1 Tesalonigɨ 5

Jɨga gɨ da Jesu

1Karmɨnɨ ga ban̰aŋ dan̰ ga kandɨ, kɔl gɨ ojɨ cay wɔlɛ bɨ, cay tɨwa di Ba-gulɔŋ kɨya cagan̰ bɨ le, kɨŋ ɨra n̰agedi gɨ ungo na wala magtubu bɨgɨŋ koldi naŋ ɨni. 2Kɨya wa kɨŋ-gandi gusɨgɨŋ kɨŋ sol kuɗa, wɔlɛ gɨ Ba-gulɔŋ kɨya cagan̰ le, kɨya wɔyɛ gɨlɨn̰a na hɨn̰ gɨ da ba-hase gɨ kɨya ɨrga duroy son̰do dɨŋ wo̰. 3Kɨɗɨn̰ ga kalaŋ kɨya sɔmɛge yɔɔge hɨn̰: «Gusi-dɔbɛ woy bɨ, kɔl unɔ bɨ», ɨni na kɨɗɨn̰di ga nee gaŋ le bɨ mundoŋ kɨya andaŋ dus cayge gɨlɨn̰a na hɨn̰ wɔɔ gɨ ay te lɔɔ tama wo̰. Lɔɔ gɨ kan kɨya ɓale andaŋ kɨbɨ nee naŋ. 4Ama kɨŋ-gandi karmɨnɨ ga ban̰aŋ dan̰ ga kandɨ, kɨŋ na boy dɨlɨm dɨŋ naŋ ɨni, ɗe wɔlɛ gɨ nee le andaŋ cayna dus hɨn̰ gɨ da ba-hase wo̰ naŋ. 5Kɨya wa kɨŋ-gandi nɔm, kɨŋ na karɨn̰ kɨɗɨn̰ asɨn̰a bɨ, karɨn̰ kɨɗɨn̰ ga woli bɨ. Na na kalaŋ ga da son̰do naŋ bɨ, ga da dɨlɨm naŋ bɨ. 6Hɨn̰ wo̰ na, wɔyɛnagɨŋ kuŋ hɨn̰ kalaŋ ga ɗaŋ wo̰ naŋ. Ama sɨmanagɨŋ cay tɨbaynagɨŋ dɨŋ bɨ, sɨnagɨŋ muɗɔlɛ cay hɨnga ga na leegɨŋ bɨ. 7Kɨya wa ka-wɔyɛ kuŋ le woyge kuŋ na dan̰ son̰do bɨ, ka-sɔ cɛrɛ koydɨn̰ le, kɔydɛge na dan̰ son̰do bɨ. 8Ama na-gandi ga na kalaŋ ga da kɨɗɨn̰ ga woli le, kuɗa gɨ na ƴɨma gusɨna a cay hɨnga nɔm. Dɨbanagɨŋ badɨge ga ni kɨmbɨl ga na nare gɨ na aye kudurɔ bɨ, geye bɨ le a gusɨnagɨŋ, bɨ jagɨwa ga ni kɨmbɨl gɨ na bɔgɛ ɨrɨmedɨna cay pɔɗɛ gɨŋ le, cayna gɨŋ bɨ. 9Kɨya wa Kumu ɗena na ɗe gɨ ana na wan̰ pɔɗɛ dan̰ gɨyəŋ gɨ da Ba-gulɔŋ Jesu-Kɨris gɨ ma kol caynagɨŋ le, ama na ɗe gɨ kuduroy-hɔmɛ toyi na gɨ bɔɔ caynagɨŋ naŋ. 10Ɗe hɨn̰ gɨ na na sɨma naa bɨra naŋ le, wɨya naa kuŋ kalɨn̰ ma, na na bugoŋ pɨna danayi te sɔmɛ-bɨra gɨŋ. 11Na toy di hɨn̰ wo̰ ma, dɨbagɨŋ bandɨ kuduroygɨŋ duroygɨŋ bɨ, jɨbgɨŋ te gusɨgɨŋ te aye kudurɔ gɨŋ bɨ, hɨn̰ gɨ kɨŋ ba leen̰ ɨni le.

