मुलिचेला टोॽवा 22
22
1“हाउ आम्भु-आन्झाचि, आप्पा-आमाचि, आङा पोङ् फाट्टुर आलाबिङेगा हिट्ना बारेङि पारचिन्दा खानि लोमा कोन्युक्, आरिङ् खेम्सानुम्॥” 2पावालङा हिब्रु रिङ्ङि चेक्टाना ओखेम्सुङ् सोब्बे याप्मिचि आझै स्वाग् उयुङे॥
3पावालङा हिट्नागा लोडुचे, “आङा किलिकिया छेट्राङिना टारसास खालाङ्गाङि पोङ्साङ्ना ठिबाङ् याहुदि याप्मि, टरो आङा नेहि यरुसलेम खालाङ्गाङि पोयाङे हिट्नुङ् काहिसिक्बा गामालिएलङाना ओचेला लिसाङे॥ हिट्नुङ् आनि टुबाठेबाचिङा मानाँ चोक्सा ओटाडुना धारमाछाप्लाङिना हिसिक्मा ओचेट्नुलोक् सिकाँ लिसाङे॥ हाट्ले खानि गाड्डे डोक् आङा चा आड्डिक् डोक् माङ्हाङ्ङाना सेवा चोक्मा निङ्ग्वा पिडुङे॥#मुलिचेला टोॽवा ५:३४-३९ 4हिट्डेउङ् आङाना टाङ्बाङाना लाम्बोङि ओलाम्टियागा याप्मिचि याङ्छामा चाट्टुङ्चें हिट्नुङ् आम्टेप्मा सेडुङ्चिङे चा॥ हिट्नुङ् आङा येम्बेछा लोक् मेच्छेमाचि लाबुङ्चिउङ् खाम्बाङ्ङि छाक्टुङ्चिङे॥ 5आङा लोनानिगा ना रिङ् छेम्बाना नुङ् सानिङ्डाङ्बा हिट्नुङ् आनि काचाहारि-कुन्डालङिगा सादास्सेचिङा चा लोमा माहिडिटि॥ उन्चिङा डोक् आङा दामास्कास ओलोडुना डेन्ङि उलिसागा याहुदि भुम्बु-झान्झाचि लाप्माना आधिकारङाना चिट्ठि याङ्उपिडे॥ हिट्ना चिट्ठिङि आङा हिट्निगा बिस्वासि याप्मिचि लाब्माचिगा आधिकार टोगुएसुङ्ना हिट्नुङ् आङा हिट्नागा यरुसलेमङि आप्टुङ्चिउङ् साजाए पिमा दामास्कासङि खाडाङे॥#मुलिचेला टोॽवा ८:३; २६:९-११
6“हिट्नुङ् आङा लाम्बोङि खाडाङ्गेट्टाङ्ना हिट्नुङ् दामास्कास नेहेटाङ् टासुङ्ना बेला लेन्ना लिसाइसाना॥ हिट्ना बेला डोक् टाङ्साङ्लाम्मा व्हाङ्ङाना ओसाङ् आङाना याम्बा-नायाम्बा ओम्से॥ 7हिट्नुङ् आङा खाम्मि टाङ्गिलाङ् कोसाङे॥ हिट्नुङ् आङा नाड्डे मुक्टाना साब्दा खेम्सुङे, ‘सावाल, सावाल पोङ् खान्ङा आङा याङ्छामा आचाट्नाँना?’ 8हिट्नुङ् आङा सिलाप्टुङे, ‘आटाङ्बा, खान् साइना?’ हिट्नुङ् उन्ङा याङ्लोडे, ‘खान्ङा याङ्छामा आपिङेट्ङाना, आङा नासारातङिना येसु॥’ 9आङालोक् ओवासागाँ व्हाङ् लिसाना उनिसुए, टरो ओखेम्सुना सोराम्बाक् बुजा ओचोग्वाट्टुन्॥
