मुलिचेला टोॽवा 15
15
यरुसलेमङिना काचाहारि-कुन्डाल
1इम्टेप्मा याप्मिचि याहुदिया छेट्रालाम्मा ओटायाउङ् एन्टिओखिया खालाङ्गाङिगा बिस्वासिचि नाड्डे पिक्सा उहिसिक्टुचे, “मोसाङा छेप्टुना धारमाबिधि गाड्डे खाताना आचोक्नेट्निम् भोने, खानिङा मुक्टि आटोक्निम्ना॥”#लेबि १२:३ 2नाड्डे पारिक्ना हिसिक्मा पावाल लोक् बारनाबासङा खेम्साचुङ् हिट्ना रिङ्ङि टेन्च्याट्चिन् हिट्नुङ् हिट्नागालोक् खेमाबुङ्मा रिङ् चोगाचे॥ हिट्डेउङ् हिट्निगा भुम्भु-झान्झाचिङा ना रिङ् बारेङि मुलिचेलाचि हिट्नुङ् ओठेडोङ्चिलोक् रिङ्पान् चोक्मा लोङ्सा पावाल लोक् बारनाबास हिट्नुङ् आरु याप्मिचि चा यरुसलेमङि पाङ्सुम्चिम् नुङ् निङ्ग्वा ओचोगुए॥ 3हिट्डेउङ् माङ्पाङ्ङिगाँ बिस्वासिचिङा हिट्नागा यरुसलेमङि ओपाङ्सुचे॥ हिट्नागा फोनिके लोक् सामारिया छेट्रालाम्मा उलिसा ओखाडानाँ हिट्निगा बिस्वासिचि उटुबुचे हिट्नुङ् खोड्डे पारिक् पानिछोङ्बाचि चा बिस्वासि उलिसे हिट्ना रिङ् ओखेम्मेटुचे॥ ना रिङ् ओखेम्सुङ् हिट्निगा बिस्वासिचि आड्डिक् हारका उलिसे॥ 4जब हिट्नागा यरुसलेम खालाङ्गाङि ओटासुए, हिट्नुङ् माङ्पाङ्ङिगा बिस्वासिचिङा, मुलिचेलाचिङा हिट्नुङ् एल्डारचिङा हिट्नागा स्वागाट् ओचोगुचे॥ हिट्नुङुना हिट्नागाँ माङ्हाङ्ङा उन्चिलाम्मा चोगुना सोब्बे टोॽवाङाना बारेङि हिट्नागाँ हिट्नि ओखेम्मेट्टुचे॥
5टरो आम्टेप्मा फारिसि छुम्माङिगा बिस्वासिचि ओयेबाउङ् नाड्डे उपिगे, “पानिछोङ्बा बिस्वासिचिङा याहुदि चालान् गाड्डे खाताना चोक्मा डोक् कोन्युक् हिट्नुङ् हिट्नागाँ मोसाङा छेप्टुना धारमाबिधि टेम्मा डोक् कोन्युक्॥”
6हिट्डे लिसाउङ् ना रिङ् बारेङि मुन्डुप्मा मुलिचेलाचि हिट्नुङ् ओठेडोङ्चि उछुमे॥ 7याप्मा बेला सोम्मा उमुन्डुप्टाउङ् पाटरुस कोबाउङ् हिट्नागा लोडुचे, “भुम्बु-झान्झाचि, खानिङि ठाहा युङ्ग्वा, पानिछोङ्बाचिङा नुना खाबोर ओखेम्सु हिट्नुङ् बिस्वास ओचोगु नुङ् पारचार चोक्मा लोङ्सा आम्टेप्मा बेला पाइले खानिलाम्मा माङ्हाङ्ङा आङा याङ्सेगे॥#मुलिचेला टोॽवा १०:१-४३ 8याप्मिचिगा निङ्ग्वा ठाहा काटोक् माङ्हाङ्ङा आनि गाड्डे डोक् पानिछोङ्बा याप्मिचि चा सेङ्सेङ्ना हाङ्सा पिडुचिउङ् हिट्नागा लाडुचिगा रिङ् आनिमेट्टे॥