Gɨle bɨ lapɨya di ni dɨɗɨn̰ kɨbɨ kɔl bɨ

12Karmɨnɨ ga ban̰aŋ dan̰ ga kandɨ, ni olgɨŋ gɨ kɨŋ bɨgan̰ kalaŋ ga duroygɨŋ ga gɨlalge danagɨŋ bɨ, ga Ba-gulɔŋ sige caygɨŋ bɨ, ga halgɨŋge bɨ le, kɔl nee. 13Laagɨŋ toyge tɔgɨ dan̰ wandɨ kɨya cay gɨye gɨ kan lee le. Sɨmagɨŋ dan̰ gusi-dɔbɛ duroygɨŋ.

14Karmɨnɨ ga ban̰aŋ dan̰ ga kandɨ, ni olgɨŋ gɨ kɨŋ ɗala ka-dabɨr bɨ, dɨbagɨŋ bandɨ kuduroy ka-hundɔrɔ bɨ, jɨbgɨŋ te kan ga togɨyge unɔ bɨ. Dɨbgɨŋ ɗugoygɨŋ cay kalaŋ nɔm bɨ. 15Ɗagɨŋ muɗɔlɛ a cay gusɨgɨŋ gɨŋ ɗɔɔ gɨ ungo jogɨn̰ dan̰ ɨsɨna ban̰di ɨsɨna bɨn̰ mɨgay daa naŋ, ama kɨŋ mala gɨyəŋ gɨ ni lɔɔ hɨnga ga ɗari dan̰ tɨwa nɔm duroygɨŋ bɨ, kol cay kalaŋ nɔm bɨ.

16Sɨmagɨŋ dan̰ gusi-mɔwa dan̰ wɔlɛ pɨna pɨna. 17Ulagɨŋ Kumu daa daa bɨ. 18Hɨn̰ gɨ kɨɗɨn̰ na kuɗaa na ɨsɨndee kalɨn̰ ma, laan̰gɨŋ Kumu ho’o. Kɨya wa, na hɨnga ga nee le ma, Kumu gey gɨ kɨŋ-gandi ga kɨŋ bugoŋ pɨna dan̰ Jesu-Kɨris le, kɨŋ na laa.

19Bayegɨŋ Turnɔ di da Kumu naŋ. 20Kan ga sayge duroygɨŋ bɨ yege gɨ, kɔl gɨ ke na ye naa kɔl-gɨ-Kumu-ba-yɔɔ le, sɔlɛgɨŋ kɔl koge leen̰ hɨnga ga kalɨn̰ wo̰ dugo naŋ, 21ama kɨŋ kɨba te hɨnga nɔm dɨran̰gɨŋ cɨndɨge: Hɨnga ga kuɗa na kɨŋ ƴɨma usa. 22Dɨragɨŋ gusɨgɨŋ sɛdɨ coŋ te hɨnga ga ɨsɨni nɔm ga toyge kan̰dɨge kan̰dɨge.

23Kuɗa gɨ Kumu gɨ ba bɨn̰ kalaŋ gusi-dɔbɛ dan̰ gusi koyi dɨragɨŋ sɨgɨŋ dan̰ cɨndɨgɨŋ ɗɨga kol cayi. Kuɗa gɨ ban gama turnoygɨŋ bɨ, habedɨgɨŋ bɨ, kuyoŋdi-gusɨgɨŋ bɨ dɔmɔmɔ, ɗe wɔlɛ gɨ Ba-gulondɨgɨŋ Jesu-Kɨris kɨya caga na, masadɨgɨŋ na unɔ. 24Ban gɨ təgɨŋ a te gɨyəŋ koyi gɨŋ le, na ba ɨre a cay tɨbayi dɨŋ: Na ban gaŋ ba kɨya lɔɔ hɨnga ga nee le nɔm. 25Karmɨnɨ ga ban̰aŋ dan̰ ga kandɨ, ulagɨŋ Kumu kol cayni bɨ. 26Laan̰gɨŋ karmɨni lapɨya nɔm dan̰ lapɨya di da ka-karme. 27Ɨŋ olgɨŋ dan̰ guson̰ Ba-gulɔŋ: Ɗɨngɨsagɨŋ magtubu di kɛ le bɨn̰gɨŋ karmɨgɨŋ ga ban̰aŋ dan̰ ga kandɨ nɔm. 28Kuɗa gɨ Ba-gulɔŋ Jesu-Kɨris laa kuduroy-ɗarwa danagɨŋ bɨ.

Currently Selected:

1 Tesalonigɨ 5: gab

Highlight

Copy

Compare