रोमि 7
7
भ्याङाना बारे
1आम्भु-आन्झाचि हिट्नुङ् आनो-आन्झाचि, आङा खानि धारमाबिधि आनिसुम्गालोक् चेक्ङेट्ङा॥ धारमाबिधिङाम्बाक् याप्मि उहिङ्ग्वाट् लिलोक् सोम्मा एडोक् आधिन् चोगुटु नुङ् खानिलाउङ्सा ठाहा युङ्ग्वा॥ 2हाट्ले आङा भ्या बारेङि माट्टुङ्टुङ्, ठिबाङ् भ्या लिसाना मेन्झेमा ओपाङ्डाङ्बा हिङ्लोक् सोम्मा भ्या बान्धान्ङि डोक् लियुक्, टरो ओपाङ्डाङ्बा सिए भोने हिट्ना भ्याङाना बान्धानलाम्मा छुट्कारा टोगुटु॥ 3हिट्डेडोक् हिट्ना मेन्झेमाङा ओपाङ्डाङ्बा उहिङ्ग्वाट् वाना बेला डोक् आरको येम्बेछालोक् भ्या चोगुटु भोने, हिट्ना मेन्झेमाङा इम्मेप्माजामा टोॽवा चोगुटु॥ टरो ओपाङ्डाङ्बा सिए भोने हिट्नाँ भ्याङाना बान्धानलाम्मा छुट्कारा टोगुटु, हिट्नुङ् आरको येम्बेछालोक् भ्या चोगुए भोने चा इम्मेप्माजामा टोॽवा चोगुन्ना॥ 4हिट्नाडेउङ् आम्भु-आन्झाचि हिट्नुङ् आनो-आन्झाचि, खानिङा धारमाबिधि पालान् चोक्माना रिङ्लाम्मा छुट्कारा आटोगुएसुम्मे, पोङ्भोने खिरिस्ट खाप्चेङि सियानाँ खानि चा खिरिस्टलोक् आसिइए॥ हिट्नुङ् हाट्ले माङ्हाङ् लाउङ्सा आनि ओचेट्नुना टोॽवा चोक्मा उहिडुम् नुङ् सियाउङ् उहिङ्ग्वाट् लिसाना खिरिस्टलोक् आनि सोब्बे एक्केउ लिसेसिए॥ 5पाइले आन्याँ येम्ङिना निङ्ग्वा गाड्डे चोगुमुङ् वासिङे, हिट्नुङ् धारमाबिधिङा ओचाफेन्गा रिङ् चोक्मा निङ्ग्वा पोसुए॥ हिट्डेउङ् आनिना नाड्डेना ओचाफेन्ना टोॽवाङा आनि सिमा कोन्ना लिसे हिट्नुङ् माङ्हाङ्लाम्मा लाप्माङ् लिसिए॥ 6टरो हाट्ले पाइला आनि आधिन्ङि आचोगोना धारमाबिधिलाम्मा छुट्कारा टोगुएसुम्मे, पोङ्भोने आनि खिरिस्टलोक् एक्केउ सिइए॥ हाट्ले आन्याँ पाइले छेप्बालाक् धारमाबिधिङाना पारा माङ्हाङ्ङाना सेवा चोक्निम्माना, टरो सेङ्सेङ्ना हाङ्सालाम्मा ओछोङ्ग्वाट् पारा सेवा चोगुम्टुम्मा॥
धारमाबिधि लोक् पाप
7हिट्डे भोने आनि पाक् रिङ् माट्टुम्माना टे? पाक् धारमाबिधि दुस्टा रिङ् इ टे? हिट्डे माखाक्, टरो धारमाबिधिङा पाप पाइना नुङ् याङ्हिसिक्टे॥ धारमाबिधिङा “खान्ङा लोभ चोक्नेन्” नुङ् माट्टुवाटुन्नाम्बे आङा लोभ चोक्माम्बाक् ओचाफेन्ना रिङ् नुङ् ठाहा डोक् टोग्नेट्निङ्बे॥#पारस्थान २०:१७; धारमाबिधि ५:२१ 8टरो जब धारमाबिधिलाम्मा लोभ चोक्मा ओचाफेन्मा नुङ् आङा ठाहा टोगुङे, हिट्नुङ् आङाना पाइलेना चोलाङा सोब्बे पाराना लोभ चोक्मा निङ्ग्वा चोगुए॥ पोङ्भोने धारमाबिधि वानेट्निना बे पापङा आनि चोलाङि पाक्चा आधिकार चोग्वाट्टुन् बे॥ 9पाइले आङा धारमाबिधि बारे बुजा डोक् मिचोक्ङे वासाङ्ना डाना, टरो जब धारमाबिधिङा माट्टुना रिङ् बारे बुजा चोगुङे, आङा पाप चोगुएट्टुङ्ना रिङ् ठाहा टोगुङे, 10हिट्नुङ् आङाम्बाक् सिमा कोन्ना लिसे॥ हिट्डेउङ् धारमाबिधिङा आङा लाउङ्सा लाट्निना चोला पिमाना ओसाट्टोङि सिमाना रिङ् टाडुना बुजा चोगुङे॥ 11पोङ्भोने पापङा धारमाबिधिङाना फाइदा फोगुङ् आङा छालाँ याङ्चोगे, हिट्नुङ् हिट्ना धारमाबिधि पालान् चोगुङ् आहाङ्सा सेडुए॥