#मुलिचेला टोॽवा २:४; १०:४४ 9उन्ङा याहुदि लोक् पानिछोङ्बा याप्मिचि साम्डुव्ट्टुन्चिन्॥ माङ्हाङ्ङा उन्चि निङ्ग्वा सेङ्सेङ् चोगुबिडुचे, पोङ्भोने हिट्नागाँ टाङ्बाङि बिस्वास ओचोगुए॥ 10नाड्डेउङ् ना टुक्ना याहुदि धारमाबिधि पानिछोङ्बा बिस्वासिचि टेहेक्ङि खुमेट्मा आमेट्टुम्चिम्मुङ् पोङ् गोलो माङ्हाङ्ङाना ओरेक् काट्ना निङ्ग्वा आचोगिटिगा? नाम्टे आनि टुबाठेबाचिङा चा फोग्मा उहिडुवाट्टुन् हिट्नुङ् आनि चा फोग्मा हिनिम्ना॥ 11हिट्नाडे चोगिन्चा, हिट्नागा गाड्डे डोक् आनि चा येसु डाङ्बाङाना दायाङा हिङिना रिङ्ङि आनि बिस्वास चोगुम्ना॥”
12बारनाबास हिट्नुङ् पावालङा उन्चिलाम्मा पानिछोङ्बाचि माझाङि माङ्हाङ्ङा चोगुना डोङ् ठोङ्डिना टोॽवा हिट्नुङ् चिन्ना बारेङि माट्टाचुना बेला काचाहारि-कुन्डालङिगा ख्वाप्पा याप्मिचि स्वाग् मिचेक्ङे खेम्सा उयुङे॥ 13हिट्नुङ् हिट्नागाचि चेक्मा हिडाचिउङ् याकुबङा माट्टुए, “भुम्भु-झान्झाचि, आरिङ् खेम्सानुम्, 14सिमोन पाटरुसङा माङ्हाङ्ङा पाइले आम्टेप्मा पानिछोङ्बाचि खोड्डे पारिक् आप्पे ओयाप्मिचि नुङ् छेम्डुचिगा रिङ् माट्टुए॥ 15ना माङ्काटाचिगा रिङ्लोक् चा टोङ्ना, धारमाछाप्लाङि नाड्डे छेप्टेसे–
16‘हिट्नुङ्ना आङा नोक्ङा टाङा,
हिट्नुङ् दाउदङाना मेगाना ओपाङ्ठाङ् फेरि फोगुङ्टुङ्॥
हिट्नुङ् आङा हिट्ना फ्याङ् जाखाम् लिसाना उमुलुक्
फेरि चोगुङुङ् माङ्बोल्लेउ चोगुङ्बिडुङ्टुङ्,
17हिट्डेउङ् आरु याप्मिचिङा टाङ्बा कोम्मा उहिडु, हिट्नुङ् ख्वाप्पा पानिछोङ्बाचि आप्पे आयाप्मिचि नुङ् आङा छेम्डुङ्चिङे,
टाङ्बाङा माट्टुए, नागा सोब्बे रिङ्चि उन्ङा एडोक् चोगुटु॥
18नागा रिङ् उन्ङा याप्मा बारखा पाइले डोक् याप्मिचि लोडुएसुचिगा॥’#आमोस ९:११-१२ ”
19हिड्डेउङ् याकुबङा नाड्डे पिक्सा माट्सा खाट्टुए, “आनिङ्ग्वाङि, माङ्हाङ्ङि ओनोक्टाउङ् बिस्वास ओचोगुगा पानिछोङ्बाचि याप्मा याङ्छामा चाट्निम्चिम्॥ 20टरो हिट्नागा लोङ्सा नाड्डेना चिट्ठि छेप्टुम्बिडुम्चिम्, ‘मुरतिङि ठाङ्बालाक् थोक्चि पाक्चा चानेनुम्, इम्मेप्माजामा टोॽवालाम्मा ओछेक्छेक् युङानि, हिट्नुङ् साङ्मारिक् उफिन्डुङ् ओसेडुचिगा जिवाट्चिगा उसा हिट्नुङ् ओहेलिक् चानेनुम्॥’#पारस्थान ३४:१५-१७; लेबि १७:१०-१६; १८:६-२३ 21पोङ्भोने मोसाङा छेप्टुना धारमाबिधि आच्छो बेलालाम्मा डोक् सोब्बे खालाङ्गा-खालाङ्गाङि पारचार चोक्येट्, हिट्नुङ् सोरोक् याहुदि छुम्मापाङ्ङि लेम्बासेम्बा युङ्माना लेम्बा पोढाँ चोक्येट्॥”
