THUKHENTE 3
3
Israel-te Ze-etna Dingin A Kisit Minamte
1Tu-in Israel-te sung panin Kanaan gam sungah galdona a theikha nai lo Israel-te ze-et nadingin Topa in minam pawlkhat a siit hi. 2Tua khang Israel mite in galdona a theih nading, nidangin galdona a thei ngei lo tua bang mite a hilh theih nading bek ahi hi. 3Tua a siit minamte: Filistia ulian ngate, Kanaan mi khempeuh, Sidon mite, le Baalhermon Mual panin Hamath lutna ciang dong Lebanon Mual tungah a teng Hiv mite ahi hi. 4Moses tungtawnin a pu a pate uh a thupiak, Topa’ thupiaknate Israel-te in a mang uh hiam, cih a kitheih nadingin amaute pen Israel-te a kize-etna ahi hi. 5Tua ahih ciangin Kanaan mite, Hit mite, Amor mite, Perez mite, Hiv mite, le Jebus mite’ lakah Israel mite teng uh hi. 6Amaute in a zi dingun a tanute uh la uh a, amau’ tanute a tapate uh tungah a pia uh hi. Amaute in a pasian-te uh a bia uh hi.
Othniel in Kushanrishathaim-te panin Israel Honkhia
7 Topa’ muhna-ah Israel-te a sia gamta-in, Topa amau’ Pasian mangngilh uh a, Baal-te le Asherah milimte a bia uh hi. 8Tua ahih ciangin Israel-te tungah Topa sinso a, amah in Mesopotamia kumpipa Kushanrishathaim tungah amaute a pia hi. Israel mite in Kushanrishathaim’ na kum giat sung a sem uh hi. 9Ahih hangin Topa’ tungah Israel mite kiko uh a, Topa in Kaleb’ naupa Kenaz’ tapa Othniel, amaute a honkhia dingin a khangsak hi. 10Topa’ Kha ama tungah tung a, amah, Israel mite’ thukhen a suak hi. Galsim dingin kuankhia a, Topa in ama khut sungah Mesopotamia kumpipa Kushanrishathaim a pia hi. 11Tua ahih ciangin a gam in kum sawmli sung tawlngakna hun nei hi. Tua ciangin Kenaz’ tapa Othniel a si hi.
Ehud in Moab-te panin Israel Honkhia
12Tua ciangin Topa’ muhna-ah Israel-te a sia gamta kik uh ahih ciangin Topa in Israel-te’ langkhatah Moab kumpipa Eglon thahatsak hi. Bang hang hiam cih leh Topa’ muhna-ah amaute a sia gamta uh hi. 13Eglon in Ammon mite le Amalek mite ama kiangah khawm a, va kuanin Israel-te va zo hi. Amaute in nisuh khuapi a luah uh hi. 14Israel mite in Moab kumpi Eglon’ na kum sawm le giat sung a sem uh hi.
15Ahih hangin Topa’ tungah Israel mite a kiko uh ciangin, Topa in Benjamin mi, Gera’ tapa a veikhoi Ehud, amaute’ honpa dingin a khangsak hi. Israel mite in ama tungtawnin Moab kumpipa Eglon tungah siah a puak uh hi. 16Ehud in ama a dingin langnih a hiam, pi khat le alang a sau namsau khat bawl a, a puannuai a taklam phei tungah tua namsau a khih hi. 17Tua ciangin amah in Moab kumpipa Eglon tungah a siah sung hi. Eglon pen a thau mahmah mi khat ahi hi. 18Ehud in a siahsun’ a man khit ciangin siah a puak mite ciahsak hi. 19Ahih hangin Gilgal kiang suang milimte omna panin amah kileh kikin, “Kumpipa aw, nang tungah gen ding thusim khat ka nei hi,” a ci hi. Tua ciangin amah in, “Gam dai un,” ci-in thu a pia hi. Amah a cing mi khempeuh ama omna panin paikhia uh hi. 20Innkhum zang inndei a votna sungah amah guak tu-in a om laitakin ama kiangah Ehud hong pai hi. Ehud in, “Pasian’ kiang panin nang tungah gen ding thu khat ka nei hi,” a ci hi. Tua ciangin a tutna panin amah dingto hi. 21Tua ciangin Ehud in a veilam khut tawh a taklam phei panin a namsau la-in, tua pa’ gil sungah a siatsuk hi. 22A namsau banah a bul zong tum a, a thau in a namsau tuamcip hi. Bang hang hiam cih leh a gil panin amah in a namsau dok lo a, a ek lawtkhia hi. 23Tua ciangin inndei pua-ah Ehud paikhia-in, innkhumzang inndei kongkhakte amah khaknelhin tuate a kalh hi.
24Amah a paikhiat khit ciangin nasemte hong pai hi. Innkhumzang inndei kongkhakte a kikalh a muh uh ciangin amaute in, “Inn vot sunga inndei-ah awnghawh hi in teh,” ci-in ngaihsun uh hi. 25A cih nading uh a theih loh zah dong uh ngak uh hi. Ahih hangin innkhumzang inndei kongkhak amah in a hon loh veve ciangin, amaute in a tawhtang la-in hong uh a, sual tungah a topa uh na si hi.
26Amau’ zia kikalin Ehud tai-in suang milimte kheng a, Seirah-ah a tai hi. 27Amah a tun ciangin Efraim mualtung gamah peengkul a gingsak hi. Mualtung gam panin Israel mite amah tawh paisuk uh a, amau’ lutangin Ehud a nei uh hi. 28Amah in amaute kiangah, “Ka nung hong zui un. Bang hang hiam cih leh Topa in na gal uh Moab mite na khutsung uhah hong piazo hi,” a ci hi. Tua ahih ciangin ama nungah amaute paisuk uh a, Moab mite kiang panin Jordan ngahmunte la-in, mi khat zong galkahsak lo uh hi. 29Tua hunin amaute in a thahat a siam Moab mite khempeuh, mi tul sawm bang that uh a, mi khat zong suakta lo hi. 30Tua ahih ciangin tua ni-in Moab gam pen Israel-te’ khutnuai a suak hi. Tua gam in kum sawmgiat sung tawlngakna a nei hi.
Shamgar in Filistia mite panin Israel Honkhia
31Ama khit ciangin Anath’ tapa Shamgar hi a, ciangkhut zum tawh Filistia mite zaguk a that pa ahi hi. Amah in zong Israel-te honkhia hi.
Currently Selected:
THUKHENTE 3: TDB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.