मुलिचेला टोॽवा 13
13
बारनाबास हिट्नुङ् सावाल ओसेगुचिगा
1एन्टिओखिया खालाङ्गाङिना माङ्पाङ्ङि माङ्काटाचि हिट्नुङ् काहिसिक्बा याप्मिचि ओवासेट्टागा॥ हिट्नि बारनाबास, माक्ना ओलोडुना सिमियोन, कुरेनिलाम्मा आबाना लुकियास, हेरोद हाङ्बालोक् पोयाना मनेन हिट्नुङ् सावाल डाना॥ 2ठिक् लेम्बा हिट्नागा उपासा उयुङाउङ् टाङ्बाङाना माङ्ध्यान् ओचोगेट्टागा बेला सेङ्सेङ्ना हाङ्साङा नाड्डे लोडुचे, “बारनाबास हिट्नुङ् सावाल जुन् टोॽवा लोङ्सा सेगुएसुङ्चिङे हिट्ना टोॽवाङि डोक् हिट्नागाचि साम्डानुम्चिम्॥” 3हिट्डेउङ् हिट्नागाँ उपासा हिट्नुङ् बिन्टि ओचोगुङ् हिट्नागाचि उठुङ्ङि उन्चि मुक् उयुङ्सुङ् उन्चि टोॽवाङि ओपाङ्सुचे॥
बारनाबास हिट्नुङ् सावाल साइपारसङि
4सेङ्सेङ्ना हाङ्साङा पाङ्सुचिगा बारनाबास हिट्नुङ् सावाल एन्टिओखिया खालाङ्गालाम्मा सिलुकिया खालाङ्गाङि खाडाचे॥ हिट्निलाम् हिट्नागाचि चुवाखोङ्डाङ्ङि ठाङाचिउङ् साइपारस टापुलेङ् खाडाचे॥ 5हिट्नुङ् सालामिस ओलोडुना खालाङ्गाङि टासाचुङ् हिट्नागाचि याहुदिचिगा छुम्मापाङ्ङि लिगाचिउङ् माङ्हाङ् रिङ् पारचार चोगाचुए॥ उन्चि घुवार फामा मारकुस ओलोडुना युहान्ना चा हिट्नागाचिलोक् वासेट्टाना॥
6हिट्नागाचि ख्वाप्पा साइपारस टापु टेप् वासाचिउङ् पाफोस ओलोडुना खालाङ्गाङि होन्डा टायाचे॥ हिट्नि हिट्नागाचिङा ठिबाङ् बार-येसु ओलोडुना याहुदि चाटाके टुबाचुए॥ हिट्नाङा “आङा माङ्काटा” पिक्सा माट्टुना डाना॥ 7हिट्ना चाटाके ठिबाङ् सासाक् सारगियास पौलुस ओलोडुना याप्मिङाना ओसाइबा डाना॥ सारगियास पौलुस ठोना लिसाना याप्मि डाना॥ हिट्नाँ माङ्हाङ् रिङ् खेम्माना निङ्ग्वा चोगुङ् बारनाबास हिट्नुङ् सावाल छेम्मा पाङ्सुचे॥ 8टरो हिट्ना चाटाके एलुमासङा (गिरिक् रिङ्ङि एलुमासङा उटुप् चाटाके लियुक्) बारनाबास लोक् सावाल बान्डुचे, हिट्नुङ् सारगियास पौलुस बिस्वास चोक्मालाम्मा छाक्मा कोलुए॥ 9टरो सावाल, उन् पावाल चा ओलोडुए, उन् सेङ्सेङ्ना हाङ्साङा इप्टुङ् एलुमासलेङ् पुयुङ् लोडुए, 10“खान् सोब्बे ओचेट्नुना रिङ्ङाना साट्टुर, ओचाफेन्ना टोॽवा काचोक्बा हिट्नुङ् माक्ना निङ्ग्वाङा माइप्टाना खान् सैतानङाना उइछा, पाक् खान् टाङ्बाङाना छेम्बाना लाम्बो बिरुद्दाङि चेक्मा आनाडुन्नै? 11हाट्ले खेम्सु, टाङ्बाङाना साजाए खान्ङि ठाइसे॥ खान् याङ्कानिनिबा आलियुङ् आम्टेप्मा बेला सोम्मा नाम् छेमा निमा आनाडुटु॥” हिट्ना बेला डोक् खिमेमा हिट्नुङ् माकुन्धेरेक्ङा एलुमास टेप्टुए हिट्नुङ् याङ्कानिनिबा लिसाडे, हिट्नुङ् कोइङा आमुक्ङि ओलाप्मा नुङ् याम्बा-नायाम्बा घुवार कोम्मा ठालाँ चोगुए॥