10“आङा लोडुङे, ‘हाउ टाङ्बा, हाट्ले आङा पाक् चोक्ङाना?’ उन्ङा याङ्लोडे, ‘कोबाउङ् दामास्कास खालाङ्गाङि खाडा, हिट्नुङ् खान्ङा चोक्माना टोॽवा बारेङि खान् मालोयुक्॥’ 11हिट्ना ओम्साना व्हाङ्ङा चोगुनाँ आङा निमा हिनेट्निङ् हिट्नुङ् आसाइबाचिङा आमुक्ङि ओलाबाङाउङ् दामास्कास याङ्ओखाट्टे॥
12“हिट्नुङ् हिट्ना खालाङ्गाङि हानानिया निङ् लिसाना ठिबाङ् याप्मि युङाना॥ ना याप्मि मोसाङा छेप्टुना धारमाबिधि पालान् काचोक्बा धारमोति याप्मि डाना हिट्नुङ् सोब्बे दामास्कासङिगा याहुदिचिङा मान् ओचोगुना डाना॥ 13हिट्ना याप्मि आङा सोरि आबाउङ् आटोकानाङि येबाउङ् याङ्लोडे, ‘सावाल आन्झा, फेरि याङ्निसु’॥ हिट्नाङा नाड्डे याङ्लोडानामे डोक् निमा काहिबा लिसाङे, हिट्नुङ् उन् निसुङे॥
14“हिट्नुङ् उन्ङा याङ्लोडे, ‘खान्ङा आनि टुबाठेबाङाना माङ्हाङ्ङाना उनिङ्ग्वा ठाहा टोक्मा आहिडु नुङ्, हिट्नुङ् हिट्ना धारमोति याप्मि येसु निमा, हिट्नुङ् उरिङ् खेम्सुनुङ् खान् मासेगाइसे॥ 15पोङ्भोने खान्ङा उन्ङाना बारेङि आनिसुगा हिट्नुङ् आखेम्सुगा रिङ् सोब्बे याप्मिचि खान्ङा लोमाचि कोन्युक्॥ 16हिड्डेउङ् पोङ् हाट्ले ढिलो आचोक्युक्ना? कोबा हिट्नुङ् बाप्टिस्मा लाडु हिट्नुङ् उनिङ्ङि बिस्वास चोगुङ् कापापलाम्मा चोखो लिसा॥’
17“आम्टेप्मा लेम्बा ओएङ्स्वालेङ् आङा यरुसलेम नोक्टाउङ् खाडाङे हिट्नुङ् माङ्ठानाङि बिन्टि चोगेट्टाङ्ना बेला आङा निमापुमा निसुङे॥ 18हिट्नुङ् आङा टाङ्बा निसुङे हिट्नुङ् उन्ङा याङ्लोडे, ‘एला चोगाउङ् यरुसलेमलाम्मा खाडालेट्टा, पोङ्भोने खान्ङा आङाना बारेङि आलोडुचिगा रिङ् नागा याप्मिचिङा ओखेम्सुन्गा॥’
19“आङा लोडुङे, ‘हाउ आटाङ्बा, आङा सोरोक् छुम्मापाङ्ङि खाडाउङ् खान्ङि बिस्वास काचोक्बाचि लाबुङ्चिउङ् खाम्बाङ्ङि ठेन्डुङ्चिङ्गा हिट्नुङ् लेम्सुङ्चिङ्गा रिङ् नागा सोब्बेङा ठाहा ओटोगुएसुए॥ 20कारिङ् कामाप्बा इस्तिफानास हेलिक् पुप् ओचोगुङ् याप्मिचिङा ओसेडुनाँ आङा चा हिट्नि वासेट्टाङ्ना॥ हिट्नुङ् हिट्ना सेप्माना रिङ्ङि टेन्डाउङ् उन् कासेप्बाचिगा लोट्लिङ् कोसा युङेसाङ्ना॥’#मुलिचेला टोॽवा ७:५८
