याकुब 2
2
टो यो चोक्मालाम्मा ओछेक्छेक् चोक्मा
1आम्भु-आन्झाचि हिट्नुङ् आनो-आन्झाचि, खानिङा मान् टोगुना टाङ्बा येसु खिरिस्टङि बिस्वास काचोक्चि आलिसिनाँ खानिङा खोना याप्मिचि चा टो यो मेट्नेनुम्चिम्॥ 2हिट्नुङ् खानि आछुमिना डेन्ङि ओफाङ्-ओफाङ् लोट्लिङ् लोक् साम्मेङ्ङाना आङ्गुठि वाडुना वागाठागा याप्मि टाए, हिट्नुङ् आरको पाक्चा वानिना याप्मि सेङ्साना हिट्नुङ् यामाना लोट्लिङ् वाडुङ् टाए भोने, 3खानिङा हिट्ना ओफाङ्-ओफाङ् लोट्लिङ् वाडुना वागाठागा याप्मि मान् आचोगुम्मुङ् “नाहि ओचेट्नुना ठोङ्ङि युङा” आलोडुम्टुम्, हिट्नुङ् हिट्ना पाक्चा वानिना याप्मिम्बाक् “खान् हिट्नि डोक् येबा” आथाबा “खान् हिट्नि खाम्मि आलाङ् सोरि युङा” आलोडुम्टुम् भोने, 4पाक् खानिङा खानिङि डोक् टो यो टोॽवा काचोक्बा हिट्नुङ् खानि ओचाफेन्मा निङ्ग्वा लिसाना न्याए काचोक्बा आलिसेट्टिन्नि टे?
5आमायालु आम्भु-आन्झाचि हिट्नुङ् आनो-आन्झाचि, खेम्सानुम्, पाक् माङ्हाङ्ङा नाराङिगा पाक्चा वानिगालाउङ्सा बिस्वासङि बोल्लेउ चोक्मा हिट्नुङ् माङ्हुप् चोगुना उमुलुक् उन् माया काचोक्चि पिमाउङ्सा सेगुवाट्टुन्चिन्गि टे? 6टरो खानिङाउम्टे पाक्चा ओवानिगा याप्मिचि हेला आचोगुएसुम्चिम्मे॥ पाक् वागाठागा याप्मिचिङा खानि मानिप्टिन्गै टे? पाक् हिट्नागाँ खानि मासाडिउङ् आदालात माखाट्टिन्गै टे? 7पाक् खानिङा बिस्वास आचोगुम्ना येसु खिरिस्टङाना नुना उनिङ् हिट्नागाँ खिसि ओचोग्वाट्टुन्नि टे?
8हिट्नुङ् “काटाक्लुङ्चि आप्पे गाड्डे डोक् माया चोगुचि”#लेबि १९:१८ नुङ् धारमाछाप्लाङि छेप्टाना माङ्हाङ् उमुलुक्ङाना नियाम पालान् आचोगुम्टुम् भोने, खानिङा ओचेट्नुना टोॽवा आचोगुम्टुम्॥ 9टरो खानिङा याप्मिचिगा भाराङिना उरुप् आपुयुम्मुङ् टो यो टोॽवा आचोगिटि भोने खानिङा पाप आचोगुम्टुम्, हिट्नुङ् खानिङा धारमाबिधि पालान् आचोक्नेएट्निम्ना रिङ्ङाना फाट्टुर खानिङि लाहाब् लियुक्॥ 10पोङ्भोने जुन्ङा धारमाबिधिङिना ख्वाप्पा रिङ् पालान् चोगुटु, टरो ठिक् रिङ् डोक् पालान् चोग्वाट्टुन् भोने, धारमाबिधिङिना सोब्बे रिङ्ङि हिट्ना फाट्टुरङि ठायुक्॥ 11पोङ्भोने जुन्ङा “इम्मेप्माजामा टोॽवा चोक्नेनुम्” माट्टुए, उन्ङा “याप्मि सेड्नेनुम्” चा माट्टुटु॥ हिड्डेउङ् खानिङा इम्मेप्माजामा टोॽवा आचोगिन्चा याप्मि आसेडुटुम् भोने, सोब्बे धारमाबिधि डोक् खानिङा पालान् आचोक्निम्ना॥#पारस्थान २०:१३-१४; धारमाबिधि ५:१७-१८ 12हिड्नाड्डेउङ् खानिङा जे आमाट्टुम्टुम् हिट्नुङ् आचोगुम्टुम्, छुट्कारा आपिना धारमाबिधिलाम्मा खानि न्याए लियुक् नुङ् मिट्टानुम्॥ 13पोङ्भोने जुन्ङा आरु लुक्मा टुक्टुन्चिन्गा, हिट्नाङाना न्याए चा हिट्ना पारा डोक् लियुक्॥ टरो जुन्ङा आरु लुक्मा टुक्टुचिचि भोने, माङ्हाङ्ङा हिट्ना न्याए चोगुनाँ उन् लुक्मा टुक्टुटु॥