12हिट्नुङ् ना घाट्ना लिसाना निसुङ् सारगियास पौलुसङा बिस्वास चोगुए, पोङ्भोने टाङ्बाङाना हिसिक्मा बारेङि ना सासाक् डोङ् ठोङ्डेसाना॥
पावाल हिट्नुङ् बारनाबास पिसिडियाङि
13हिट्नुङ्ना पावाल हिट्नुङ् ओसाइबाचि पाफोस खालाङ्गालाम्मा चुवाखोङ्डाङ्ङि ओठाङाउङ् पामफिलिया छेट्राङिना पारगा खालाङ्गाङि ओटासुए॥ हिट्नुङ् मारकुस ओलोडुना युहान्नाङा पावाल लोक् बारनाबास नाडुढोचिउङ् यरुसलेमलेङ् नोक्टे॥ 14टरो पावाल लोक् बारनाबास पारगालाम्मा पिसिदिया छेट्राङाना एन्टिओखिया खालाङ्गाङि खाडा चे, हिट्नुङ् युङ्माना लेम्बा#१३:१४ युङ्माना लेम्बाम्बाक् याहुदिचिगा युङ्माना लेम्बा नुङ् बुजा लियुक्॥ याहुदि छुम्मापाङ् भिट्रा खाडाचिउङ् युङाचे॥ 15मोसाङा छेप्टुना धारमाबिधि हिट्नुङ् माङ्काटाचिगा छाप्ला पोढाँ चोक्मा उहिडुङ् याहुदि छुम्मापाङ्ङिना ओठेडोङ्चिङा पावाल लोक् बारनाबास नाड्डेना खाबोर ओहाक्टुचे, “हाउ साइबाचि, खान्चिलोक् याप्मिचि आँट् आपिना खाबोर माप्माना युङ्ग्वा भोने माट्टाचु॥”
16ना रिङ् खेम्सुङ् पावाल कोबाउङ् उमुक्ङाना इसाराङा सान्ता चोगुचिउङ् लोडुचे, “हाउ, इस्राइलि भुम्बु-झान्झाचि हिट्नुङ् माङ्हाङ्ङाना सेवा काचोक्बा पानिछोङ्बाचि, आरिङ् खेम्सानुम्॥ 17खानि इस्राएलि याप्मिचिङा माङ्ध्यान् आचोगुम्ना माङ्हाङ्ङा आनि टुबाठेबाचि सेगुचे, हिट्नुङ् हिट्नागा मिस्रा देसङि ओवासागा बेला जोम् चोगुचे॥ हिट्नुङ् माङ्हाङ्ङाना ओबोल्ङा हिट्नागा मिस्रा देसलाम्मा होट्टुचिउङ् आप्टुचे॥#पारस्थान १:७; १२:५१ 18हिट्नुङ् हिट्नागा खुसुना डेन्ङि ओवासाना बेला चालिस बारखा सोम्मा हिट्नागा पुयुचे॥#गान्ति १४:३४; धारमाबिधि १:३१ 19उन्ङा कानान देसङिगा सि छोङ्बाचि जाखाम् चोगुचे हिट्नुङ् हिट्ना देस आनि टुबाठेबाचि पिडुचे॥#धारमाबिधि ७:१; याहोसु १४:१
