मुलिचेला टोॽवा 26
26
1हिट्नुङ् आग्रिपास हाङ्बाङा पावाल लोडुए, “हाट्ले खान्ङा कारिङ् युङ्मा आहिडुटु॥”
हिट्नुङ् पावालङा चा उमुक् फोगुङ् ओबाचाउङि नाड्डे पिक्सा माट्टुए, 2“हाउ हाङ्बा आग्रिपास, याहुदिचिङा आङा फाट्टुर ओलाबाङ्ना रिङ्ङाना बारेङि हाट्ले आङाना बाचाउङि काटोकानाङि माप्मा टोगुङ्नाँ आङालोङ्सा ओचेट्नु लिसे नुङ् मिट्टुएसुङे॥ 3खान्ङा याहुदिचिङि लिसाडागा चालान् चाल्ति हिट्नुङ् खेमाबुङ्मा लिगा रिङ्चि बारेङि नुलोक् ठाहा आटोगुएसुए॥ हिड्डेउङ् आङा माट्टुङ्ना रिङ् नुलोक् याङ्खेम्साबिडा नुङ् खान्ङि बिन्टि ठाङ्सुङ्टुङ्॥
4“आङा आप्पे आछोङ्बाचि हिट्नुङ् यरुसलेम खालाङ्गाङि याहुदि छोङ्बाचिलोक् पोयाङे॥ हिड्डेउङ् आङा पिच्छालाम्मा डोक् खोड्डेना याप्मि नुङ् याहुदिचिङा नुलोक् ठाहा ओटोगुटु॥ 5याप्मा बारखालाम्मा आङा आन्याँ धारमाङि लिसाडागा रिङ्चि मानाँ काचोक्बा सोब्बे नुङ्ना काठोर सामुहङिना ठिबाङ् फारिसि याप्मि लिसाउङ् वासाङ्ना रिङ् हिट्नागा लोङ्सा ठाहा युङ्ग्वा॥ हिट्नागाँ निङ्ग्वा ओचोगुए भोने, ना रिङ्ङाना बारेङि माप्मा उहिडुटु॥#मुलिचेला टोॽवा २३:६; फिलिप्पि ३:५ 6माङ्हाङ्ङा आनि टुबाठेबाचिलोक् चोगुना माङ्हुप्ङि आङा चा आसा युङ्सुङ्नाँ हाट्ले आङा नाहि न्याए चोक्माना डेन्ङि येबाइसाङे॥ 7हाउ हाङ्बा आग्रिपास, हिट्ना माङ्हुप् टोक्माना आसाङि आनि बारो पुङ्लाचिङा चा लेन्सेन् आड्डिक् निङ्ग्वा उपिडुङ् माङ्हाङ्ङि माङ्ध्यान् ओचोक्येट्॥ हिट्नुङ् आङा चा हिट्ना आसा डोक् युङ्सुङ्नाँ याहुदिचिङा आङा फाट्टुर याङ्ओलाबे॥ 8हिट्नुङ् माङ्हाङ्ङा उसियागा याप्मिचि उहिङ्ग्वाट् चोगुचिचि नुङ् पोङ् खानिङा बिस्वास चोक्मा आहिनिम्ना?
