मुलिचेला टोॽवा 10
10
पाटरुस हिट्नुङ् कारनालियास
1कैसारिया खालाङ्गाङि कारनालियास उनिङ् लिसाना ठिबाङ् याप्मि डाना॥ उन् रोमि उपिङ्बाचिगा “इटालिया ओलोडुना पोल्टानङाना काप्तान” डाना॥ 2उन् धारमोति याप्मि डाना॥ उन्लोक् ओपाङ्ङिगा याप्मिचि सोरोक् माङ्हाङ्ङि माङ्ध्यान् ओचोगागा॥ उन्ङा पाक्चा ओवानिगा याप्मिचि उनिङ्ग्वालाम्मा डोक् घुवार फाडुचिगा, हिट्नुङ् माङ्हाङ्ङि लेम्बासेम्बा बिन्टि चोगाना॥ 3ठिक् लेम्बा लेन्ना सुम्बोक् बाजाँ लिसाना बेला कारनालियासङा ठिक् निमापुमा निसुए॥ हिट्ना निमापुमाङि माङ्हाङ् रिङ् काउग्बा उन्लेङ् उङ्सागेट्टाना पारचिन्दा निसुए॥ हिट्नुङ् हिट्ना माङ्हाङ् रिङ् काउग्बाङा, “हाउ कारनालियास” पिक्सा छेम्डुए॥
4उकिप्माङा कारनालियासङा माङ्हाङ् रिङ् काउग्बा पुयुना पुयुना डोक् लिसे हिट्नुङ् लोडुए, “हाउ आडाङ्बा, याङ्लोडा॥”
हिट्ना माङ्हाङ् रिङ् काउग्बाङा उन् लोडुए, “खान्ङा आचोगुना बिन्टि हिट्नुङ् पाक्चा ओवानिगा घुवार आफाडुचिउङ् लुक्मा आटुक्टुचिगा रिङ् माङ्हाङ् सोरि ठाहा लिसाइसे॥ 5हाट्ले योप्पा खालाङ्गाङि सिमोन ओलोडुना याप्मि छेम्सिङा याप्मिचि पाङ्सुचि, उन् पाटरुस चा ओलोडुए॥ 6उन् ओहोॽवाङाना टोॽवा काचोक्बा सिमोनङाना ओपाङ्ङि युङ्ग्वा, हिट्नाँ ओपाङ् सामुन्दरा सोरि युङ्ग्वा॥”
7नाट्टेप्मा माट्टुङ् माङ्हाङ् रिङ् काउग्बा खाडे॥ हिट्नुङ् कारनालियासङा इप्पाङ् ओचाकारचि हिट्नुङ् सोरोक् ओसेवा काचोक्बा ठिबाङ् धारमोति टिलिङ्गा छेम्डुचे॥ 8हिट्नुङ् उन्ङा निसुगा ख्वाप्पा रिङ्चि लोडुचिउङ् योप्पाङि पाटरुस लोहोट्सिङा पाङ्सुचे॥
9हान्डेङ् गाड्डे हिट्नागा योप्पा खालाङ्गाङाना नेहेट्टाङ् ओटासुनाँ, लेम्बा बारा बाजाँ लिसाना बेला पाटरुस बिन्टि चोक्ङा उठुङिना पाङ् बारान्डाङि खाडे॥ 10बिन्टि चोगेट्टेना बेला आड्डिक् ओसाक्वासे हिट्नुङ् पालोवालो चामा निङ्ग्वा चोगुए॥ हिट्नुङ् आरुङा चामागा थोक्चि उठुक्टुएट्टुना बेला उन्ङा ठिक् निमापुमा निसुए॥ 11उन्ङा टाङ्साङ् ओङ्साना निसुए हिट्नुङ् हिट्नि टोलाम्मा ठेना टाखुम्बि गाड्डेना टेम्बोक् ओफेरोङि रेक्बालाक् यो नाराङि ठायागेट्टाना निसुए॥ 12हिट्ना टाखुम्बिङि नाराङिगा ख्वाप्पा पारिक् पारिक्गा जानावारचि, सोट्सा ओलाम्टिगा जिवाट्चि हिट्नुङ् टाङ्साङ्ङिगा नुवाचि, हिट्नुङ् हिट्नि याहुदिचिङा चामा उलिनिगा थोक् चा युङासागा॥ 13टब पाटरुसङा नाड्डेना रिङ् मुक्टाना खेम्सुए, “हाउ पाटरुस, कोबा हिट्नुङ् हिट्नागा सेडुचिउङ् चो॥”
