2 KHANG TANGTHU NIHNATE 36
36
Judah Kumpi Jehoahaz’ Ukna le A Zakiatna
(2Kum 23:31-35)
1Tua gam mite in Josiah’ tapa Jehoahaz la-in Jerusalem-ah a pa’ tangin kumpi-in a koih uh hi. 2Jehoahaz in uk ding a kipatin kum sawmnih le thum pha a, amah in Jerusalem-ah kha thum sung uk hi. 3Tua ciangin Egypt kumpipa in Jerusalem-ah amah zakiasak a, siah ngun talen zakhat le kham talen khat, tua gam kipiasak hi. 4Tua ciangin Egypt kumpipa in Judah le Jerusalem tungah a ukin Jehoahaz’ sanggampa Eliakim koih a, ama min Jehoiakim-in kheelsak hi. Ahih hangin Neko in a sanggampa Jehoahaz la-in Egypt-ah a paipih hi.#Jer 22:11-12.
Judah Kumpi Jehoiakim’ Ukna
(2Kum 23:36-24:7)
5Jehoiakim in uk ding a kipatin kum sawmnih le nga pha a, amah in Jerusalem-ah kum sawm le khat sung uk hi. Topa a Pasian mai-ah amah a sia gamta hi.#Jer 22:18-19; 26:1-6; 35:1-19. 6Babylon kumpipa Nebukhadnezzar amah a simin hong kuanto a, Babylon-ah a paipih dingin amah kol bulh hi.#Jer 25:1-38; 36:1-32; 45:1-5; Dan 1:1-2. 7Nebukhadnezzar in Topa’ biakinn-a umlebeel pawlkhatte zong Babylon-ah pua-in Babylon-a a kumpi inn-ah tuate a koih hi. 8Tu-in Jehoiakim’ gamtatna a omlaite, le ama hih a kihhuaite, le amah a hoih lohna a kimute, Israel le Judah Kumpite’ Tangthu Laibu sungah kigelh hi. Tua ciangin a tapa Jehoiakhin in ama tangin a uk hi.
Judah Kumpi Jehoiakhin Galmatin Babylon-ah Kila
(2Kum 24:8-17)
9Jehoiakhin in uk ding a kipatin kum sawm le giat pha a, amah in Jerusalem-ah kha thum le ni sawm sung uk hi. Topa’ muhna-ah amah a sia gamta hi. 10Tua kum khuakhal sungin Kumpi Nebukhadnezzar in mi sawlin Topa’ biakinn-a umlebeel manphate tawh amah Babylon-ah lasak a, Judah le Jerusalem tungah Jehoiakhin’ sanggampa Zedekiah kumpi-in a koih hi.#Jer 22:24-30; 24:1-10; 29:1-2; 37:1; Jer 37:1; Ezk 17:12-13.
Judah Kumpi Zedekiah’ Ukna
(2Kum 24:18-20; Jer 52:1-3)
11Zedekiah in uk ding a kipatin kum sawmnih le khat pha a, amah in Jerusalem-ah kum sawm le khat sung uk hi.#Jer 27:1-22; 28:1-17. 12Topa a Pasian’ muhna-ah amah a sia gamta hi. Topa’ kammal a gensawn kamsang Jeremiah mai-ah amah kiniamkhiat lo hi.
13Pasian tawh amah a kiciamsak kumpi Nebukhadnezzar zong amah in lehdo hi. Israel Pasian, Topa’ kiang zuankik nuam lo a, zong kisik nuam loin a lung khauhsak hi.#Ezk 17:15. 14A makai siampite le mi khempeuh zong tua bangmahin citak lo mahmah uh a, minam dangte’ kihhuainate zui uh hi. Amah in Jerusalem-ah a siangtho-in a koih Topa’ biakinn amaute in ninsak uh hi. 15A mite le ama tenna mun khasiat ahih manin amau’ pute pate’ Pasian, Topa in a kamtaite amaute kiangah sawl teitei hi. 16Ahih hangin a mite tungah Topa a heh ciang dong, a hehna a kidamsak zawh nawn loh ciang dongin amaute in Pasian’ kamtaite zahpihin, a thute simmawhin, a kamsangte thusim lo niloh uh hi.
Judah a Kilakna
(2Kum 25:8-21; Jer 39:8-10; 52:12-30)
17Tua ahih ciangin Topa in Khaldea mite’ kumpipa amaute’ langkhatah paipih a, tua kumpipa in amau’ Pasian’ biakinn sung nangawnah namsau tawh a tangvalte uh that a, numei pasal, a moi a ham, a dam a na, kuamah khasiat lo hi. Pasian in a vekpi-in ama khut sungah a pia hi.#Jer 21:1-10; 34:1-5. 18Tua ciangin Topa’ biakinn-a umlebeel khempeuh a lian a neu, le Topa’ biakinn-a vanmanphate, le kumpipa le a uliante’ vanmanphate khempeuh amah in Babylon-ah paipih hi. 19Tua ciangin amaute in Pasian’ biakinn halin Jerusalem khua susia uh a, a kumpi inn khempeuh mei tawh halin umlebeel a manpha khempeuh a susia uh hi.#1Kum 9:8. 20Amah in namsau panin a suakta mite Babylon-ah salin la a, Persia kumpi in a uk hun mateng amah le a suanlekhakte’ nasem a suak uh hi. 21Tua sungin Israel leitang in a sabbath-te a kicingin na tang hi. Kamsang Jeremiah tungtawnin Topa’ thugen a tun nadingin kum sawmsagih a cin nadingin leitang a kinusiat sung khempeuh leitang in sabbath tawlngakna a nei ahi hi.#Jer 25:11; 29:10.
Sairas’ Taangkona
(Ezr 1:1-4)
22Tu-in Persia kumpipa Sairas’ kum khatna kumin, Jeremiah’ kam pana Topa’ thugen a tun theih nadingin, Topa in Persia kumpipa Sairas’ lungsim hanthawn a, amah in a kumpi gam sung khempeuhah taangkona khat bawl a, lai-in zong a gelh hi. A lai gelhna-ah,
23“Persia kumpipa Sairas in hih bangin ci hi: ‘Vantung Pasian, Topa in leitung kumpi gam khempeuh kei hong pia khin a, Judah gam sung Jerusalem khua-ah ama a dingin biakinn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih tahen. Biakinn lam dingin Jerusalem-ah amaute paito sak un,’ ci hi,” a ci hi.#Isa 44:28.
Currently Selected:
2 KHANG TANGTHU NIHNATE 36: TDB
Highlight
Copy
Compare
Share
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
