HEBRU 3

Moses Sangin Jesuh Lianzaw

1Tua ahih manin Pasian’ sapna a ngah mi siangthote aw, eite’ upna thu tawh kisai-ah Siampi Lianpen a sem dingin Pasian’ sawltak Jesuh’ thu ngaihsun dih un. 2Pasian’ inn sungah na a sepna-ah Moses a cihtak mah bangin hih siampi nasep a sem dingin a seh Pasian’ tungah Jesuh a citak hi.#Gam 12:7. 3Ahi zongin inn a lam pa pen a inn sangin a minthanzawk mah bangin Moses sangin Jesuh pahtawizawk ding ahi hi. 4Inn khempeuh a lam na om ciat sam a, ahi zongin na khempeuh a piangsak pa pen Pasian ahi hi. 5Moses pen nasem khat hihna tawh Pasian’ inn sungah thu khempeuhah citak a, mailam hunah Pasian in a gen ding thute a gen hi. 6Ahi zongin Khrih pen Pasian’ innsung a uk Tapa ahihna tawh a citak ahi hi. I lametna thu tawh kisai-in lungsim hanna le muanna tawh i omsuak nakleh eite pen Pasian’ inn ihi hi.

Pasian’ Mite a’ ding Tawlngakna

7Tua ahih ciangin Lai Siangtho sungah,

“Tu ni-in Pasian’ aw na zak uhleh

8gamlakah na om lai-un amah ze-etin,

Pasian na lehdo lai hun uh bangin

na lungsim uh khauhsak nawn kei un.

9Na pu na pate un kum sawmli sung

ka nasepnate mu napi-in

kei hong ze-et veve uh hi.

10Tua ahih manin

amaute tungah ka heh a,

‘Amaute citak lo niloh uh a,

ka thukhamte zui nuam lo uh hi,’ ka ci hi.

11Ka heh manin ka kiciam a,

‘Ka tawlngakna munah hong pai-in

kei tawh hong tawlnga khawm

ngei lo ding uh hi,’ ka ci hi,”

na ci hi.#La 95:7-11.

12Sanggamte aw, a nungta Pasian kiang panin a paikhia zah dingin thu um lo, a gilo na omkhak loh nadingun na kingaihsun un. 13Lai Siangtho in, “Tu ni,” a cih pen eite tungah zong hong cihna hi lai ahih manin mawhna’ khemsa-in ta-in na lungsim uh na khauhsakkhak loh nadingun khatlekhat kihanthawnin na kihuhzaw un. 14A kipat tungin i neih lungmuanna kiptakin i let ciat nakleh i vekpi-in Khrih tawh pawlkhat ihi hi.

15Lai Siangtho in,

“Tuni-in Pasian’ aw na zak uhleh

Pasian na lehdo lai uh hun bangin

na lungsim uh khauhsak nawn kei un,”

na ci hi.#La 95:7-8.

16Pasian’ aw za napi-in amah a lehdo kuate ahi hiam? Moses in Egypt gam panin a paikhiatpih mi khempeuh ahi uh hi. 17Kum sawmli sung kuate tungah Pasian heh ahi hiam? Mawhna bawlin, gamlakah a si mite tung ahi hi. 18Thupi takin Pasian kiciamin, “Ka tawlngakna munah hong pai-in, kei tawh tawlnga ngei lo ding uh hi,” a cih ciangin kuate a cih nopna ahi hiam? Amah a lehdote a cihna ahi hi.#Gam 14:1-35. 19Tua ahih manin a up lohna uh hangin tawlngakna munah a lutzawh lohna uh i thei hi.

Currently Selected:

HEBRU 3: TDB

Highlight

Copy