मुलिचेला टोॽवा 20
20
पावाल माकेडोनिया हिट्नुङ् गिरिस देसङि
1हिट्नुङ् याप्मिचिगा खिमेयाङ्मे लिमा नाडुङ् पावालङा बिस्वासिचि छेम्सिङा पाङ्सुचे हिट्नुङ् हिट्नागा बिस्वासङि दोरो लिसाना पिक्सा आँट् पिडुचे॥ हिट्नुङ् हिट्नागालोक् सेन्डाउङ् उन् हिट्निलाम्मा माकेडोनियालेङ् खाडे॥ 2हिट्नुङ् हिट्नि टासुङ् पावाल युक्टाम्-युक्टाम् लिसा वासाउङ् हिट्निगा बिस्वासिचि जोम् रिङ् लोडुचिउङ् आँट् पिडुचे, हिट्नुङ् गिरिस ओलोडुना डेन्ङि खाडे॥ 3पावाल हिट्नि सुम्बोक् माइना टेप्मा युङे॥ हिट्नुङ् सिरियालेङ् चुवाखोङ्डाङ्लाम्मा खाप्मा टेयार लिसाना बेला याहुदिचिङा उन् सेप्माना निङ्ग्वा ओचोगुना ठाहा टोगुङ् उन् हिट्नालाम्मा माकेडोनिया लिसा लाम्टिसा खाप्माना निङ्ग्वा चोगुए॥ 4हिट्नुङ् बेरियाङि युङ्ना पुरासङा उइछा सोपातोरस, थेसालोनिकेलाम्मा आरिस्ताखारस हिट्नुङ् सिकान्दास, डारबिङिना गायास, हिट्नुङ् तिमोथि हिट्नुङ् एसिया छेट्राङिना तुखिकास हिट्नुङ् तोरफिमास उन्लोक् टाक् उलिसाउङ् ओलाम्टिए॥ 5हिट्नागा आन्याँ नुङ्ना पाइले ओखाडे हिट्नुङ् तोरआस खालाङ्गाङि याप्मि ओहाङ्से॥ 6हिट्नुङ् आन्याँम्बाक् छुट्काराङाना चाडा खामिर मिठेन्ने चोक्बालाक् चालेप्पा चामाना चाडा#२०:६ छुट्काराङाना चाडा, ना खामिर मिठेन्ने चोक्बालाक् चालेप्पा चामाना चाडा आथाबा निस्तार चाडा चा ओलोडुटु॥ मानाँ चोक्मा हिडुमुङ् फिलिप्पि खालाङ्गालाम्मा सामुन्दराङाना लाम्बो लिसा खाडिङे हिट्नुङ् लेम्बोक् लेम्बा ओएङ्स्वा हिट्नागा तोरआस खालाङ्गाङि टुबुम्चिम्मे॥ हिट्नि आन्याँ सि लेम्बा सोम्मा युङिङे॥
पावालङा ठिबाङ् सियाना ठाङ्बेन् उहिङ्ग्वाट् चोगुना
7आइताबारङाना युसाना पाका आन्याँ बिस्वासि भुम्बु-झान्झाचि माङ्खोइ चामा नुङ् एक्केउ छुमिङे॥ पावाल हिट्नालाम्मा हान्डेङ् भ्यानिक् खाट्ना लिसाउङ् उन्ङा आधारात् सोम्मा हिट्निगा बिस्वासिचिलोक् रिङ्पान् चोगायाक्टे॥ 8आन्याँ छुमिङाना पाङ् उठुङ्ङिना कोठाङि जोम् कुपिचि ओहाटेसागा॥ 9हिट्नि युटिकास ओलोडुना ठिबाङ् ठाङ्बेन् झ्यालाङि युङेसाना॥ पावाल होप्मो सोम्मा चेक्टानाँ हिट्ना उमिक्युमा युडाउङ् ढुङ्घुप्पा चासा युङेसाना हिट्नुङ् उमिक्युमा आड्डिक् युडाउङ् इम्साडे, हिट्नुङ् यो सुम्बोक् ताला उछिक्ङि कोसा ठाए॥ हिट्ना फोक्सिङा ओखाडानाँ सियाडाना उटुबुए॥ 10टरो पावाल यो खाडाउङ् हिट्ना ओएराबाङि काप्टुङ् उमुक्ङा हुप्टुए हिट्नुङ् याप्मिचि लोडुचे, “खानि किट्नेनिन्, ना सिनिगेट्निना॥” 11हिट्नुङ् पावाल उठुइना टालाङि खाडे हिट्नुङ् सोब्बेङा माङ्खोइ ओचोए॥ माङ्खोइ चामा उहिडाउङ् भ्यानिक् मिले सोम्मा हिट्नागालोक् उन् मुन्डुब्टे॥ हिट्नुङ् हिट्नागालोक् सेन्डाउङ् लाम्टिए॥ 12हिट्नागाँ हिट्ना ठाङ्बेन् याप्मि उहिङ्ग्वाट् डोक् ओपाङ्ङि ओखाट्टुए हिट्नुङ् हिट्नागाँगा आड्डिक् उन्चि चाप् टाए॥
