रोमि 9
9
माङ्हाङ्ङा सेगुचिगा याप्मिचि
1आङा माप्मा कोलुङ्ना रिङ् छेम्बाना॥ आङा खिरिस्टङाना ओयाप्मि हिट्नुङ् माङ्जो चेक्निङ्ना॥ सेङ्सेङ्ना हाङ्साङा आङाना मिप्माना बोल् आधिन् चोगुटु, हिट्नुङ् आङा माङ्जो चोक्निङ्ना नुङ् आङाना मिप्माना बोल्ङा याङ्लोयुक्॥ 2आङाना याहुदि याप्मिचि लाउङ्सा याङ्छामाङा आनिङ्ग्वा टुग्ना हिट्नुङ् आड्डिक् सानिङ्ग्वा लिङाना॥#९:२ पावालङाना याप्मा याहुदि ओसाइबाचिङा येसु डोक् खिरिस्ट नुङ् बिस्वास ओचोग्वाटुन् नुङ् उनिङ्ग्वा टुगे हिट्नुङ् निरास लिसे॥ 3आङाना आप्पे इस्राइलि याप्मिचि छोङ्बाचिङा मुक्टि टोक्मा उहिडुना बे आङा माङ्हाङ्ङाना साराप आङ्मा हिट्नुङ् खिरिस्टलाम्मा साम्मा चा निङ्ग्वा चोगुङ्टुङ्॥ 4हिट्नागा इस्राइलि याप्मिचि ए॥ हिट्नुङ् माङ्हाङ्ङा आप्पे ओछालेट्चि चोक्मा सेगुचे, हिट्नुङ् हिट्नागा उन्ङाना माहिमा निमेट्टुचे॥ हिट्नागालोक् माङ्हाङ्ङा माङ्हुप् चोगुए हिट्नुङ् धारमाबिधि चा पिडुचे॥ हिट्नुङ् माङ्हाङ्ङा हिट्नागा खोड्डे पारिक् उन्ङाना सेवा चोक्माना हिट्ना हिसिक्टुचे, हिट्नुङ् हिट्नागा लाउङ्सा जोम् थोक्चि चोक्माबिमाचिगा उन्ङा बाचा चोगुए॥ 5हिट्नागा याप्मिचि आनि टुबाठेबाचि आब्राहाम, इसाहाक, हिट्नुङ् याकुबङागा छालेट्चि ए॥ खिरिस्ट आप्पे चा हिट्नागा इस्राइलि छोङ्बाचिङि डोक् पोङ्से॥ उन् डोक् सोब्बे नुङ्ना माङ्ठेना माङ्हाङ् ए, उन्ङाना डोक् उनिङ् सोरोक् टो-टो चोन्डुम्॥ आमेन्॥
6हाट्ले माङ्हाङ्ङा उन्ङाना बाचा इस्राइलि याप्मिचिङि पुरो चोग्वाट्टुन् नुङ् आङा माट्टुङ्ना माखाक्, टरो आङा माप्मा कोलुङ्ना रिङ्म्बाक् इस्राइलि छोङ्बाङि ओपोङ्सागा सोब्बे याप्मिचि माङ्हाङ् ओयाप्मिचि उलिनिगा॥ 7हिट्नुङ् आब्राहाम उपुङ्लाङिगा सोब्बे याप्मिचि उन्ङाना छेम्बागा ओछालेट् उलिनिगा॥ टरो माङ्हाङ्ङा आब्राहाम लोडुए, “आङा चामारसिङा चोगुङ्ना आप्पे काइछा इसाहाकलाम्मा एडोक् काछालेट्चि उलियुक्॥”#९:७ ना बेला आब्राहामङाना पाइले डोक् ठिबाङ् इस्माएल ओलोडुना उइछा डाना, टरो माङ्हाङ्ङाना चामारसिङा इस्माएललाम्मा माखाक् टरो उइछा इसाहाकलाम्मा पुरो लियुक्॥ #उत्पति २१:१२ 8हिड्डेउङ् आब्राहामलाम्मा ओपोङ्सागा सोब्बे छालेट्चि#९:८ आब्राहामलाम्मा ओपोङ्सागा सोब्बे छालेट्चि ना रिङ्ङा आब्राहाम ओटालिमाङ् हागार ओलोडुना मेन्झेमालाम्मा ओपोङ्सागा इस्माएलङाना ओछालेट्चि नुङ् बुजा लियुक्॥ गालाति ४:२२-२३ माङ्हाङ् ओछालेट्चि उलिनिगा, टरो बाचालाम्मा ओपोङ्सागा छालेट्चि एडोक् आब्राहाम ओछालेट्चि उलियुक्॥ 9पोङ्भोने माङ्हाङ्ङा आब्राहाम नाड्डे बाचा चोगेसुना, “आरको बारखा ना बेला आङा नोक्ङा उङ्ङा, हिट्नुङ् कापाङ्ढाङ्मा साराङाना ठिबाङ् येम्बेछा छा लियुक्॥”#उत्पति १८:१०
10हिड्डे एडोक् माखाक्, केप्छेरेक् येम्बेछा छाचि पोङ्सुचिगा रिबेका चा माङ्हाङ्ङा पाक्ना पाक् रिङ्उम् लोडुए, हिट्नागाचिगा पाबाम्बाक् आनि टुबाठेबा इसाहाक डाना॥ 11-13टरो नागाचि केप्छेरेक् ओओचि पोङ्मा पाइले हिट्नुङ् हिट्नागाचिङा ओचेट्नुना टोॽवा आथाबा ओचाफेन्ना टोॽवा चोक्मा पाइले डोक् माङ्हाङ्ङा रिबेका लोडुए, “तुम्सामिङा योङ्बिछाङाना सेवा चोगुटु॥”#उत्पति २५:२३ धारमाछाप्लाङि नाड्डे छेप्टि गाड्डे, “आङा याकुब माया चोगुङ्ङे, टरो एसाबम्बाक् चिम्माफुट्टुङ्ङे॥”#मालाकि १:२-३ हिट्नाडेउङ् माङ्हाङ्ङा खोना चा याप्मि उन्चि टोॽवा पुयुङ् सेगुन्चिन्गा, टरो माङ्हाङ्ङा आप्पे उनिङ्ग्वा गाड्डे सेगुचिचि नुङ् उन्ङा पाक्का चोगुए॥
14हाट्ले आनि पाक् माट्टुम्ना टे? पाक् माङ्हाङ्ङा आन्याए चोगुटुनि टे? हिट्डे चोक्निना॥ 15पोङ्भोने माङ्हाङ्ङा मोसा नाड्डे लोडुए, “जुन् याप्मि आङा माया चोक्मा निङ्ग्वा चोगुङ्टुङ्, हिट्ना माया चोगुङ्टुङ्, हिट्नुङ् जुन् याप्मि आङा लुक्माटुक्मा निङ्ग्वा चोगुङ्टुङ्, हिट्ना आङा लुक्मा टुक्टुङ्टुङ्॥”#पारस्थान ३३:१९ 16हिट्नाडेउङ् याप्मिङा उन्ङा निङ्ग्वा चोगुङ् आथाबा आप्पे कोसिस चोगुनाँ माङ्हाङ्ङा सेगुना माखाक्, टरो माङ्हाङ्ङा दाया चोगुनाँ सेगुना ए॥ 17धारमाछाप्लाङि ठिबाङ् फारो हाङ्बा बारेङि नाड्डे छेप्टेसे, “खान् आङाना बोल् निमेट्मा हिट्नुङ् ख्वाप्पा नारा टेप् याप्मिचिङा आनिङ् पारचार चोक्माना उदेसेङा खान् आङा हाङ्बा चोक्नाना ए॥”#पारस्थान ९:१६ 18हिट्डेउङ् माङ्हाङ्ङा दाया चोक्मा निङ्ग्वा चोगुचिगालाउङ्सा दाया चोगुचिचि, हिट्नुङ् निङ्ग्वा काठोर चोक्मा निङ्ग्वा चोगुचिगालाउङ्सा काठोर डोक् चोगुचिचि॥
