2 KHANG TANGTHU NIHNATE 5
5
1Tua bangin Topa’ biakinn ding a hih nasep khempeuh kizo hi. Tua ciangin a pa David in a apsa nate Solomon in paipihin, Pasian’ biakinn sung vanmanpha koihnate sungah a ngunte, a khamte, le umlebeel khempeuh a seng hi.#2Sam 8:11; 1Khang 18:11.
Solomon in Thuciamna Singkuang Biakinn sungah Paipih
(1Kum 8:1-11)
2Tua ciangin Zion a kici David khuapi sung panin Topa’ Thuciamna Singkuang a paipihto dingin Kumpi Solomon in Israel upate, minam lutang khempeuh, le Israel beh makaite, Jerusalem-ah kaikhawm hi.#2Sam 6:12-15; 1Khang 15:25-28. 3Tua ciangin a kha sagihna-a pawi hun sungin kumpipa’ mai-ah Israel mi khempeuh kikhawm uh hi. 4Tua ciangin Israel upate khempeuh hong pai uh a, Levi mite in Thuciamna Singkuang la uh hi. 5Tua ciangin amaute in Thuciamna Singkuang, le kikhopna buk, le puanbuk sunga om a siangtho umlebeel khempeuh puato uh a, siampite le Levi mite in tuate puato uh hi. 6Tua ciangin Kumpi Solomon le ama mai-ah a kikhawm Israel-te khempeuh Thuciamna Singkuang mai-ah om uh a, biakna-in tuu le bawngtal tampi tak pia uh ahih manin a phazah kisim zo lo hi. 7Tua ahih ciangin siampite in kherub-te’ kha nuai, siangtho pen mun sung, biakinn sungnung sung ama munah Topa’ Thuciamna Singkuang a paipih uh hi. 8Kherub-te in Thuciamna Singkuang tungah a khate uh zak uh ahih manin kherub-te pen Thuciamna Singkuang le a zawlte tungah khuhna khat a suak uh hi. 9A zawlte sau ahih manin siangtho mun panin biakinn sungnung mai-ah a mongte kidawk a, ahih hangin a pualam panin kimu thei lo hi; tuni dongin tua lai-ah tuate om hi. 10Egypt panin amaute hong paikhiat lai-in Topa in Israel mite tawh thuciamna a bawlna mun Horeb-ah Moses in suangpek nihte a koih simloh Thuciamna Singkuang sungah bangmah dang om lo hi.#Thkna 10:5. 11Siangtho mun panin siampite hong pusuakin (bang hang hiam cih leh amau’ pawlte cihtuam om loin tua lai-a om siampite khempeuh amau mahmah kisiansuah uh hi. 12Tua ciangin Levi mi lasate Asaf, Heman, le Jeduthun, amau’ tapate le a behte, saihadial puan tawh kizemin, daltuahte, harp lasaknate, le laiza lasaknate tawi-in peengkul tum siampite za le sawmnih tawh biakna tau nisuahna lamah ding khawm uh hi. 13Aw kikhatin phatin Topa’ tungah lungdam koh ding pen peengkul tumte le lasate’ nasep ahi hi) peengkulte le daltuahte le adang lasaknate tawh,
“Topa’ tungah
lungdam koh ding hoih hi;
bang hang hiam cih leh
ama itna kip tawntung hi,”
ci-in Topa phatna-in la a kisak ciangin, Topa’ biakinn sung meii tawh kidim a,#1Khang 16:34; 2Khang 7:3; Ezr 3:11; La 100:5; 106:1; 107:1; 118:1; 136:1; Jer 33:11. 14meii hangin siampite in na sem zo lo uh hi; bang hang hiam cih leh Topa’ minthanna vangtaang Pasian’ biakinn sung a dim hi.#Pai 40:34-35.
Currently Selected:
2 KHANG TANGTHU NIHNATE 5: TDB
Highlight
Share
Compare
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