पावाल तोरआसलाम्मा मिलेटस सोम्मा खाडाना
13पावालम्बाक् नाडुमुङ् आन्याँ चुवाखोङ्डाङ्लाम्मा पाइले आस्सोस खालाङ्गाङि खाडिङे॥ पावालङा आस्सोस खालाङ्गा सोम्मा लाम्टिसा खाप्माना हिट्नुङ् हिट्नि एडोक् चुवाखोङ्डाङ्ङि ठाङ्माना उन्ङा निङ्ग्वा चोगुएसुना॥ 14हिट्नुङ् पावालङा आस्सोसङि आन्याँ याप्मि टुबे हिट्नुङ् चुवाखोङ्डाङ्ङि उन् ठाङ्सुम्मे हिट्नुङ् हिट्निलाम्मा मितिलेने खालाङ्गाङि खाडिङे॥ 15हान्डेङ् भ्यानिक् आन्याँ हिट्निलाम्मा खियास टापु ओफेरोङि टासुम्मे हिट्नुङ् छिङ्डेन् भेनिक् सामोस टापु टासुम्मे॥ हिट्निलाम्मा छिङ्डेङ् मिलेटास ओलोडुना खालाङ्गाङि होन्डिटाइङे॥ 16एसिया छेट्राङि याप्मा बेला सोम्मा युङ्मा पावालङा निङ्ग्वा चोग्वाट्टुन् नुङ् उन् एफिसास खालाङ्गा मिहोन्ने खाडे, पोङ्भोने लिसे भोने पेन्तिकोसङाना चाडाङि डोक् यरुसलेम एला टामाना निङ्ग्वा चोगुएसुना॥
पावाल एफिसासङिगा ओठेडोङ्चिलोक् सेन्डाना
17पावालङा मिलेटास खालाङ्गालाम्मा एफिसास माङ्पाङ्ङिगा ओठेडोङ्चि छेम्सिङा याप्मिचि पाङ्सुचे॥ 18हिट्नागा हिट्नि ओटायाउङ् पावालङा लोडुचे, “आङा एसियाङि टायाङ्ना लेम्बालाम्मा डोक् खोड्डे पारिक् खानिलोक् युङाङेना हिट्नागा रिङ् खानिङा ओचेट्नुलोक् ठाहा आटोगुएसुम्मे॥ 19याहुदिचिङा याङ्छामा याङ्ओचाट्टाउङ् आखेरिङि याङ्ओठेन्डा चा आङा खाट्टियुना लिसाउङ् हाप्सा टाङ्बाङाना सेवा चोगुङे॥ 20हिट्नुङ् खानि सोब्बे टोकानाङि हिट्नुङ् पाङ्-पाङ्ङि लिन्डुङुङ् खानिलोङ्सा नुना लिना रिङ् हिसिक्मा आङा नानेट्निङ्॥ 21आङा याहुदिचि हिट्नुङ् पानिछोङ्बाचि सोब्बे आ-आप्पे पापलाम्मा काएल्-काबु लिसानिउङ् माङ्हाङ्लेङ् नोक्टानि हिट्नुङ् आनि येसु डाङ्बाङि बिस्वास चोगानुम्” नुङ् पारचार चोगुङे॥
22“हाट्ले खेम्सानुम्, सेङ्सेङ्ना हाङ्साङा याङ्लोडि गाड्डे आङा यरुसलेम खाट्नागेट्नाँ॥ हिट्नि आङालोङ्सा पाक् पाक् लियुटायुक्ना हिट्ना आङा पाक्चा ठाहा टोक्निङ्ना॥ 23टरो आङा खाट्ङाना सोरोक् खालाङ्गाङि सातावाट् हिट्नुङ् खाम्बाङ्ङिना याङ्छामा आङ्मा कोन्युक् नुङ् सेङ्सेङ्ना हाङ्साङा याङ्लोडाना रिङ् आङा ठाहा टोगुएसुङ्ङे॥ 24ना आचोला आङालोङ्सा पाक्चा ठानाँ चोक्निङ्ना॥ ना आचोलाङि येसु डाङ्बाङा याङ्पिडाना टोॽवा चोक्मा हिमा हिट्नुङ् माङ्हाङ्ङाना दायाङाना नुना खाबोर पारचार चोक्मा नुङ् आरु पाक्चा चोक्मा आनिङ्ग्वाङि मिट्निङ्ना॥#२ तिमोथि ४:७