14पाटरुसङा लोडुए, “माखाक् टाङ्बा, नाड्डेगाम्टे आङा चानिङ्गा॥ हाट्ले सोम्मा चामा लिनिगा हिट्नुङ् आसुद्दो थोक्चि आङा काइले चा चानिङ्गेट्निङ्गा॥”
15हिट्नुङ् फेरि नाड्डेना साब्दा मुक्टे, “माङ्हाङ्ङा सेङ्सेङ् चोगुगा चामागा थोक्चि खान्ङा आसुद्दो माट्टुन्॥”
16नाड्डेना घाट्ना सुम्बोक् खेप् सोम्मा लिसे, हिट्नुङ् हिट्ना टाखुम्बि फेरि टो टाङ्साङ्लेङ् डोक् फोगाडे॥
17पाटरुसङा ना निमापुमाङाना उटुप् पाइना गोलो पिक्सा उनिङ्ग्वाङि मिट्सा डोङ् ठोङ्डाइसाना, हिट्ना बेला डोक् कारनालियासङा पाङ्सुचिगा याप्मिचि सिमोन ओपाङ् कोन्सा ढुवारिक्ङि ओहोन्डा ओटाए॥ 18हिट्नुङ् हिट्नागाँ, “सिमोन ओलोडुना पाटरुस नेहि युङ्ग्वा नि वाइना इ?” पिक्सा उसिलाप्टुचे॥
19हिट्नुङ् पाटरुसङा आझै चा ना निमापुमा पाइना गोलो पिक्सा उनिङ्ग्वाङि मिट्टुएट्टुना बेला सेङ्सेङ्ना हाङ्साङा लोडुए, “सिमोन, सुम्बाङ् याप्मिचि खान् कोन्सिङा ओटाइसे॥ 20हिड्डेउङ् खान् कोबाउङ् यो खाडा, हिट्नुङ् साङ्का मिचोक्ङे हिट्नागालोक् खाडा, पोङ्भोने हिट्नागा आङा डोक् पाङ्सुङ्चिङ्गा॥”
21हिड्डेउङ् पाटरुस यो खाडाउङ् हिट्नागा लोडुचे, “खानिङा आकोलुम्ना याप्मि आङा डोक्॥ खानि पाक् टोॽवाङा नेहि आटाइसिएगा?”
22हिट्नागाँ उन् ओलोडुए, “काप्तान कारनालियासङा आन्याँ याप्मि पाङ्साना॥ उन् धारमोति हिट्नुङ् माङ्हाङ्लोक् किट्ना हिट्नुङ् सोब्बे याहुदिचिङा आड्डिक् डोक् मान् ओचोगुना याप्मि ए॥ ठिबाङ् सेङ्सेङ्ना माङ्हाङ् रिङ् काउग्बा उन्ङि ठेट्टे हिट्नुङ् ओपाङ्ङि खान् खाप्मा हिट्नुङ् कारिङ् ओखेम्सुवाक् नुङ् उन् लोडुए॥” 23ना रिङ् खेम्सुङ् पाटरुसङा हिट्नागा पाङ् भिट्रा छेम्डुचिउङ् स्वागाट् चोगुचे हिट्नुङ् हिट्ना युसा हिट्नागा हिट्नि डोक् उयुङे॥ हान्डेङ् भ्यानिक् पाटरुस टेयार लिसाउङ् हिट्नागालोक् खाडे, हिट्नुङ् योप्पाङिगा आम्टेप्मा भुम्भु-झान्झाचि चा उन्लोक् ओखाडे॥ 24आरको लेम्बा हिट्नागा कैसारियाङि ओटासुए॥ कारनालियासङा ओनातेदारचि हिट्नुङ् ओसाइबाचि चा छेम्डुएसुचिगा हिट्नुङ् उन्चिङा हिट्नागा ओहाङ्सुएट्टुचिगा॥ 25पाटरुस पाङ् भिट्रा लिगागेट्टाना बेला कारनालियास गुङ् चोगाउङ् ओलाङ्ङि स्या मेट्टुए॥ 