बिस्वास हिट्नुङ् टोॽवा
14आम्भु-आन्झाचि हिट्नुङ् आनो-आन्झाचि, जुन् याप्मिङा बिस्वास चोगुङ्टुङ् पिग्युक्, टरो ओचेट्नुना टोॽवाम्बाक् चोगुन्ना भोने, पाक् ओचेट्नुना लिसेना टे? पाक् नाड्डेना बिस्वासङा हिट्ना हिङ्मा हियुक्नि टे? 15कोइ भुम्भु-झान्झालोक् लोट्लिङ् वाइना हिट्नुङ् लेन्सेन् चामा चामाना चा वाइना, 16हिट्नुङ् खानि माड्डे कोइङा हिट्ना “माङ्हाङ्ङा खान् आसिक् मापियुक्, कोना लोट्लिङ् वाडु हिट्नुङ् नुगा डोक् चो” आलोडुम्टुम्, टरो उन्लोङ्सा चाहाब् उलिगा थोक् पाक्चा आपिनिम्ना भोने, पाक् ओचेट्नुना लिसेना टे? 17हिट्डेउङ् बिस्वास चा हिड्नाड्डेना डोक् लियुक्॥ हिट्नुङ् टोॽवा मालेना बिस्वासउम् टे सियाना याप्मि गाड्डे खेडोक्ना लियुक्॥
18टरो कोइ-कोइङा ओमाट्टुटु होला, “खान्ङा बिस्वास आचोगुटु, आङाम्बाक् टोॽवा चोगुङ्टुङ्॥” लु टोॽवा मालेना काबिस्वास याङ्निमेट्टा टे, हिट्नुङ् आङाम्टे आङा चोगुङ्ना टोॽवालाम्मा आङि लिसाना बिस्वास निमेट्नाँ॥ 19पाक् माङ्हाङ् ठिबाङ् ए वाहेट् नुङ् खानिङा बिस्वास आचोगुटुम् नि? ना रिङ् ओचेट्नुना डोक्॥ टरो टोन्डेबाचिङा चा बिस्वास ओचोगुटु हिट्नुङ् हिट्नागा किप्माङा पिलिम् पिलिम् ओयोक्युक्॥ 20ठोनाबा याप्मिचि, पाक् टोॽवा मालेना बिस्वास खेडोक्ना लियुक् नुङ् खानिङा पुमा आकोलुम्टुम्नि? 21आनि टुबाठेबा आब्राहामङा आप्पे उइछा इसाहाक बेदिङि भोक् ठाङ्माना टोॽवा चोगुङ् माङ्हाङ् ओटोकानाङि उन् धारमोति याप्मि लिसाना रिङ् खानिङा आमिट्निम्नै?#उत्पति २२:१-१४ 22ना रिङ् पारचिन्दा डोक् युङ्ग्वा, आब्राहामङा माङ्हाङ्ङि बिस्वास एडोक् चोग्वाट्टुन्, उन्ङा माङ्हाङ्ङा चोगु नुङ् लोडुना रिङ् चा चोगुए, हिट्नुङ् ओटोॽवाङा उन्ङाना बिस्वास पुरो चोगुए॥ 23हिट्नुङ् धारमाछाप्लाङि नाड्डे छेप्बालाक् रिङ् युडे, “आब्राहामङा माङ्हाङ् बिस्वास चोगुए हिट्नुङ् उन्ङा चोगुना बिस्वासङा माङ्हाङ्ङा उन् धारमोति याप्मि नुङ् लाडुए॥” हिट्डेउङ् माङ्हाङ्ङा उन् ओसाइबा नुङ् लोडुए॥#उत्पति १५:६; २ इतिहास २०:७; यासैया ४१:८ 24बिस्वासलाम्मा एडोक् माखाक् टरो उन्ङा चोगुना टोॽवालाम्मा याप्मि माङ्हाङ् ओटोकानाङि धारमोति लियुक् नुङ् खानिङा हाट्ले ठाहा आटोगुमे टे॥ 25नाड्डे डोक्, वालाफेडुमा राहाबङा रिङ् बुजा चोक्ङा ओखाडागा याप्मिचि नुलोक् मेट्टुचे हिट्नुङ् जोगाँ चोगुचिउङ् आरकोना लाम्बो पाङ्सुचिउङ् ओटोॽवालाम्मा डोक् उन् माङ्हाङ् ओटोकानाङि धारमोति मेन्झेमा लिनेट्निनि टे?#याहोसु २:१-२१ 26छेम्बा डोक् येम् चा सोक्मालाम्मा साम्डे भोने सियुक्, हिट्नाडे डोक् बिस्वास चा टोॽवा माले सियुक्॥
Currently Selected:
याकुब 2: APH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society