MAANGMUHNA 1

Jesuh Khrih in Maang Musak

1Hih laibu pen a piang baih ding thute, Pasian’ nasemte tungah a lah dingin Pasian in Jesuh tungah a thu pia a, Jesuh in maang sungah a lah thute ahi hi. Khrih in ama vantungmi sawl a, a nasempa Johan kiangah hih thute a kilangsak hi. 2Johan in zong a muhsa thu khempeuh na gen leuleu hi. Hih thute pen Johan in Pasian kiang panin hong pai thute le Jesuh Khrih in ama tungah a lahkhiat thuman thutakte a genna thu ahi hi. 3Hih laibu a sim mite mi hampha hi a, hih thu kigente ngai-in, hih laibu sungah a kigelh thu a zuite zong mi hampha mah ahi uh hi. Bang hang hiam cih leh hih thu kigente a tun ding hun hong naita hi.

Pawlpi Sagihte Hopihna

4Johan in Asia gam sungah a om pawlpi sagihte tungah a khak lai ahi hi.#Pai 3:14; Mang 4:5.

A beisa hun, tuhun, le mailam hunah a om tawntung Pasian kiang pan le ama tokhom mai-ah a om Kha Siangtho sagihte tung pan le, 5thuman takin teci a pang, sihna panin a kithokiksak Tapa upa, leitung kumpite tungah ukna aana a nei Jesuh Khrih kiang panin note tungah hehpihna le nopsakna thupha hong tung tahen.#Isa 55:4; La 89:27.

Tua Jesuh Khrih in eite hong it a, ama sihna tawh i mawhna panin eite hong suaktasak a, 6ama Pa Pasian’ na a sem dingin siampi le kumpi za-ah a hong koih hi. Tua Jesuh in minthanna le vangliatna nei tawntung tahen. Amen.#Pai 19:6; Mang 5:10.

7En un, amah hong paita ding a, meiipi tawh hong tonkhawm ding hi. Teipi tawh amah a sunte a kipan mi khempeuh in a mu ding uh hi. Amah a hong pai ciangin leitung mi khempeuh lau-in a kap ding uh hi. Hih ka gen bangin hong piang takpi ding hi. Amen.#Dan 7:13; Mat 24:30; Mrk 13:26; Luk 21:27; 1The 4:17; Zek 12:10; Joh 19:34,37.

8A beisa hun, tuhun, le mailam hunah zong a om tawntung ding a Vanglian Topa Pasian in, “Kei pen na khempeuh a Kipatna le a Tawpna ka hi hi,” a ci hi.#Mang 22:13; Pai 3:14.

Mihing’ Tapa A Muhna

9Note’ sanggam keimah Johan in Jesuh tawh kipawlna hangin note mah bangin bawlsiatna thuakin, Pasian’ Ukna sungah omin, lungduai takin a thuak mipa ka hi hi. Pasian’ thu le Jesuh’ hong gen thumante ka genna hangin Patmos a kici tuikulh-ah kei hong kikoih hi. 10Topa’ ni-in Kha Siangtho tawh kidimin ka om laitakin peengkul bangin a gingpha mahmah khat ka nung lamah ka za a, 11“Na muhte khempeuh laibu sungah gelh inla, Efesa pawlpi, Smyrna pawlpi, Pergamum pawlpi, Thiatira pawlpi, Sardis pawlpi, Filadelfia pawlpi, Laodisia pawlpi, hih pawlpi sagihte kiangah khak in,” hong ci hi.

12Kua in kei hong hopih ahi hiam, ci-in a en dingin ka kihei leh kham kibawl meivakna sagih ka mu hi. 13Tua meivakte lakah, puantualpi khat silhin a awm-ah kham kibawl awmgak a gak, mi tawh a kibang khat ka mu hi.#Dan 7:13; 10:5. 14A samte tuumul bangin kangin, khuavak bangin pak a, a mittangte meikuang a bang hi.#Dan 7:9. 15A khete, pumbukah a kihalsan sumngo bang a, a awging ahihleh tuipi ging a bang hi.#Dan 10:6. #Ezk 1:24; 43:2. 16A taklam khutah aksi sagih tawi-in, a kam sung panin langnih a hiam namsau khat hong pusuak a, a maitang sun nitaang a bang hi.

17Amah ka muh ciangin misi bangin ama khe phungah ka puk hi. Ahi zongin amah in ka tungah a taklam khut hong nga a, “Lau kei in; kei pen a kipatna le a tawpna ka hi a,#Isa 44:6; 48:12; Mang 2:8; 22:13. 18a nungta mipa zong ka hi hi. Kei ka si ngei hi. Ahi zongin tu-in hong en in, a nungta tawntung ka hi hi. Sihna le misite omna gam keima khutnuai ahi uh hi. 19Tua ahih ciangin tu-a na muh, tu laitakin a om thute le tu nung ciangin a hong piang ding thute, lai sungah gelh in. 20Tu-in ka taklam khut sungah na muh aksi sagihte le kham kibawl meivakna sagihte a khiatna in: Aksi sagihte pen pawlpi sagihte’ vantung mite a cihna hi a, meivakna sagihte pen pawlpi sagihte a cihna ahi hi.

Currently Selected:

MAANGMUHNA 1: TDB

Highlight

Copy