9“आङा आप्पे चा नासारातङिना येसु उनिङ् बिरुद्दाङि जोम् रिङ् चोक्मा कोन्युक् नुङ् मिट्टाङ्ना॥ 10हिट्नुङ् आङा यरुसलेमङि हिड्नाड्डे डोक् बिरोध चोगुङ्चिङे॥ हिट्नुङ् आङा गाडुवाडाङ्बाचिलाम्मा आधिकार टोगुङ् जोम् माङ्हाङ् ओयाप्मिचि खाम्बाङ्ङि छाक्मा मेट्टुङ्चिङे, हिट्नुङ् हिट्नागा सेप्माचिगा रिङ्ङि चा लियुक् पिक्सा लोडुङ्चिङे॥ 11हिट्नुङ् आङा सोब्बे याहुदिचिगा छुम्मापाङ्ङि खाडाउङ् ‘हिट्नागाँ बिस्वास ओनाडुवाक्’ नुङ् साजाए पिमा मेट्टुङ्चें॥ हिट्नुङ् हिट्नागालोक् आङाना आड्डिक् आरेक् काडाउङ् आरु देसङिगा खालाङ्गाङि चा खाडाउङ् आङा हिट्नागा याङ्छामा चाट्टुङ्चिङे॥#मुलिचेला टोॽवा ८:३; २२:४-५
पावालङा उनिङ्ग्वा नोक्टुना बारेङि माट्टुना
(मुलिचेला टोॽवा ९:१-९; २२:६-१६)
12“नाड्डे डोक् ठिक् लेम्बा आङा गाडुवाडाङ्बाचिलाम्मा आधिकार हिट्नुङ् आग्याँ टोगुङ् आङा दामास्कास खालाङ्गालेङ् खाडाङ्गेट्टाङ्ना॥ 13हाउ हाङ्बा, हिट्ना लेम्बा लाम्बोङि खाडिगेट्टिङाना बेला टाङ्साङ्लाम्मा नाम् छेमा नुङ्ना चा आड्डिक् ओम्साना व्हाङ् आङा हिट्नुङ् आसाइबाचि याम्बा-नायाम्बा ओम्साना आङा निसुङे॥ 14हिट्नुङ् आन्याँ सोब्बे खाम्ङि कोसिङे॥ हिट्नुङ् हिब्रु रिङ्ङि आङा नाड्डेना सोरा मुक्टाना खेम्सुङे, ‘हाउ सावाल, सावाल, पोङ् खान्ङा आङा याङ्छामा याङ्आचाट्ङाना? खान् माङ्हाङ् बिरुद्दाङि खेमाबुङ्मा आचोग्येट्, हिड्डेउङ् खान्ङा आप्पे लोङ्सा याङ्छामा टोग्माना टोॽवा आचोगुएट्टु॥’
15“हिट्नुङ् आङा ‘टाङ्बा, खान् साइना?’ पिक्सा सिलाप्टुङे॥
“हिट्नुङ् टाङ्बाङा फेरि आङा याङ्लोडे, ‘खान्ङा याङ्छामा आचाट्नेट्ङाना, आङा येसु॥ 16हाट्ले कोबा हिट्नुङ् कालाङ्ङि येबा, आङाना सेवाक् लिमा हिट्नुङ् आरिङ् कामाप्बा चोक्मा लोङ्सा आङा खान् सोरि ठेट्टाङ्ना॥ नाड्डेउङ् हाट्ले आनिसुगा रिङ्चि हिट्नुङ् हान्डेङ् आङा आरु रिङ्चि खान् निमेट्नाँ नागा ख्वाप्पा रिङ्चि खान्ङा आरु याप्मिचि लोमाचि कोन्युक्॥ 17आङा खान् याहुदिचि लोक् पानिछोङ्बाचि सोरि पाङ्नागेट्नाँ, हिट्नुङ् आङा खान् हिट्नागालाम्मा जोगाँ चोक्नाँ॥ 18खान्ङा हिट्नागा याप्मिचिगा मिक् ओङ्सुबिडुचि, हिट्नुङ् हिट्नागा डुम्बारिक् डुम्लाम्मा व्हाङ्ङि हिट्नुङ् सैतानङाना ओसाक्तिलाम्मा माङ्हाङ्ङि ओनोक्याक्॥ हिट्नुङ् माङ्हाङ्ङा हिट्नागाँगा पाप टुगुबिडुचिचि, हिट्नुङ् हिट्नागाँ माङ्हाङ्ङि बिस्वास ओचोगुनाँ उन्ङा सेगुचिगा ओयाप्मिचिलोक् साङ्गाटिङि युङ्मा ओटोगुटु॥’
