रोमी 4
4
अब्राहाम्गी पी १-२५
1हीगी ढीक्ल ङीत् यहुदी घयेक्की पुबु अब्राहाम्गी मीजील घन्दुक् झ्युङ बेक्क हुगो ङे ॱस्येत् योङ्। 2अब्राहाम् ॱनम्बर् धक्प दील रोरङ्गी झ्यीन युङे लेगी थो़म्ब हीन्न ॱनी, अब्राहाम्ल तम्दो़त् युङेत् क ॱनी। ॱनी को़न्ज्योक्की ढुङ्दु तम्दो़त् ॱस्यो़त् ॱमीत् छुगेन् बेत्। 3हीगी ढीक्ल ॱसुङ्रप्ल थो़ङ्गेन् बेत्।
को़न्ज्योक्की ॱसुङे केच्च्यल अब्राहाम्गी छ्य स्यक्नी, हुनी छ्य स्यक्प दीगी को़न्ज्योक्की अब्राहाम् ॱनम्बर् धक्पल थो़म्बे मी हीम्ब थोङ बेत् सीर यो़क्केन् बेत्। (छ्यारप् १५:६)
4ले झ्यीक्केल्ल रोरङ्गी ॱङलक् दी थोप् गोगेन् बेत्। हुगो हीन्दुक्रङ्ल बीम्बे ॱनङ्ज्येत्ल मीत् डोगेन् बेत्। 5ॱनी हुगो डस्सी झ्यीन युङे लेगी मेम्ब, दीक्च्येन् ॱनम्बर् धक्पल थो़ङ्गेन् हुगो को़न्ज्योक्ल छ्य स्यक्न छ्य स्यक्पे लम् दीनी ॱनम्बर् धक्पल थो़न् छर को़न्ज्योक्की ॱसम्गेन् बेत्। 6छ्यो़डीम्ल चीन युङे लम्नी मेम्ब, को़न्ज्योक्की थोङल नुक्रङ् ॱनम्बर् धक्पल थो़म्बे मी ढीक्ल ॱसुङ्रप्ल दाऊद्गी इक् हुगो ॱसोदी च्येम्मे मी बेत् सीन्न सीक्केन् बेत्। 7दाऊद्गी हरुङ्द सीक्केन् बेत्।
ॱसी़ ङीब झ्यीब घयेत् धक्तुक्क हुगो ॱसोदी च्येम्मल ॱनेगेन् बेगो। ॱसी़ दीक्प झ्यीब घयेत् को़न्ज्योक्की बेन स्यक्तुक्क हुगो ॱसोदी च्येम्मल ॱनेगेन् बेगो। 8ॱसी़ दीक्प झ्यीब घयेत्ल चोव ज्यीन्दक्की ची ॱमीत् तोङेक्क हुगो ॱसोदी च्येम्मल ॱनेगेन् बेगो सीर थो़ङ्गेन् बेत्। (ॱसुङ्रप्की गुल्लु ३२:१-२)
9हीगी ॱसोदी च्येम्मल ॱनेगेन् सीक्केन् हीगो यहुदीगी दक् ज्यबे मी घयेक्की ढीक्लरङ् युङ्गेन् बेक्क? मेम्बेत्। हीगो दक् मत् ज्यबे मी घयेत्ल अक् युङ्गेन् बेत्। अब्राहाम्गी छ्य स्यक्नी, छ्य स्यक्प दीगी को़न्ज्योक्की अब्राहाम् ॱनम्बर् धक्पल थो़म्ब थोङ बेत् सीन्न ॱसुङ्रप्नी ङीक्की तो़न्न ॱस्येप्पेन्। 10ॱनी अब्राहाम् ॱनम्बर् धक्पल थो़म्बे यङ्ल अब्राहाम्ल दक् ज्यप्न यो़प्प बेक्क न, न मत् ज्यब यो़प्प बेक्क? दक् मत् ज्यब यो़क्केन् बेत्। 11यहुदीगी दक् ज्यक्पे लुस मीप्पे यङ्नीरङ् छ्य स्यक्पे लम्नी अब्राहाम् ॱनम्बर् धक्पल खुङ् झ्युङ हीन् धङ् मेल्ल थीजीदङ् छ्येत्मीत्ल यहुदीगी दक् हुगो तीङ्ला ज्यब बेत्। हीगो झ्यीनी दक् मत् ज्यबे मी ॱसु ॱसु छ्य स्यक्पे लम्नी ॱनम्बर् धक्पल झ्युङ को़न्ज्योक्की थोङ्गुक्क हुब घयेक्की पुबुल हस्सो़त् अब्राहाम् ॱनेगेन् बेत्। 12ॱनी दक् ज्यबे मी घयेक्की इक् अब्राहाम् पुबुलरङ् ॱनेगेन् बेत्। ॱनी हीन्न अक्, दक् ज्यबे मी कुरीक्की मेम्बेत्। दक् ज्यक् गोगेङ्गी लुस मीप्पे यङ्नीरङ् ङीक्की पुबु अब्राहाम्गी छ्य स्यक्न युङे मीजीगी ॱमीदेल हुन्दो ॱसु ॱसी़ तेन युङ्गुक्क हुब घयेक्कीरङ् खोङ् पुबुल ॱनेगेन् बेत्।
13धङ्बु अब्राहाम्ल को़न्ज्योक्की जम्बुलीङ् हीगो रङ्दङ्, हुनी रङ्गी ज्यी़त् घयेत्ल टेत्न दक्पु झ्यीत्तु ची़क्केन् सीरे छ्यो़त्तुम्गी केच्च्य ॱसुङ बेत्। ॱनी हीगो अब्राहाम्गी छ्यो़डीम्गी क घयेत्ल चीन युङे लम्नी मेम्ब, छ्य स्यक्न ॱनम्बर् धक्पल झ्युङे लम्नी को़न्ज्योक्की ॱसुङ बेत्। 14को़न्ज्योक्की ॱनङे छ्यो़त्तुम् जेप्प हुगो छ्यो़डीम्गी क घयेत्ल चीन युङे लम्नी थोप्को़त्न ॱनी, छ्य स्यक्प हुगो धो़म्मीत्ल डोयेत् क ॱनी। ॱनी छ्यो़त्तुम् हुगो ओक् घो ॱमीत् छ्यो़त्ल डोयेत् क ॱनी। 15ॱनी म दी छ्यो़डीम्गी कोलीमील को़न्ज्योक्की खोङ्डोक्की छ्येप्प ॱयोप्केन् बेत्। ॱनी छ्यो़डीम् मीत्न ॱनी, घन्दुक् झ्यीन ङीबे ले ॱह घोगेन्?