20“हिट्ना बेला सोम्मा चार साए पाचास बारखा टेप्मा लिमाहिडैसाना॥ हिट्नुङ्ना माङ्हाङ्ङा माङ्काटा सामुएल ओपाला सोम्मा सासान् चोक्मा न्याए काचोक्चि पिडुचे॥#न्याएकारता २:१६; १ सामुएल ३:२० 21हिट्नुङ् आनि टुबाठेबाचिङा हाङ्बाङाना रिङ् ओहोट्टुए, हिट्नुङ् माङ्हाङ्ङा बेन्यामिन पुङ्लाङिना किसङा उइछा साउल हाङ्बा चोगुए हिट्नुङ् उन्ङा चालिस बारखा सोम्मा सासान् चोगुए॥#१ सामुएल ८:५; १०:२१ 22हिट्नुङ् माङ्हाङ्ङा साउल हाङ्बालाम्मा होट्टुए हिट्नुङ् दाउद हाङ्बा चोगुए॥ हिट्नुङ् दाउदङाना बारेङि माङ्हाङ्ङा नाड्डे माट्टुए, ‘आङा यिसैङाना उइछा दाउद आनिङ्ग्वा गाड्डेना याप्मि टुबुङे, उन्ङा डोक् सोब्बे आनिङ्ग्वाङिना रिङ् युडुटु॥’#१ सामुएल १३:१४; १६:१२; छाम्लोमा छाप्ला ८९:२०
23“माङ्हाङ्ङा चामारसिङा चोगु गाड्डे डोक् दाउद उपुङ्लालाम्मा इस्राएलि याप्मिचि लोङ्सा ठिबाङ् काहिङ्मेप्बा डाङ्बा येसु पाङ्सुए॥ 24येसु टामा नुङ्ना पाइले बाप्टिस्मा कापिबा युहान्नाङा इस्राएलङिगा ख्वाप्पा याप्मिचि ‘आ-आप्पे पापलाम्मा काएल्-काबु लिसानिउङ् बाप्टिस्मा चोगानि’ पिक्सा पारचार चोगुए॥#मारकुस १:४; लुका ३:३ 25हिट्नुङ् युहान्नाङा ओटोॽवा चोक्मा लाट्मा बेला याप्मिचि नाड्डे लोडुचे, ‘आङा साइना नुङ् खानि आमिट्टिटिगा? आङा हिट्ना याप्मि माखाक्, टरो खेम्सानुम्, आङा नुङ्ना एङ्स्वाङि ठिबाङ् टायुक्, आङा ओलाङ्सुप्ङाना उरिप्मा फेम्माबिमा चा याङ्खान्ना नुना याप्मि माखाक्॥’#मात्ति ३:११; मारकुस १:७; लुका ३:१६; युहान्ना १:२०,२७
26“हाउ आब्राहामङाना छालेट्चि लोक् माङ्हाङ्ङि माङ्ध्यान् काचोक्बा पानिछोङ्बाचि, ना मुक्टिङाना खाबोर आनि सोब्बेलोङ्सा माङ्हाङ्ङा पाङ्सुएसुए॥ 27टरो यरुसलेमङि उयुङागा याप्मिचि हिट्नुङ् उन्चि ओठेडोङ्चिङा येसु काहिङ्मेप्बा डाङ्बा नुङ् मिसेन् उनिस्वाट्टुन्॥ हिट्नुङ् माङ्काटाचिङा धारमाछाप्लाङि ओछेप्टुगा रिङ् सोरोक् युङ्माना लेम्बा हिट्नागाँ पोढाँ ओचोगु चा उटिग्वाट्टुन्, हिट्नुङ् येसु सेप्मा ओमेट्टुङ् ओबारेङि छेप्बालाक् रिङ् हिट्नागाँ उयुडुए॥ 28हिट्नुङ् येसु सेप्मा डोक् कोन्डाना रिङ् पाक्चा उटुबुवाट्टुन् नुङ् हिट्नागाँ ‘उन् सेप्मा डोक् कोन्युक्’ पिक्सा पिलातास ओलोडुए॥#मात्ति २७:२२-२३; मारकुस १५:१३-१४; लुका २३:२१-२३; युहान्ना १९:१५ 29हिट्नुङ् धारमाछाप्लाङि ओबारेङि छेप्टागा सोब्बे रिङ्चि हिट्नागाँ पुरो चोक्मा उहिडुङ् हिट्नागाँ उन् खाप्चेलाम्मा ओहोट्टुङ् उहुम्पाङि उयुङ्सुए॥#मात्ति २७:५७-६१; मारकुस १५:४२-४७; लुका २३:५०-५६; युहान्ना १९:३८-४२ 30टरो माङ्हाङ्ङा येसु सियानालाम्मा उहिङ्ग्वाट् चोगुए॥ 31हिट्नुङ् उन्लोक् गालिल छेट्रालाम्मा यरुसलेमङि ओआबागा सोरि याप्मा लेम्बा सोम्मा उन् ठेट्टायाक्टे॥ हाट्ले हिट्नागा डोक् इस्राएलि याप्मिचिलोङ्सा साँचि कापिबा ओवाहेट्॥#मुलिचेला टोॽवा १:३
