MAANGMUHNA 11

Teci Nihte

1Tua ciangin ciangkhut tawh a kibang teh nading ciang khat kei kiangah hong kipia a, “Pai inla, Pasian’ biakinn le biakna tau le tua lai-ah Pasian a bia mite va teh in.#Ezk 40:3; Zek 2:1-2. 2Ahi zongin biakinn pualam tualte teh kei in. Minam dangte’ khut sungah kipia khin a, amaute in kha sawmli le nih sung Khuapi Siangtho tuancilgawp ding uh ahih manin tua a tualte teh loin nusia lel in.#Luk 21:24. 3Ka teci nihte puanhampi silhin ka paisak ding a, amaute in ni tulkhat zanih sawmguk sung Pasian’ thu a gen ding uh hi,” hong ci hi.

4Tua teci nihte pen leitung Topa mai-ah a om oliv kung nihte le meivakna nihte ahi uh hi.#Zek 4:3,11-14. 5Mi khatpeuh in amaute suksiat ding hanciam leh amaute’ kam panin meikuang pusuakin a galte a kangtum hi. Amaute suksiat ding a hanciam peuhpeuh tua bangin kisusia hi. 6Amaute’ ut hunhunin a thugen laitakun guah zu losak thei uh a, tuite sisan a suahsak theih nadingun vangliatna nei uh a, leitungah gimna a tuamtuam tungsak thei uh hi.#1Kum 17:1; Pai 7:17-19; 1Sam 4:8.

7Amaute in Pasian’ thu genin a teci panna a zawhkhit uh ciangin kuahawm thukpi sung panin a hong paikhia ganhing in tua teci pangte simin zogawpin that ding a,#Dan 7:7,21; Mang 13:5-7; 17:8. 8singlamteh tungah amaute’ Topa a kithahna mun Sodom ahih kei leh Egypt minkhem a pua khuapi kongzingah a luanghawm uh kipaidak ding hi.#Isa 1:9-10. 9Mi namkim, pau namkim a zang mi tuamtuamte in ni thum le ni lang sung amaute’ luanghawm en ding uh a, a luanghawmte a kivui ding phal lo ding uh hi. 10Teci a pang tua kamsang nihte in leitung mite tungah gimna nakpitakin tungsak uh ahih manin hih mi nihte a sihna hangin lungdamin pawi bawl ding uh a, a nuamna uh hangin khatlekhat letsong kipia ding uh hi. 11Ahi zongin ni thum le ni lang a cinkhit ciangin amaute sungah Pasian kiang panin nuntakna hu lutin, amaute a khe-un hong ding uh ahih manin a mute khempeuh nakpitakin lau mahmah uh hi.#Ezk 37:10. 12Tua ciangin tua teci pang nihte in, “Hih lai-ah hong pai un,” ci-in vantung panin a kisapna awging a za uh hi. Tua ahih manin a galte uh’ muhin vantung meiipi sungah paito uh hi.#2Kum 2:11. 13Tua hun laitakin nakpitakin zin ling a, a khuapi sehsawmsuah sehkhat tang ding kisiacip a, tua zinling in mi tulsagih a sisak hi. A si lo a hing laite lau mahmah uh a, vantung Pasian a liatna thu a phat uh hi.#Mang 6:12; 16:18.

14Gimna nihna a bei hita a, ahi zongin gimna a thumna hong tung baih ta ding hi.

Peengkul Sagihna

15Tua ciangin a sagihna vantungmi in a peengkul hong tum a, vantungah nakpitakin aw hong ging a, “Leitung uk nading aana neihna pen i Topa Khrih a’ hong suakkhin a, amah in a tawntungin uk paisuak ding hi,” hong ci hi.#Pai 15:18; Dan 2:24; 7:14,27. 16Pasian mai-a a tokhom ciat uhah a tu upa sawmnih le lite zong mai pukin Pasian bia uh a,

17“A beisa hun le tu hunah a om tawntung

a Vanglian Topa Pasian aw,

tu-in na vangliatna zangin uk ding

hong kipan khin na hih manin

nangma tungah ka nuamna uh

ka hong ko uh hi.

18Na hehna hong kilat hun

hong tungta a,

misite thukhen nading hun

hong tungta ahih manin

minam dangte

heh mahmah uh hi.

Nangma nasem kamsangte,

a lian a neu,

nang hong kihta mi khempeuhte

thaman na piak ding hun hi ta a,

leitung a susia mite

na suksiat ding hun hi ta hi,”

a ci uh hi.#La 2:5; 110:5; 115:13.

19Tua ciangin vantungah a om Pasian biakna innpi kihong a, a Thuciamna Singkuang zong biakinn sungah a om a kimu hi. Tua ciangin nakpitakin khua phia-in a ging lianpi om a, van gingin zin ling a, gialpi a kia hi.#Mang 8:5; 16:18,21.

Currently Selected:

MAANGMUHNA 11: TDB

Highlight

Compare

Copy