21“टरो टाङ्बाङा याङ्लोडे, ‘खान् खाडा, आङा खान् लाप्माङ् लाप्माङ् सोम्मा पानिछोङ्बाचि सोरि पाङ्नाँ॥’”
22याप्मिचिङा पावालङा उरिङ् नाहि सोम्मा एडोक् ओखेम्सुए॥ हिट्नुङ्ना याप्मिचि ओराट्टाउङ् नाड्डे ओलोडुए, “ना याप्मि सेप्मा कोन्युक्, ना याप्मि उहिङ्ग्वाट् लेट्मा लिनिना॥” 23नाड्डेउङ् हिट्नागाँ उन्चि लोट्लिङ् सेङ्सा हिट्नुङ् खाम्सेरेक् टाङ्साङ्लेङ् लेप्सा ओराट्टे॥
24ना रिङ् निसुङ् रोमि टिलिङ्गाचिगा सेनापतिङा लोडुचे, “पावाल भिट्रा खाट्टानुम् कोरराङा लेम्सानुम् हिट्नुङ् पोङ् याहुदि याप्मिचिगा उन्चि याक्लेडेना” नुङ् सिलाप्टानुम्॥ 25जब टिलिङ्गाचिङा कोरराङा लेम्मा ओहोॽवाङाना रिबाङा ओरेक्टु लाबुनाँ पावालङा उन् सोरि येबाइसाना काप्तान सिलाप्टुए, “पाक् रोमि याप्मि चा फाट्टुरङि मिठाए कोरराङा लेम्मा लियुक्नि? पाक् रोमिचिगा नियामङि नाड्डे डोक् छेप्टेसेनि टे?”
26काप्तानङा ना रिङ् खेम्सुङ् सेनापति सोरि खाडाउङ् नाड्डे लोडुए, “आडाङ्बा, खान्ङा पाक् चोक्मा आइट्टुलाबुएना? नाउम् रोमि याप्मि गोलो रैछो॥”
27हिट्डेउङ् सेनापति आबाउङ् पावाल सिलाप्टुए, “याङ्लोडा, पाक् छेम्बा डोक् खान् रोमि याप्मि इ?”
पावालङा लोडुए, “आए, आङा रोमि याप्मि डोक्॥”
28सेनापतिङा लोडुए, “आङाम्टे जोम् ओफाबा हुङुङ् रोमि याप्मि लिसाङ्ना॥”
पावालङा लोडुए, “आङाम्टे पोङ्साउङ् डोक् रोमि याप्मि टे॥”
29नाड्डे ओखेम्सुनामे पावाल कोरराङा लेम्मा हिट्नुङ् सिलाप्मा लोङ्सा टेयार उलिसागा याप्मिचिङा हिट्ना बेला डोक् उन् ओनाडुढोए॥ पावाल रोमि याप्मि नुङ् सेनापतिङा ठाहा टोगुङ् उन् किट्टे, पोङ्भोने उन्ङा ढाउङाना साङ्लिङा पावाल रेक्मा मेट्टुएसुचिगा॥
पावाल याहुदिचिगा काचाहारि-कुन्डालङि
30याहुदिचिङा पावाल पोङ् फाट्टुर ओलाबुएना हिट्ना रिङ् सेनापतिङा ठाहा टोक्माना निङ्ग्वा चोगुङ् पावाल लेडुए॥ हिड्डे लिसाउङ् हान्डेङ् लेम्बा सोब्बे गाडुवाडाङ्बाचि लोक् काचाहारि-कुन्डालङिगा ख्वाप्पा सादास्सेचि काचाहारि चोक्मा लोङ्सा छेम्डुचे हिट्नुङ् पावाल खाट्टुङ् सोब्बे सोरि येबा नुङ् लोडुए॥
Currently Selected:
मुलिचेला टोॽवा 22: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
