2 KUMPI NIHNATE 21
21
Judah Kumpi Manasseh’ Ukna
(2Khang 33:1-20)
1Manasseh in uk ding a kipatin kum sawm le nih pha a, amah in Jerusalem-ah kum sawmnga le nga sung a uk hi. Ama nu’ min Hefzibah ahi hi. 2Topa in Israel mite’ mai-ah a hawlkhiat minamte’ gamtatna a kihhuaite mah bangin Topa’ muhna-ah amah a sia gamta hi.#Jer 15:4. 3Bang hang hiam cih leh amah in a pa Hezekiah’ suksiatsa mualtung a biaknate lamkik hi. Tua ciangin amah in Baal a dingin biakna taute phut a, Israel kumpi Ahab’ bawl bangin Asherah milim khat bawl a, vantung a om nate khempeuh bia-in tuate’ na a sem hi. 4Tua ciangin Topa in, “Jerusalem-ah ka min ka koih ding hi,” a cihna Topa’ biakinn sungah amah in biakna taute lam hi.#2Sam 7:13. 5Tua ciangin amah in Topa’ biakinn tual nihte tungah vantung a om nate khempeuh a dingin biakna taute a lam hi. 6Tua ciangin amah in biakna-in a tapa hal a, aisanna le mailam thugen kholhnate semin, vankah theite le aisante tawh na semkhawm hi. Topa’ muhna-ah amah a sia tampi gamta a, amah hehsak hi. 7-8Tua ciangin Topa in David le a tapa Solomon tungah, “Israel minam khempeuh sung panin ka teelkhiat hih biakinn sung le Jerusalem-ah ka min ka koih tawntung ding hi. Amaute ka thupiaksa khempeuh tawh kizui, le ka nasempa Moses in amaute a piak thukham khempeuh tawh kizui-in gamtat ding a kingaihsut nak-uhleh, a pu a pate uh tungah ka piak gam sungah Israel mite mi vakvai ka hisak nawn kei ding hi,” a cihna biakinn sungah amah in ama bawlsa a kiseek Asherah milim a koih hi.#1Kum 9:3-5; 2Khang 7:12-18. 9Ahih hangin amaute in thu ngai lo uh a, Topa in Israel-te’ mai-ah a suksiat minamte’ gamtatna sangin a siahuaizaw a gamtat nadingun Manasseh in amaute a zol hi.
10Tua ciangin Topa in kamsangte ahi a nasemte’ tungtawnin gen a, 11“Judah kumpipa Manasseh in hih a kihhuai nate sem a, ama ma-a Amor mite’ gamtatna sangin a siazaw-in na semin a milimte tawh Judah mite zong khialsak khin hi. 12Tua ahih ciangin Israel Pasian Topa in hih bangin ci hi: En un, a za mite khempeuh’ bilte a vut ding siatna Jerusalem le Judah tungah ka tungsak ding hi. 13Keimah in Samaria le Ahab le ama suante gim ka piak bangin Jerusalem tungah gimna ka tungsak ding hi. Tua ciangin mi khat in pakan a nul bangin keimah in Jerusalem nulin ka lumlet ding hi. 14Tua ciangin keimah in ka mi a omlaite paaikhia-in amau’ galte tungah ka pia ding a, amaute pen a galte’ mat ding mi le vankiate suak ding uh hi; 15bang hang hiam cih leh a pu a pate uh Egypt panin hong paikhiat a kipan tuni dongin keima muhna-ah a sia gamta-in kei hong hehsak uh hi,” a ci hi.
16Tua tham loin Topa’ muhna-ah amaute a sia a gamtat nadingun amah in Judah mite a khialhsak banah, Jerusalem mong khat pan mong khat sisan tawh a kidimsak dongin Manasseh in mawhna baang lo mi tampi a that hi.
17Manasseh’ sepna a omlaite, a hih khempeuh, le ama hihsa a khialhna, Judah Kumpite’ Khang Tangthu Laibu sungah kigelh hi. 18Tua ciangin Manasseh si a, Uzza’ huansung, ama inn huan sungah kivui hi. Tua ciangin ama tangin a tapa Amon in a uk hi.
Judah Kumpi Amon’ Ukna
(2Khang 33:21-25)
19Amon in uk ding a kipatin kum sawmnih le nih pha a, amah in Jerusalem-ah kum nih sung uk hi. Ama nu’ min Meshullemeth hi a, Jotbah khuami Haruz’ tanu ahi hi. 20A pa Manasseh’ gamtat bangin Topa’ muhna-ah amah a sia gamta hi. 21Amah in a pa’ khekhap khempeuh tawn a, a pa in a na a sepsak milimte’ na mah semin tuate a bia hi. 22Amah in a pu a pate’ Pasian, Topa nusia a, Topa’ lampi tawn lo hi. 23Tua ciangin Amon’ nasemte in amah sawmsim uh a, ama inn sungah kumpipa a that uh hi. 24Ahih hangin tua gammite in Kumpi Amon a sawmsimte khempeuh that leuleu uh a, tua ciangin tua gammite in ama tangin a tapa Josiah kumpi-in a koih uh hi. 25Tu-in Amon’ hihsa a gamtatna a omlaite pen Judah Kumpite’ Khang Tangthu Laibu sungah kigelh hi. 26Tua ciangin Uzza’ huansung ama hanah amah kivui a, ama tangin a tapa Josiah in a uk hi.
Currently Selected:
2 KUMPI NIHNATE 21: TDB
Highlight
Copy
Compare
Share
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