पानिछोङ्बा बिस्वासिचि लोङ्सा छेप्बालाक् चिट्ठि
22हिट्नुङ्ना मुलिचेलाचि, ओठेडोङ्चि हिट्नुङ् माङ्पाङ्ङिगा सोब्बे बिस्वासिचिलोक् ओटोङाउङ् आम्टेप्मा याप्मिचि ओसेगुचिउङ् एन्टिओखिया खालाङ्गाङि पावाल हिट्नुङ् बारनाबासलोक् पाङ्सुम्चिम् नुङ् निङ्ग्वा ओचोगे॥ हिट्नागाँ याहुदा ओलोडुना बारसाबास हिट्नुङ् सिलास ओसेगुचे, नागाचि बिस्वासि भुम्भु-झान्झाचिङि ओठेडोङ् डाचिगा॥ 23हिट्नागा टेम्बोक् जानाचि मुक्ङि नाड्डे पारिक् चिट्ठि ओहाङ्सुए–
“खानि सोब्बे एन्टिओखिया, सिरिया हिट्नुङ् किलिकियाङि ओवाहेट्गा पानिछोङ्बा बिस्वासिचि लोङ्सा, ना चिट्ठिलाम्मा आन्याँ नेहिगा मुलिचेलाचि हिट्नुङ् ओठेडोङ्चिलाम्मा बाबा ए॥ 24आन्याँ मिपाङ्ङे आम्टेप्मा याप्मिचि खानिङि ओआबाउङ् एकेलेङ्ना रिङ् माहिसिक्टिउङ् खानि याङ्छामा मापिडिउङ् खानि निङ्ग्वा टुगाना रिङ् आन्याँ खेम्सुम्मे॥ 25हिड्नाड्डे लिसानाँ आन्याँ सोब्बे छुमिङाउङ् आन्याँ चोगुम्माना निरनाए खानि सोरि पाङ्मा लोङ्सा आम्टेप्मा याप्मिचि सेगुम्चिम्माउङ् आन्याँ साइबाचि बारनाबास हिट्नुङ् पावाललोक् पाङ्माचिगा निङ्ग्वा चोगुम्मे॥ 26नागाचिङा आनि टाङ्बा येसु खिरिस्टङाना सेवा चोक्मा लोङ्सा उन्चि चोला डोक् छोन्छोन्ङि ठेन्डाइसाचुए॥ 27हिड्डेउङ् याहुदा लोक् सिलास चा नागाचिलोक् खानिङि पाङ्सुएसुम्चिम्मे॥ आन्याँ छेप्टुम्माना रिङ् नागाचिङा चा उन्चि आप्पे यासिलाम्मा डोक् खानि मालोडिटि॥ 28सेङ्सेङ्ना हाङ्सा हिट्नुङ् आन्याँ लोङ्सा नागा चाहाब् लिगा रिङ् नुङ्ना आरु याप्मा रिङ् खानिङा चोक्मा कोन्निना नुङ् ओचेट्नुना लोसिङे॥ 29हिट्डेउङ् साम्माङ्ङि भोक् ओठाङ्सुगा थोक्चि चानेनुम्, हेलिक् ठुङ्नेनुम् हिट्नुङ् ठोॽवारिक् रिङ्बालाक् जिवाट्चिगा सा चानेनुम् हिट्नुङ् इम्मेप्माजामा टोॽवा चोक्नेनिन्, नागा रिङ् आटेन्डिए भोने, खानिलोङ्सा ओचेट्नु लियुक्॥ हाट्ले छेप्माना रिङ् नाट्टेप्मा एना, बाबा ए॥”
