawh paktatin a kiphasak khawm leitung kumpite in tua khuapi a katna meikhu a muh uh ciangin dahin a kap ding uh hi. 10Ama thuakna kihta-in a gamlapi-ah om ding uh a,
“Hih a vanglian
Babylon khuapi in a thuakna,
bangzah takin lauhuai-in,
bangzah takin nasia!
Nai khat sung bekin
hih zah gimna thuak!”
ci ding uh hi.#Ezk 26:16-17.
11Amaute’ na zuakte kuamah in lei nawn lo ahih manin leitung sumbawlte zong tua khuapi’ thuakna hangin dahin a kap uh hi.#Ezk 27:31,36. 12A khamte, a ngunte, a suangmanphate, a kepte, a puanpakte, a puansante, a nai puante, a khausante, a singnamtuite, a sing manphate, a saihate, a sumngote, a sikte, a suangkangte, 13a sinnamon singnamtuite, a singteh namtuite, a myrrh paknamtuite, a saledi-te, a leenggahzute, a sathaute, a annelte le mangbuhte, a bawngte le a tuute, a sakolte le a leengte, le mihing ahi a silate uh kuamah in lei nawn lo hi.#Ezk 27:12-13,22. 14Tua ahih manin sumbawlte in tua khuapi kiangah,
“Deihin na lunggulhgulh
na khempeuh maimangta a,
na hauhna le
na nopcitna teng beita a,
cikmah ciangin
na ngahkik nawnkei ding hi,”
a ci uh hi. 15Tua khuapi sungah sumbawlin a hauhlawh mite in ama thuakna a muh uh ciangin lau-in a gamlapi-ah dingin kapin thum ding uh a,#Ezk 27:31,36.
16“Hih a lian khuapi in a thuakna,
bangzah takin lauhuai,
bangzah takin nasia!
Puan hoihnono,
a dupsan le a sante silhin,
kham, suangmanpha, le
kepte tawh a kizem ngei khuapi!
17Nai khat sungin
a hauhna khempeuh maimang ta!”
a ci uh hi.#Isa 23:14; Ezk 27:26-30.
Teembaw ukte le a tungah a tuangte, teembaw hawlte le tuipi tungah nuntakna a zongte a gamlapi-ah ding uh a, 18a khuapi katna khu a muh uh ciangin,
“Hih zahin a lian khuapi
koi lai-ah om ahi hiam?”
ci-in a kiko uh hi.#Ezk 27:32. 19A kah a thum kawmun a lu tung uhah leivui thehin kap uh a,
“Tuipi teembaw
a nei khempeuh in
a hauhlawh uh hih khuapi
bangzah takin lauhuai-in nasia ahi hiam?
Nai khat sungin
maimangta hi.#Ezk 27:30-34.
20Vantung aw,
ama siatna hangin lungdam in.
Mi siangthote,
sawltakte, le kamsangte aw,
note tungah
hong gamtatna hangin
Pasian in ama tungah
thukhenna
pia khinta ahih manin
lungdam ta un,”
a ci uh hi.#Thkna 32:43; Jer 51:48.
21Tua ciangin a thahat vantungmi khat in angawina suang tawh a kibang suang lianpi khat la-in tuipi sung denna a,
“A lian Babylon khuapi
hih bangin kilawn ding a,
kimukik ngei nawn lo ding hi. #Jer 51:63-64; Ezk 26:21.
22Harp lasakna a ging le
la sate’ awging,
tamngai le peengkul awgingte,
nang sungah kiza nawn lo ding hi.
Nasem a tuamtuamte
nang sungah kimu nawn lo ding a,
angawina a ging zong
kiza nawn lo ding hi.#Ezk 26:13; Isa 24:8.
23Na sungah meivak taang zong
kimu nawn lo ding a,
a kiteng nungak le tangval
a lungdamte’ awging kiza nawn lo ding hi.
Bang hang hiam cih leh na sumbawlte,
leitungah a thahat pen hi a,
na ai tawh leitung mi khempeuh
na khem hi.#Jer 7:34; 25:10.
24Nang Babylon khuapi,
hih bangin gim hong kipiakna pen
kamsangte le mi siangtho
a kithatte’ sisan le
leitungah
a kithat mi khempeuh’ sisan
nangma sungah
a kimuhna hang ahi hi,”
a ci hi.#Jer 51:49.
Currently Selected:
MAANGMUHNA 18: TDB
Highlight
Share
Compare
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