26टरो पाटरुसङा हिट्ना फोगुङ् लोडुए, “कोबा, आङा चा याप्मि नाथु डोक् टे॥” 27पाटरुस कारनालियासलोक् मुन्डुप्सा पाङ्ङि लिगे॥ हिट्नि उन्ङा जोम् याप्मिचि उछुमाउङ् उयुङागा निसुचे॥ 28हिट्नुङ् पाटरुसङा हिट्नागा लोडुचे, “आन्याँ धारमाबिधिङि याहुदि याप्मि लोङ्सा पानिछोङ्बाचि पाङ्ङि खाप्मा, एक्केउ टुब्माजामा लिमा डोक् लिनिना रिङ् खानि सोब्बेङा नुलोक् ठाहा आटोगुएसुम्मे॥ टरो माङ्हाङ्ङा आङा खोना याप्मि चा आसुद्दो लोडुन्चिन् पिक्सा याङ्निमेट्टैसे॥ 29हिड्डेउङ् खान्ङा आपाङ्सुचिगा याप्मिचिलोक् पाक्चा मिपिग्ङे आङा नेहि आबाङे॥ हाट्ले माट्टुवाक्, पोङ् खान्ङा आङा याङ्आछेम्डाङेना?”
30कारनालियासङा उन् लोडुए, “टेम्बोक् लेम्बा पाइले लेम्बा सुम्बोक् बाजाँ लिसाना बेला आङा आपाङ्ङि डोक् बिन्टि चोक्सा युङैसाङ्ना॥ हिट्ना बेला डोक् ओम्साना लोट्लिङ् वाडुना ठिबाङ् याप्मि आटोकानाङि ठेट्टे॥ 31हिट्नुङ् याङ्लोडे, ‘हाउ कारनालियास, खान्ङा आचोगुना बिन्टि माङ्हाङ्ङा खेम्सुएसुए हिट्नुङ् पाक्चा ओवानिगा घुवार आफाडुचिउङ् लुक्मा आटुक्टुचिगा रिङ् उन्ङा यान्दा चोगुएसुए॥ 32हाट्ले योप्पा खालाङ्गाङि सिमोन ओलोडुना याप्मि छेम्मा याप्मिचि पाङ्सुचि, उन् पाटरुस चा ओलोडुना॥ उन् ओहोॽवाङाना टोॽवा काचोक्बा सिमोनङाना ओपाङ्ङि युङ्ग्वा, हिट्नाँ ओपाङ् सामुन्दरा सोरि युङ्ग्वा॥’ 33हिट्डेउङ् आङा हिट्ना बेला डोक् खान् लोहोट्सिङा याप्मिचि पाङ्सुङ्चिङे, हिट्नुङ् खान् चा नेहि आटाए, ओचेट्नु डोक् लिसे॥ ना बेला आन्याँ माङ्हाङ् ओटोकानाङि वासेट्टिङा हिट्नुङ् टाङ्बाङा खान् पाक् लोमा लोङ्सा आग्याँ मापिडैसेना हिट्ना रिङ् खेम्मा आन्याँ टेयार लिसिएसिङे॥”
पाटरुसङा नुना खाबोर पारचार चोगुटु
34ना रिङ् खेम्सुङ् पाटरुसङा माप्मा ठालाँ चोगुए, “माङ्हाङ्ङा याप्मिचि ठिक्ए चाट्ला मेट्टुचिगा रिङ् हाट्ले आङा ठाहा टोगुङे॥#धारमाबिधि १०:१७ 35याप्मि जुन्सुके छोङ्बाङाना उलियाक्, माङ्हाङ् मान् काचोक्बा हिट्नुङ् ओचेट्नुना टोॽवा काचोक्चि उन्ङा लाडुचिगा रिङ् छेम्बा डोक् ए॥ 36खानिङा ठाहा आटोगुएसुम्मे, माङ्हाङ्ङा येसु खिरिस्टलाम्मा हाङ्हाङ् लिसिनाँ नुना खाबोर इस्राएलि याप्मिचि सोरि पाङ्सुए, उन् डोक् सोब्बेङाना टाङ्बा॥ 