30हिट्नुङ् हिट्नागा टेम्बोक् जाना याप्मिचि यरुसलेमलाम्मा ओलाम्टियाउङ् एन्टिओखिया खालाङ्गाङि ओखाडे॥ हिट्नि हिट्नागाँ माङ्पाङ्ङिगा सोब्बे याप्मिचि एक्के ठोङ्ङि उछुमुचिउङ् हिट्ना चिट्ठि जिम्मा उपिडुचे॥ 31हिट्नुङ् हिट्ना चिट्ठिङि छेप्बालाक् रिङ् बिस्वासिचिङा पोढाँ ओचोगुए हिट्नुङ् आँट् ओटोगुङ् आड्डिक् उन्चि चाप् टाए॥ 32याहुदा हिट्नुङ् सिलास चा माङ्काटा ए, हिट्डेउङ् नागाचिङा येसु डाङ्बाङि बिस्वास काचोक् भुम्बु-झान्झाचि छोम्बोक् चोक्सा हिट्नुङ् बिस्वासङि बोल्लेउ चोक्मा लोङ्सा जोम् रिङ् माट्टाचुए॥ 33हिट्नि हिट्नागा याप्मा लेम्बा सोम्मा उयुङे हिट्नुङ् हिट्निगा बिस्वासि भुम्भु-झान्झाचिङा “हाङ्हाङ् लिसानिउङ् खाडानि” पिक्सा ओनोक्टु पाङ्सुचे॥ 34[टरो सिलासम्बाक् हिट्नि डोक् युङ्माना निङ्ग्वा चोगुए॥]#१५:३४ ना पोद बाइबलङाना मुलि सोरोतङि टोग्निना॥ 35पावाल लोक् बारनाबासम्बाक् एन्टिओखियाङि युङाचे॥ हिट्नागाचि हिट्नुङ् आरु जोम् याप्मिचिङा टाङ्बाङाना रिङ् हिट्नि याप्मिचि उहिसिक्टुचे हिट्नुङ् पारचार ओचोगुए॥
पावाल हिट्नुङ् बारनाबास साम्डाचिगा
36आम्टेप्मा लेम्बा ओएङ्स्वा पावालङा बारनाबास लोडुए, “हाट्ले आन्चि फेरि नोक्चि खाट्च्याक् हिट्नुङ् आन्चिङा माङ्हाङ्ङाना रिङ् पारचार चोगाचुना खालाङ्गाङिगा बिस्वासि भुम्भु-झान्झाचि खोड्डे पारिक् ओवाहेट्गा ठोम्चुचि॥” 37बारनाबासङा मारकुस ओलोडुना युहान्ना उन्चिलोक् खाप्माना निङ्ग्वा चोगुए॥ 38टरो पावालङाम्बाक् मारकुस उन्चिलोक् खाप्मा नुलोक् लोनेट्नि, पोङ्भोने उन्ङा पामफिलिया छेट्रालाम्मा हिट्नागाचि पोक्टुढोचिउङ् खाडे हिट्नुङ् हिट्नागाचिलोक् आरु डेन्ङि टोॽवा चोक्मा लोङ्सा खाट्नेट्नि॥#मुलिचेला टोॽवा १३:१३ 39हिट्ना रिङ्ङि पावाल लोक् बारनाबासङाना आड्डिक् टुक्लोक् उन्चि निङ्ग्वा टोङ्नेट्नि हिट्नुङ् हिट्नागाचि साम्डाचे॥ बारनाबासङा मारकुस खाट्टुङ् चुवाखोङ्डाङ्ङि ठाङाचिउङ् साइपारसलेङ् खाडाचे॥ 40टरो पावालङा सिलास सेगुए॥ हिट्नुङ् बिस्वासि भुम्भु-झान्झाचिङा पावाल लोक् सिलास लोङ्सा टाङ्बाङाना घुवार ओनाक्टुबिडुचे हिट्नुङ् हिट्नागाचि हिट्निलाम्मा लाम्टियाचे॥ 41हिट्नागाचि सिरिया हिट्नुङ् किलिकिया छेट्रा लिसा खाडाचिनाँ हिट्निगा माङ्पाङ्ङिगा बिस्वासङि बोल्लेउ चोक्सा खाडाचे॥
Currently Selected:
मुलिचेला टोॽवा 15: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