32“हिट्नुङ् माङ्हाङ्ङा आनिगा टुबाठेबाचिलोक् चोगुना माङ्हुप्ङाना हिट्ना नुना खाबोर लोसिङा आन्याँ खानि सोरि टाइसिङे, 33माङ्हाङ्ङा येसु सियानालाम्मा उहिङ्ग्वाट् चोगुङ् हिट्ना माङ्हुप् आनि ओछालेट्चि हिट्नुङ् आरु लोङ्सा आयुडाबिडैसे॥ छाम्लोमा छाप्लाङाना इप्पोक् खान्डाङि येसुङाना बारेङि नाड्डे छेप्टेसे–
‘खान् आइछा ए,
हाट्ले लेम्बा आङा काप्पा लिसैसाङे॥’#छाम्लोमा छाप्ला २:७
34“माङ्हाङ्ङा येसु काइले चा उहुम्पाङि रोग्निलोक् सियानालाम्मा उहिङ्ग्वाट् चोगुना बारेङि नाड्डे माट्टुएसुए–
‘आङा दाउदलोक् माङ्हुप् चोगुङ्ना सेङ्सेङ्ना
हिट्नुङ् लाट्निना आसिक् खानिलोङ्सा पिनाँनि॥’#यासैया ५५:३
35“हिट्नुङ् आरको ठोङ्ङि नाड्डे चा छेप्टेसे–
‘सेङ्सेङ्ना कासेवाक्ङाना ओयेम्
उहुम्पाङि खान्ङा रोग्मा आपिडुन्ना॥’#छाम्लोमा छाप्ला १६:१०
36“ना रिङ् दाउदङा आप्पे उन्ङाना बारेङि माट्टुना माखाक्, पोङ्भोने उन्ङा ओटालाङि माङ्हाङ्ङाना टोॽवा चोगुए हिट्नुङ् उन् सिए हिट्नुङ् उटुबाठेबाचिलोक् उहुमुए हिट्नुङ् ओयेम् रोगाडे॥ 37टरो माङ्हाङ्ङा येसु सियानालाम्मा उहिङ्ग्वाट् चोगुए हिट्नुङ् ओयेम्बाक् रोग्नेयाट्नि॥
38“हिट्डेउङ् भुम्बु-झान्झाचि, खेम्सानुम्, ना येसुलाम्मा डोक् माङ्हाङ्ङा आनि पापचि माफ आपियुक् नुङ् ना खाबोर आन्याँ खानि लोङ्सा पारचार चोगुम्टुम्मा॥ 39येसुङि बिस्वास काचोक्चि ख्वाप्पालोङ्सा माङ्हाङ्ङा सोब्बे रिङ्लाम्मा छुट्कारा पिडुचिचि॥ मोसाङाना धारमाबिधिङा चोक्मा हिडुवाट्टुन्ना टोॽवा खानिलोङ्सा उन्ङा माचोगिबिडेसे॥ 40हिट्डेउङ् ओछेक्छेक् युङानि, हिट्नुङ् माङ्काटाचिङा ओमाट्टुगा नागा सोब्बे रिङ्चि खानि उठुङ्ङि उठानि चा–
41‘खेम्सानुम्, हाउ चिम्मा काफुट्चि, डोङ् ठोङ्डानि हिट्नुङ् मेगाडानि,
पोङ्भोने खानि बेलाङि आङा ठिक् टोॽवा चोगुङ्टुङ्,
नाड्डेना टोॽवा हिट्ना बारेङि कोइङा मालोडि चा खानिङा काइले चा बिस्वास आचोक्निम्ना॥’#हाबाकुक १:५”