37युहान्नाङा पारचार चोगुना बाप्टिस्मालाम्मा नाॽया गालिल छेट्रालाम्मा उटुम् लिसाउङ् याहुदिया देस टेप् लिसाना घाट्ना ख्वाप्पा खानिङा ठाहा आटोगुएसुम्मे॥ 38खानिङि ठाहा युङ्ग्वा, माङ्हाङ्ङा नासारातङिना येसु सेङ्सेङ्ना हाङ्सा हिट्नुङ् बोल्ङा आभिसेक चोगुए हिट्नुङ् उन्ङा नुना टोॽवा चोक्सा सैतानङा लिन्डुचिगा ख्वाप्पा नुमानिङ् चोक्सा सोब्बे डेन्लेङ् खाडे, पोङ्भोने माङ्हाङ् उन्लोक् सोरोक् वासाना॥
39“हिट्नुङ् येसुङा याहुदिया देसङि हिट्नुङ् यरुसलेमङि चोगुना टोॽवाचि कानिबा आन्याँ वासेट्टिङा॥ हिट्नागाँ उन् खाप्चेङि उछुडुङ् ओसेडुए॥ 40टरो माङ्हाङ्ङा उन् सुम्बोक् लेम्बा सियानालाम्मा उहिङ्ग्वाट् चोगुए हिट्नुङ् याप्मिचि सोरि माङ्हाङ्ङा उन् निमेट्टुचे॥ 41जोम् याप्मिचिङि उन् ठेट्नेएट्नि, टरो आन्याँलोङ्सा माङ्हाङ्ङा ओसाँचि पिमा सेगुचिगालोक् ठेट्टे॥ उन् सियानालाम्मा उहिङ्ग्वाट् लिसाउङ् आन्याँ उन्लोक् चाम्ठुम् चोगिङे॥ 42हिट्नुङ् ख्वाप्पा याप्मिचि पारचार चोक्मा, हिट्नुङ् उन् उहिङ्ग्वाट् हिट्नुङ् उसियागा न्याए काचोक्बा लिमालोङ्सा माङ्हाङ्ङा सेगुना याप्मि नुङ् माप्मा लोङ्सा आन्याँ आग्याँ याप्मिपिडे॥ 43ख्वाप्पा माङ्काटाचिङा ओबारेङि नाड्डे ओमाट्टुए, ‘येसुङि बिस्वास काचोक्बा सोब्बेङा उनिङ्लाम्मा पापङाना माफ ओटोगुटु’॥”
पानिछोङ्बाचिङा सेङ्सेङ्ना हाङ्सा ओटोगुटु
44पाटरुसङा नागा रिङ् माट्टुएटुना बेला उरिङ् काखेम्बाचि उठुङ्ङि सेङ्सेङ्ना हाङ्सा ठाए॥ 45माङ्हाङ्ङा पानिछोङ्बाचि चा सेङ्सेङ्ना हाङ्साङाना बारदान ठेन्डुबिडुचिगा उनिसुङ् पाटरुसलोक् योप्पालाम्मा ओआबागा याहुदि बिस्वासिचि चा डोङ् ओठोङ्डे॥
46पोङ्भोने हिट्नागा याप्मिचिङा आरु रिङ्ङि ओचेक्टागा हिट्नुङ् माङ्हाङ्ङाना उनिङ् ओचोन्डुना हिट्नागाँ ओखेम्सुए॥ हिट्नुङ् पाटरुसङा हिट्नागा लोडुचे, 47“आनि गाड्डे डोक् नागा याप्मिचिङा चा सेङ्सेङ्ना हाङ्सा ओटोगुए, हाट्ले नागा याप्मिचि चुवाङाना बाप्टिस्मा लाड्मा साङा चा छाक्मा उहिडुन्चिन्गा॥” 48हिड्डेउङ् पाटरुसङा हिट्नागा येसु खिरिस्टङि बाप्टिस्मा लिसानि पिक्सा आग्याँ पिडुचे॥ हिट्नुङ्ना हिट्नागाँ आन्याँलोक् आम्टेप्मा लेम्बा सोम्मा नेहि डोक् युङा पिक्सा पाटरुस ओलोडुए॥
Currently Selected:
मुलिचेला टोॽवा 10: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