19“हिट्डेउङ् हाउ हाङ्बा आग्रिपास, टोनालोग्लाम्मा टोगुङ्ना ना निमापुमा पालान् मिचोक्ङे युङ्मा हिनेट्निङ्॥ 20हिट्नुङ् सोब्बे नुङ्ना पाइले दामास्कास, लोक् यरुसलेमङि हिट्नुङ् ख्वाप्पा याहुदिया देसङि उलिसागा, हिट्नुङ् पानिछोङ्बाचि चा ‘खानि पापलाम्मा काएल्-काबु लिसानिउङ् माङ्हाङ्ङि नोक्टानि हिट्नुङ् खानि पापलाम्मा काएल्-काबु आलिसि गाड्डे नुना टोॽवा चोगानुमुङ् पारमान् पिडानुम्’ पिक्सा पारचार चोगुङे॥#मुलिचेला टोॽवा ९:२०,२८-२९ 21आङा नागा रिङ्चि पारचार चोगुङ्ना याहुदिचिङा माङ्ठानाङि याङ्ओलाबाउङ् सेप्मा ओकोलाङे॥ 22टरो हाट्ले लेम्बा सोम्मा माङ्हाङ्ङा आङा घुवार याङ्फाडाइसे॥ हिड्डेउङ् डोक् ठेगा हिट्नुङ् खाट्टिगा खानि सोब्बे सोरि येसुङाना बारेङि माट्सा आङा नेहि येबाइसाङे॥ माङ्काटाचिङा हिट्नुङ् मोसाङा ओमाट्टुगा रिङ् युयुक् नुङ् ओमाट्टुगा माले आरु याप्मा रिङ् आङा पाक्चा पारचार चोक्निङ्गेट्निङ्ना॥ 23नाड्डेउङ् ‘काहिङ्मेप्बा डाङ्बा खिरिस्टङा याङ्छामा आङ्मा कोन्युक्, हिट्नुङ् उन् उसियागालाम्मा उहिङ्ग्वाट् लियुङ् कोब्ना काट्ना सोब्बे नुङ्ना उटुम्ङिना लियुक्, हिट्नुङ् उन्ङा आप्पे याहुदि ओयाप्मिचि हिट्नुङ् पानिछोङ्बाचि लोङ्सा चा मुक्टि टोगुम्ना व्हाङ्ङाना बारेङि लोडुचिचि’ पिक्सा हिट्नागाँ ओमाट्टुएसुना॥”#यासैया ४२:६; ४९:६; १ कोरिन्थि १५:२०
24पावालङा माट्टुना नागा रिङ् खेम्सुङ् फेस्तासङा राट्टुङ् लोडुए, “हाउ पावाल, खान् आङाङ्सेना रैछो, जोम् कानिबा आलिसाउङ् खान् ङाङ्सुबा डोक् आलिसे॥”
25पावालङा लोडुए, “पान्चा पागारि फेस्तास, आङा ङाङ्साङ्ना माखाक्, आठोना मानिगेट्निना हिट्नुङ् छेम्बागा रिङ् माट्टुङ्टुङ्॥ 26पोङ्भोने हाङ् आग्रिपासङा नागा ख्वाप्पा रिङ्चि ठाहा युङ्ग्वा, उन् नागा रिङ् मिकिट्ङे लोमा हिडुङ्टुङ्॥ छेम्बा डोक्, उन्ङा नागा रिङ् नुलोक् ठाहा टोगुएसुए, पोङ्भोने नागा रिङ् सोगोप् लिसाना माखाक्॥ 27हाङ्बा आग्रिपास, पाक् खान्ङा माङ्काटाचिङा ओछेप्टुगा रिङ् बिस्वास आचोगुटुनि? आए, खान्ङा बिस्वास आचोगुटु नुङ् आङालोङ्सा ठाहा युङ्ग्वा॥”
28हिड्डेउङ् आग्रिपासङा पावाल लोडुए, “छोप्मोङ्ङा डोक् पाक् आङा खिरिस्टियान लिङा नुङ् खान् आमिट्येट्नि?”
29पावालङा लोडुए, “हाट्ले लिचा हान्डेङ् लिचा, खान् एडोक् माखाक्, टरो हाट्ले आङा माट्टुङ्गा रिङ् काखेम्बा याप्मिचि ना खाम्बाङ्ङि एडोक् माखाक् आरु चा आङा गाड्डे डोक् बिस्वासि उलियाक् नुङ् माङ्हाङ्ङि बिन्टि चोगुङ्टुङ्॥”
30हिट्नुङ् हाङ्बा आग्रिपास, ठेना हाकिम फेस्तास, बारनिकि हिट्नुङ् हिट्नि उलिसागा सोब्बे याप्मिचि ओकोबे॥ 31हिट्नुङ् हिट्नागा भारा ओहोन्डे, हिट्नुङ् आ-आप्पे नाड्डे रिङ्पान् ओचोगे, “ना याप्मि सेप्मा कोन्ना आथाबा खाम्बाङ्ङि डोक् छाक्मा कोन्ना टोॽवाउम् पाक्चा चोगुन्गेट्टुन्ना रैछो॥”
32हिट्नुङ् आग्रिपासङा फेस्तास लोडुए, “ना याप्मिङा उन्ङाना न्याए कैसारङा डोक् ओचोगुवाक् नुङ् बिन्टि ठाङ्स्वाट्टुन्नाँ बे लेडुम्डिसुम्नाँ चा बे लिसे॥”
Currently Selected:
मुलिचेला टोॽवा 26: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