25“हाट्ले खेम्सानुम्, माङ्हाङ् उमुलुक् खानि सोब्बेलोङ्सा आङा पारचार चोक्सा वासाङे, खानिङा फेरि आङा खोना बेला चा आटुबिन्नागा नुङ् आङा ठाहा टोगुएसुङे॥ 26हिट्डेउङ् हाट्लेना लेम्बा खानि साँचि पिसा लोनाँनि, खानि माड्डे खोना चा आमेगिए भोने, हिट्नाङाना फाट्टुर आङा उठुङ्ङि ठानिना॥ 27पोङ्भोने माङ्हाङ्ङा चोगुना ख्वाप्पा योजाना मिठोप्ङे आङा खानि लोनाने॥ 28हाट्ले खानि आप्पेलोङ्सा हिट्नुङ् सेङ्सेङ्ना हाङ्साङा खानि ओठेडोङ् माचोगिउङ् खानि मुक्ङि मापिडिगा बिस्वासिचि नुलोक् पुयानुम्चिम्॥ हिट्नुङ् माङ्हाङ्ङा आप्पे उइछा ओहेलिक्ङा इनुचिगा माङ्पाङ्ङि चा खानिङा नुलोक् पुयानुम्चिम्॥ 29पोङ्भोने आङा खाट्नाजाङाउङ् जाङ्गालि ब्वाँसोचि ओटायुक्, हिट्नुङ् हिट्नागाँ ठुँबाचिगा बागालचि जाखाम् ओचोगुगा गाड्डे डोक् खानि माझाङि माङ्जोगा रिङ् काहिसिक्बाचि उलिक्युक् हिट्नुङ् माङ्पाङ्ङिगा याङ्छामा ओचाट्टुचिगा रिङ् आङा ठाहा टोगुएसुङे॥ 30हिट्नुङ् खानि माझालाम्मा चा माङ्जोगा रिङ् काहिसिक्बा याप्मिचि ओहोन्युक् हिट्नुङ् हिट्नागाँ बिस्वासिचि उन्चिलेङ् ओनोक्टुचिचि॥ 31हिड्डेउङ् ओचाप्पाङ् लिसानिउङ् युङानि॥ आङा सुम्बोक् बारखा टेप्मा लेन्सेन् हाप्सा खानि ओछेक्छेक् चोक्नायाक्नाने॥
32“हाट्ले आङा खानि माङ्हाङ्ङाना उमुक्ङि पिनाँनि हिट्नुङ् उन्ङा आनि आलोडाना ओदायाङाना रिङ्ङाना भोरङि युङानि नुङ् लोनाँनि॥ हिट्डेउङ् माङ्हाङ्ङा बिस्वासङि खानि बोल्लेउ माचोगिटि हिट्नुङ् उन्ङाना ओयाप्मिचि आसिक्ङाना भागिदार चोगुचिचि॥ 33आङा खोना याप्मिचिगा साम्मेङ्, रुपा हिट्नुङ् लोट्लिङ्ङाना लोभा चोक्नेट्निङ्॥ 34आङा आप्पे टोॽवा चोगुङ् आसाइबाचि हिट्नुङ् आङालोङ्सा चाहाब् लिना रिङ् छुम्सुङ्ना खानि सोब्बेङा ठाहा आटोगुएसुम्मे॥ 35नाड्डेडोक् खानिङा चामा-ठुङ्मा आप्पे छुम्मा उहिडुन्गा निम्छारो याप्मिचि घुवार फामा आड्डिक् डोक् टोॽवा चोक्मा कोन्युक् नुङ् आङा निमेट्नाँने॥ हिट्नुङ् ‘टाक्मा नुङ्ना पिडुम्चिम्नाङा डोक् जोम् आसिक् टायुक्’ नुङ् येसु डाङ्बाङा माट्टुना रिङ् मिट्टानुम्॥”
36ना रिङ् पावालङा लोमा हिडुचिउङ् हिट्नागा सोब्बे ओटोङाउङ् टुम्बुट्ङि उयुङाउङ् बिन्टि ओचोगे॥ 37हिट्नागा आड्डिक् टुक्लोक् ओहाबे, हिट्नुङ् पावाल उहुप्टुङ् चुप्पा ओमेट्टुए॥ 38पावालङा हाट्ले आनि फेरि खोना बेला चा टुबिन्गा नुङ् लोडुचिनाँ हिट्नागाँगा आड्डिक् उन्चि निङ्ग्वा टुगे॥ हिट्नुङ् हिट्नागाँ पावाल चुवाखोङ्डाङ् सोम्मा ओसायुढोए॥
Currently Selected:
मुलिचेला टोॽवा 20: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