16छ्यो़त्तुम्गी केच्च्य हुगो छ्यो़डीम्गी क घयेत्ल चीन युङ्गेन् अब्राहाम्गी ज्यी़त् घयेत्ल छ्युवक् मेम्ब, अब्राहाम्गी छ्य स्यक्पे लेमु डस्सी झ्यीक्केन् घयेत्ल अक् हुगो गन्दीय हीन्दुक्रङ्ल थोप्च्ये यो़प्पल हुगो ॱनङ्गेन् बेत्। हीगो झ्यीनी अब्राहाम् हज्यरङ् कुरीक्की पुबुल ॱनेगेन् बेत्। 17हीगी ढीक्ल को़न्ज्योक्की अब्राहाम्ल ॱसुङ ॱसुङ्रप्ल थो़ङ्गेन् बेत्।
ज्यी़त् ॱनम्ब गज्येङ्गी पुबुल रङ् ङे को़न स्यक्पेन्। (छ्यारप् १७:५)
ॱस्यीनर घयेत् ॱसोम्बुल ॱलोङ्गेन्, अब्राहाम्गी छ्य स्योक्केन्, मीप्पनी यो़प्पल सोगेन् को़न्ज्योक्की ढुङ्दु अब्राहाम् हज्यरङ्गी पुबुल खो़त्न यो़क्केन् बेत्।
18अब्राहाम्गी रीगो दी यो़न खुर्न आक्, को़न्ज्योक्की ॱसुङ दील खोङ्गी छ्य स्यक्न रीगो यो़प्प डस्सी झ्यीनी, खोङ् ज्यी़त् ॱनम्ब गज्येङ्गी पुबुल झ्युङ बेत्। ॱनी हुन्दुक् झ्यीन
रङ्ल नुक्मे ज्यी़त् मङ युङ्गेन् बेत् सीन्न ॱसुङ्रप्ल थो़ङ्गेङ्गी केच्च्य दी डुब बेत्। (छ्यारप् १५:५)
19खोङ् फोलो ज्य ॱलीच्च्येम झ्यीन सी़बु दीरङ् गेन ॱस्यी रेम्बल ॱसोङ् छर, हुनी सारागी कीम्बी दी इक् यो़ छर झ्यीनी इक्, खोङ्गी छ्य स्यक्प दी योक्तु ॱमत् ॱसोङ बेत्। 20को़न्ज्योक्की छ्यो़त्तुम् जेप्प दील खोङ्गी मेन्डो ॱनो़ब ॱमत् ॱसम्ब, हरुङ् क छ्य स्यक्प दी डम्दु तङ्न को़न्ज्योक्ल तो़प्प पुन युङ बेत्। 21हुगी छ्यो़त्तुम् जेप्प दी को़न्ज्योक्की डुप्तु ची़त् छुगेन् बेत् ॱनो़बल अब्राहाम् ॱलो खीन युङ बेत्। 22हुन्दुक् झ्यीन युङ्नी, को़न्ज्योक्की अब्राहाम् छ्य स्यक्पे लम्नी ॱनम्बर् धक्पल थो़म्ब हीम्ब थोङ बेत्।
23ॱनी ॱनम्बर् धक्पल थो़म्बे केच्च्य हीगो अब्राहाम्गी ढीक्ल छ्युवक् ढीन स्यक्प मेम्बेत्। 24हीगो हज्यरङ्गी ढीक्ल अक् बेत्। हज्यरङ्गी चोव ज्यीन्दक् येशु ढोङ्नरनी यङ् ॱसोम्बुल ॱलोङ्गेङ्गी को़न्ज्योक्ल छ्य स्योक्केन् हज्यरङ् घयेत् एत् ॱनम्बर् धक्पल थो़म्ब हीम्ब खोङ्गी थोङ्गेन् बेत्। 25हज्यरङ्गी दीक्प घयेक्की ढीक्ल येशु ढोङ्ज्येल को़न्ज्योक्की तङ्न युङ्नी, ॱनी खोङ् ढोङ् गो़ ॱस्यर बेत्। हुनी यङ् हज्यरङ् ॱनम्बर् धक्पल थो़न् छुज्ये यो़प्पल को़न्ज्योक्की खोङ् यङ् ॱसोम्बुल ॱलोङ बेत्।
Currently Selected:
रोमी 4: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