कुँमाले हिट्नुङ् भाँडा
19खानि माड्डे कोइङा आङा नाड्डे लोमा आहिडिटिङा, “हिट्डे भोने माङ्हाङ्ङा हाट्ले चा पोङ् फाट्टुर याप्मिलाप्युक्ना टे? पोङ्भोने माङ्हाङ्ङा निङ्ग्वा चोगुगा रिङ् चोक्मा खोनाङा चा बिरोध चोक्मा उहिडुन्ना॥” 20टरो हाउ याप्मि, खान् साइना माङ्हाङ्ङा चोगुना रिङ् बिरोध काचोक्? खाम्ङाना भाँडाङा हिट्ना चोगुना याप्मि “पोङ् खान्ङा आङा नाड्डे पाराना याङ्आचोगेना” नुङ् लोडुटुनि टे?#यासैया २९:१६; ४५:९ 21कुमालेङा फोडुना खाम्लाम्मा उन्ङा निङ्ग्वा चोगु गाड्डेना भाँडा चोक्मा हिडुटु॥ हिट्ना फोडुना खाम्लाम्मा ठिक् ओचेट्नुना भाँडा चाडाबाडाङि चालाँ चोक्माउङ्सा चोक्मा हिडुटु भोने, हिट्ना खाम्लाम्मा डोक् आरको माङ्जोसिङ्जोना चा आरु थोक् युङ्मा लाउङ्सा चोक्मा हिडुटु॥#यारमिया १८:१-१०; २ तिमोथि २:२०-२१
22हिट्डे पारा डोक् माङ्हाङ्ङा उन् लाउङ्सा ओयाग् लेप्मा कामेट् याप्मिचि लोक् जाखाम् लिमालाउङ्सा टेयार उलिसागा याप्मिचिलाउङ्सा उन्ङाना ओयाग् लोक् ओबोल् निमेट्मा निङ्ग्वा चोगुए, टरो हिट्ना साट्टोङि उन् आड्डिक् धैइरे चोगाउङ् हिट्नागा आङ्डुएसुचे॥ 23हिट्नुङ् माङ्हाङ्ङा खोनालाउङ्सा दाया चोगुचिचि हिट्नुङ् पाइले डोक् उन्ङाना माहिमा टोक्मा टेयार चोगुचिगा याप्मिचि लाउङ्सा उन्ङाना बाहुमुल्ले माहिमा निमेट्मा उन्ङा नाड्डे चोगुए॥ 24पोङ्भोने उन्ङाना माहिमा टोक्मा आछेम्डागा याप्मिचि आनि डोक् ए॥ उन्ङा याहुदि याप्मिचि एडोक् माखाक् टरो पानिछोङ्बा याप्मिचि चा छेम्डुचे॥ 25माङ्हाङ्ङा माट्टुना रिङ् होसे ओलोडुना माङ्काटाङा धारमाछाप्लाङि नाड्डे छेप्टुएसुए–
“हिट्नागा आयाप्मिचि माखाक् नुङ् चा, हाट्ले आङा हिट्नागा आयाप्मिचि चोगुङ्चिङ्चिङ्॥
पाइले हिट्नागा आङा माया चोक्नेट्निङ्चिङ्, हाट्ले आङा हिट्नागा माया चोगुङ्चिङ्चिङ्॥”#होसे २:२३
26हिट्नुङ्,
“हिट्ना ठोङ्ङि आङा हिट्नागा लोडुङ्चिङे, ‘खानि आयाप्मिचि माखाक्’
टरो हिट्नि डोक् याप्मिचिङा हिट्नागा ‘खानि उहिङ्ग्वाट् माङ्हाङ्ङा उइछाचि ए’ नुङ् ओलोडुचिचि॥”#होसे १:१०