#उत्पति ३:१३ 12टरो चा धारमाबिधि सेङ्सेङ्ना ए, हिट्नुङ् धारमाबिधिङिगा सोब्बे आग्याँचि सेङ्सेङ्गा, माहामागा हिट्नुङ् उनुगा ए॥ 13हिट्डे भोने पाक् नाड्डेना ओचेट्नुना धारमाबिधिङा याङ्सेडेनि टे? हिट्डे माखाक्, माङ्हाङ्ङाना ओचेट्नुना धारमाबिधिङा हिड्डे चोगुन्ना, टरो पापङाउम्बाक् आङि सिमाना रिङ् टाडुए॥ हिट्नुङ् पापङा आङा सिमाना रिङ्ङाना फाट्टुरलोक्ना नुङ् निमेट्मा माङ्हाङ्ङाना ओचेट्नुना धारमाबिधि चालाँ चोगुए॥ हिट्नाडेउङ् धारमाबिधिलाम्मा हाट्ले चा पाप औधि दुस्टा नुङ् पारचिन्दा लिसे॥
धारमाबिधिङा आनि पाप आनिमेट्युक्
14सेङ्सेङ्ना हाङ्सालाम्मा माङ्हाङ्ङा मोसा धारमाबिधि पिडुना नुङ् आनिलाउङ्सा ठाहा युङ्ग्वा॥ टरो आङाम्बाक् याप्मि एडोक्, हिट्नुङ् ठिबाङ् चाकार छोङ्सि गाड्डे डोक् आङा चा पाप लाउङ्सा छुक्टेसाङे॥ 15आङा पाक् चोगुएट्टुङ्, हिट्ना रिङ् डोक् आङा बुजा चोक्निङ्ना॥ पोङ्भोने आङा चोक्मा निङ्ग्वा चोगुङ्ना रिङ्उम्बाक् चोक्निङ्ना, टरो चिम्मा फुट्टुङ्ना रिङ्उम्बाक् आङा चोगुङ्ना॥#गालाति ५:१७ 16हिट्नाडेउङ् आङा जे चोगुङ्टुङ् हिट्ना ओचाफेन्ना नुङ् आङा ठाहा टोगुङ्टुङ् भोने, धारमाबिधि ओचेट्नुना नुङ् सुइकार चोगुङ्टुङ्॥ 17हिट्डेउङ् हिट्ना ओभेन्ना रिङ् आङा चोगुङ्ना माखाक्, टरो आनिङ्ग्वाङि लिसाना पापङा चोगुना ए॥ 18पोङ्भोने आङा पापि याप्मि लिसाङ्नाँ आनिङ्ग्वाङि ओचेट्नुना रिङ् पाक्चा वाइना नुङ् आङा ठाहा टोगुङ्टुङ्॥ हिट्नुङ् आङा ओचेट्नु टोॽवा चोक्माना निङ्ग्वा चोगुङ्टुङ्, टरो हिट्ना आङा चोक्मा हिनिङ्ना॥ 19पोङ्भोने आङा ओचेट्नु टोॽवा चोक्मा निङ्ग्वा चोगुङ्टुङ्, टरो हिट्ना आङा चोक्निङ्ना॥ आङा ओभेन्ना रिङ् चोक्मा निङ्ग्वा चोक्निङ्ना, टरो हिट्ना डोक् आङा चोगुङ्ना॥ 20हाट्ले आङा ओचाफेम्मा टोॽवा चोक्मा आनिङ्ग्वा वाइना, हिट्ना चोगुङ्टुङ् भोने हिट्ना टोॽवा आङा चोगुङ्ना माखाक्, टरो आनिङ्ग्वाङि लिसाना पापङा हिट्ना टोॽवा चोगुटु॥
21आङा आचोलाङि ठिक् नियाम बारेङि बुजा चोगुएसुङे, जब आङा ओचेट्नु टोॽवा चोक्मा निङ्ग्वा चोगुङ्टुङ्, ओभेन्ना निङ्ग्वा चा आङालोक् लिना ठाहा टोगुङ्टुङ्॥ 22आङा आनिङ्ग्वालाम्मा डोक् माङ्हाङ्ङाना धारमाबिधिङि हारका लिङा॥ 23टरो आनिङ्ग्वाङि आरको साक्तिङा काम चोगुना आङा ठाहा टोगुङ्टुङ्॥ हिट्ना साक्ति आङाना आनिङ्ग्वाङाना नियामङाना बिरुद्दाङि चुङ्युक्, हिट्नुङ् हिट्नाँ आङि लिसाना पापङाना नियामङिना आधिन्ङि आङा याङ्चोक्युक्॥ 24इनामा, आङा इम्टेप्मा याङ्छामा टोगुङ्ना याप्मि॥ ना पाप हिट्नुङ् सिइना रिङ्ङा आधिन् चोगुना चोलालाम्मा साङा छुट्कारा याङ्पियुक्ना? 25आङा माङ्हाङ् पोए-पोए ठाङ्सुङ्टुङ्, उन्ङा डोक् आनि डाङ्बा येसु खिरिस्टलाम्मा छुट्कारा आपियुक्॥ हिट्डेउङ् आनिङ्ग्वालाम्मा माङ्हाङ्ङाना धारमाबिधि पालान् चोक्मा निङ्ग्वा चोगुङ्टुङ्, टरो हिट्ना ठिक्ए बेला आनिङ्ग्वाङि ओभेन्ना निङ्ग्वा लिसानाँ पापङा घारिघारि आङा आधिन् याङ्चोक्ना॥
Currently Selected:
रोमि 7: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