42पावाल लोक् बारनाबास याहुदि छुम्मापाङ्लाम्मा होन्डा खाडाचिनाँ याप्मिचिङा “फेरि आरको युङ्माना लेम्बा चा आबाचिउङ् नागा रिङ् याप्मिलोडा” पिक्सा ओछेम्डुचे॥ 43हिट्नुङ् बैठाक लाट्टाउङ् जोम् याहुदिचि हिट्नुङ् याहुदि धारमा बिस्वास काचोक्बा पानिछोङ्बाचिङा पावाल लोक् बारनाबास रोक् उरिक्टुचे॥ पावाल हिट्नुङ् बारनाबास हिट्नागालोक् रिङ्पान् चोगाचिउङ् सोरोक् माङ्हाङ्ङाना दायाङि युङानि नुङ् लोडाचुचे॥
44हिट्नुङ् आरको युङ्माना लेम्बा टाङ्बाङाना रिङ् खेम्सिङा खालाङ्गाङिगा सोब्बे याप्मिचि ओटाए॥ 45याहुदि ओठेडोङ्चिङा जोम् याप्मिचि उनिसुचिउङ् औधि उन्चि याक्लेडे॥ हिट्नुङ् पावालङा माट्टुना रिङ्चि खोक्सा उन् ओचाफेन्लोक् ओलोडुए॥
46टरो पावाल लोक् बारनाबास मिकेट्ने नाड्डे चेक्टाचे, “माङ्हाङ्ङाना रिङ् पाइला आन्याँ खानि याहुदिचिङि डोक् पारचार चोक्मा कोलाना डाना॥ टरो खानिङा ना रिङ् इन्कार आचोगुम्मे हिट्नुङ् लाट्निना चोला टोग्मा याप्मि खान्निना नुङ् खानिङा पारमान् आचोगुमे॥ हिट्डेउङ् आन्याँ खानिलाम्मा पानिछोङ्बाचि सोरि खाडिटिङा॥ 47पोङ्भोने टाङ्बाङा आन्याँ नाड्डेना आग्याँ याप्मि पिडैसे–
‘नारा टेप्गा याप्मिचिङा मुक्टि ओटोगु नुङ्
आङा खान् पानिछोङ्बाचि सोरि व्हाङ् लिसा नुङ् पाङ्नेने’॥”#यासैया ४२:६; ४९:६
48ना रिङ् ओखेम्सुङ् पानिछोङ्बाचिगा औधि उन्चि चाप् टायाउङ् टाङ्बाङाना रिङ्ङाना उनिङ् ओचोन्डुए॥ हिट्नुङ् लाट्निना चोला लोङ्सा सेग्बालाक्चि टेप्माङा बिस्वास ओचोगुए॥
49हिट्नुङ् टाङ्बाङाना रिङ् हिट्ना छेट्रा ख्वाप्पालेङ् छिन्डे॥ 50टरो पावाल हिट्नुङ् बारनाबासङाना बिरुद्दाङि याहुदिचिङा धारमोति याप्मिचि हिट्नुङ् निङ् मुक्टागा मेच्छेमाचि लोक् खालाङ्गाङिगा मुलि-मुलि याप्मिचि ओफोगुचे॥ हिट्नुङ् हिट्नागाँ पावाल लोक् बारनाबास हिट्ना छेट्राङाना साँधेरिलाम्मा भारा उरिक्टुचे॥ 51हिट्नाडेउङ् हिट्नागाचिङा हिट्नागा याप्मिचि माङ्हाङ्ङा डोक् न्याए ओचोगुच्याक् पिक्सा हिट्नागाँगा बिरुद्दाङि उन्चि लाङ्ङिना खाम्धारि ठाम्साचुए हिट्नुङ् आइकोनियान खालाङ्गालेङ् खाडाचे॥#मात्ति १०:१४; मारकुस ६:११; लुका ९:५; १०:११ 52हिट्नुङ् एन्टिओखियाङिगा बिस्वासिचि आड्डिक् हारका उलिसे हिट्नुङ् सेङ्सेङ्ना हाङ्साङा इप्टुचे॥
Currently Selected:
मुलिचेला टोॽवा 13: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