27हिट्नुङ् यासैया माङ्काटाङा इस्राएलि याप्मिचि बारेङि नाड्डे माट्टुटु,
“इस्राएलङिगा याप्मिचि सामुन्दराङिना खाम्सेरेक् टेप् जोम् उलि चा हिट्नागा माड्डे खाट्टिप्मा एडोक् माङ्हाङ्ङा हिङुचिचि॥
28पोङ्भोने टाङ्बाङा नाराङिगा याप्मिचि एला डोक् साजाए पिडुचिउङ् ओटोॽवा पुरो चोगुटु॥”#यासैया १०:२२-२३
29यासैया माङ्काटाङा नाड्डे चा माट्टुएसुए,
“आड्डिक् बोल्लेउ टाङ्बाङा आनि लाउङ्सा खोना चा ओछालेट्चि उहिङ्ग्वाट् युङ्सुवाट्टुन्नाँ बे
आनि सादोम लोक् गामोराङिगा याप्मिचि गाड्डे डोक् जाम्मै जाखाम् लिसिए बे॥”#यासैया १:९
इस्राएलि याप्मिचिगा आबिस्वास
30हिट्डे भोने आन्याँ पाक् माट्टुम्माना टे? नाड्डे माप्मा हिडुम्टुम्, पानिछोङ्बाचिङा माङ्हाङ् सोरि धारमोति लिमा ओकोलुवाट्टुन्, टरो हिट्नागाँ बिस्वास ओचोगुनाँ माङ्हाङ्ङा हिट्नागा धारमोति चोगुचे॥ 31टरो इस्राएलि याप्मिचिङा धारमाबिधि पालान् ओचोगुङ् माङ्हाङ् सोरि धारमोति लिमा इम्टेप्मा कोसिस ओचोगुए, टरो धारमोति लिमा उहिनेट्नि॥ 32पोङ् हिट्नागा धारमोति लिमा उहिनेट्निगा टे? पोङ्भोने हिट्नागाँ आप्पे उन्चि टोॽवालाम्मा धारमोति लिमा उइट्टुए, टरो बिस्वासलाम्मा धारमोति लिमा हिट्नागाँ ओकोलुवाट्टुन्॥ हिट्नुङ् हिट्नागा लाउङ्सा खिरिस्टउम्बाक् लाम्बोङि टोक्टिना लिङ्गेॽवा गाड्डे डोक् लिसे॥ 33ना लुङ्गेॽवा बारेङि धारमाछाप्लाङि पाइले डोक् नाड्डे छेप्टेसाना–
“खेम्सानुम्, आङा सियोन झोन्झोबोङि ठिक् लिङ्गेॽवा युङ्सुङ्टुङ्, हिट्ना लुङ्गेॽवाङि याप्मा याप्मिचि ओटोक्युङ् ओकोयुक्,
टरो जुन्ङा हिट्ना लुङ्गेॽवाङि बिस्वास ओचोगुटु हिट्नागा खोना बेला चा मोन्डिसिइना रिङ्ङि ओठानिगा॥”#यासैया २८:१६#९:३३ ना सियोन झोन्झोबाम्बाक् याहुदिचिगा आड्डिक् निङ् मुक्टाना यरुसलेम खालाङ्गा ए॥ ना लुङ्गेॽवा येसु खिरिस्ट नुङ् बुजा चोगुम्टुम्, उन्ङि डोक् हिट्नागा याप्मिचि ओटोक्युङ् ओकोयुक्॥ पोङ्भोने माङ्हाङ् उइछा येसु याप्मिचिगा पाप साजाए पिमा उन्ङा पाङ्सुना रिङ् हिट्नागाँ बिस्वास मिचोक्माम्बाक् मोन्डिसिइना रिङ् लिसे॥
Currently Selected:
रोमि 9: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
