Rɔm 13

Hal gɨ da ka-aye kudurɔ dan̰ ka-dɔɔ-ƴaa

1Kuɗa gɨ waŋ waŋ kalɨn̰ ma, dɨba cayi dugo a tumoy ka-dɔɔ cay ƴaa kɨya wa kɨlma le, na Kumu ba sii bɨ, kan ga diige cay ƴaa le, na Kumu ba sɨge a cay kali-tɨrɨmbala dɨŋ bɨ. Kan ga dɔɔ-ƴaa woy a kobɨge le, na Kumu ba sɨge a boy gɨye gɨ da dɔɔ-ƴaa gɨŋ bɨ. 2Na toy di hɨn̰ wo̰ ma, ungo gɨ na ɨr-cɨn̰ ka-dɔɔ-ƴaa na, ban gangɨ kɔl na dan̰ hɨnga ga Kumu ba ɗɔɔ toyge. Ungo gɨ ba gange kɔl le, mal na bɔyɛ kɔl gɨ da Kumu bee a cayi gusi koyi gɨŋ gaŋ. 3Na cɨndi, ungo gɨ ba lɔɔ hɨnga ga ɗari le, kɨya hundɔrɔ ka-dɔɔ cay ƴaa naŋ. Ama na ungo gɨ ba lɔɔ hɨnga ga ɨsɨni ba kɨya hɨndarge. Hɨn̰ gɨ ji na gey hundɔrɔ ba-dɔɔ cay ƴaa naŋ na, laa hɨnga ga ɗari. Ji na laa hɨnga ga ɗari na, ban kɨya hɨramɨn̰. 4Ba dɔɔ-ƴaa le, na ba lɔɔ gɨye gɨ da Kumu kol ɗarwa ton̰. Ama hɨn̰ gɨ ji naa ba-lɔɔ ɨsɨna na, naa wa wa kalɨn̰ ma hɨndarayi, kɨya wa ba-dɔɔ-ƴaa le orɨn̰ dan̰ pəlɨm kobi na kalɨn̰ naŋ. Ban na ba lɔɔ gɨye gɨ da Kumu, ɗe kuduroy-hɔmɛ di da Kumu na gɨl guso a cay ka-lɔɔ ɨsɨna. 5Na toy di hɨn̰ wo̰ ma, ojɨ gɨ kɨŋ na dɨba caygɨŋ dugo tumoyi ka-dɔɔ cay ƴaa. Kɨŋ hundɔrɔ na kol kuduroy-hɔmɛ di da Kumu ƴɔbɨ naŋ, ama ɗe ɨrɨmedɨgɨŋ na dɨbɨ kɔl caygɨŋ naŋ.

6Na toy di hɨn̰ wo̰ ma ɗaŋ coŋ, kɨŋ bee hɔgɛ lambo kɨya wa kalaŋ ga ka-hɔgɛ lambo kobɨgɨŋ le, na kalaŋ ga Kumu gusi ba sɨge a kɨbɨ gɨye gɨ nee gɨŋ le, ɗe kan na lee. 7Waŋ waŋ kalɨn̰ ma, biigɨŋ hɨnga ga ojɨ cay cay: Bɨn̰gɨŋ hɔgɛ lambo ba-hɔgɛ lambo bɨ. Bɨn̰gɨŋ gursu da magtubu, ka-magtubu bɨ. Dɨbɨgɨŋ hurɔmɔ cay ungo gɨ ojɨ gɨ kɨŋ kɨya dɨbe hurɔmɔ cayi bɨ. Ayagɨŋ cay ungo gɨ ojɨ gɨ kɨya aye cayi daa, daa bɨ.

Geygɨŋ gusɨgɨŋ duroygɨŋ

8Ɗɔɔgɨŋ tugɨla wɔyɛ caygɨŋ naŋ. Tugɨla pɨna ƴɔbɨ ba wɔyɛ caygɨŋ, na geye gusɨgɨŋ duroygɨŋ. Ungo gɨ na gey kurɨndi na, ban lee gasɨn̰-kɔl dɨɗɨ ɗəndəŋ ɨni. 9Te tumɔn̰əŋ le ye hɨn̰:

«Ji kɨya yɔyɛ tama da mɨgan̰ wala,

Bara gɨ da mɨgɛɛ naŋ bɨ,

Ji kɨya dɨɗe ungo naŋ bɨ,

Ji kɨya hase naŋ bɨ,

Ji kɨya lɔɔ cɨn̰-pɨɗɨma naŋ bɨ.»#13:9 Ayge na duroy: Exode 20:13-15,17; Deutéronome 5:17-21.

Te tumɔn̰əŋ ga kɛ dan̰ te gasɨn̰-kɔl ga baa nɔm le, daygege daa pɨna gɔɗɨ te kɔl pɨna gɨŋ ye hɨn̰:

«Ji kɨya geye mɨgan̰ hɨn̰ gusɨn̰ kon̰ wo̰.»#13:9 Ayge na duroy: Lévitique 19:18.

10Na hɨn̰ wo̰ ma, ungo gɨ na gey mɨgay na, kɨya lɔɔ ɨsɨna danayi naŋ. Geye le na lɔɔ gasɨn̰-kɔl dɨɗe ɗəndəŋ.

Sɨmagɨŋ cay-tɨbayigɨŋ aman̰ caga gɨ da Kɨris

11Kɨŋ sol tɨwa di na ba somɨn̰gɨŋ nee nɔm: Na tɨwa di kɨŋ kɨya son̰ te kuŋ gaŋ ɨni. Kɨya wa haw kɛ na, pɔɗɛ mɨnde danana ɗɨn̰ wɔlɛ gɨ na ba an̰ kuduroyna bɨn̰ Jesu. 12Son̰do baa mɨnde gɨ kɨya ayaŋ lee gɨ kɨɗɨn̰ ga woli baa mɨnde. Hɨn̰ wo̰ na, tɨragɨŋ gɨye-lɔɔ gɨ da dɨlɨm gusɨgɨŋ coŋ bɨ tɨban̰gɨŋ hɨnga ga ni wɔrɨn̰ɛ ga da asɨn̰a gusɨgɨŋ. 13Kuɗa gɨ haldɨna wɨya hɨn̰ hal gɨ da kalaŋ ga somge asɨn̰a gɨŋ wo̰. Ƴɨmanagɨŋ gusɨna cay dɔɔ harɨne gɨŋ bɨ, cay kɔyɛ cɛrɛ gɨŋ bɨ, cay yɔyɛ gorɨn̰ daa gɨŋ bɨ, cay yɔyɛ gɨ toyi kan̰di kan̰di gɨŋ bɨ, cay bɔjɨn̰ɛ gɨŋ bɨ, cay jangɨ dɨŋ bɨ. 14A ban̰di ɨsɨnan̰əŋ ga nee le na, saɗagɨŋ wɨrdɨgɨŋ daa bɨ, ɗagɨŋ a ɨrɨmedɨgɨŋ gɨŋ gɨ kɨŋ naa marɨne ka-gɨye ga da Ba-gulondɨna Jesu-Kɨris bɨ. Kan̰agɨŋ lɔɔ gɨye dan̰ gɨyəŋ gɨ da tabɨlaŋ di kuyoŋdi-gusɨgɨŋ.

Currently Selected:

Rɔm 13: gab

Highlight

Copy

Compare