एफीसस् 1
1
1को़न्ज्योक्की थुल यो़प्पल ख्रीष्ट् येशुगी ठीक्नल ङ पावल्की एफीसस् सार्न यो़क्केन्, ख्रीष्ट् येशुदङ् मत् ढेब तेम्बर् दो़क्केन्, को़न्ज्योक्की मी चङ्म घयेत्ल हीगो ढीन तोङ्गो़त्। 2खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्।
थर्वे लेमुल तो़क्केन् ३-१४
3को़न्ज्योक्, हज्यरङ्गी चोव ज्यीन्दक् येशु ख्रीष्ट्की यप्ल यस्सो युङ् युङ युङ्ज्ये यो़प्प स्योक्च्यीत्। हज्यरङ् ख्रीष्ट्तङ् मत् ढेब यो़प्प घयेत्ल तेङ् यी़नी मल्ल ॱसीम्ल गो़बे ॱमेल्लम् ॱनम्ब गज्येन् खोङ्गी ॱनङ्न यो़क्केन् बेत्। 4को़न्ज्योक्की ढुङ्दु चङ्म धङ् नक्चक् मीप्प युङ्ज्ये यो़प्पल ॱस धङ् ॱनम् छ्यादु ची़प्पले एक् एल्लानी खोङ्गी हज्यरङ् ख्रीष्ट्की लम्नी दम्न यो़क्केन् बेत्। 5हज्यरङ् येशु ख्रीष्ट्की लम्नी को़न्ज्योक्की भीजल युङ्ज्ये यो़प्पल हीगो गोमनीरङ् को़न्ज्योक्की थुल ॱसोङ्न, खोङ्गी झ्यम्बे हज्यरङ् भीजल खो़त्न यो़क्केन् बेत्। 6ॱनी खोङ्गी झ्यम्बे ॱरेबी़ लम्नी हज्यरङ्ल हीन्दुक्रङ्ल खोङ्गी थुज्यी छ्यीम्मु ॱनङे ढीक्ल खोङ्ल तो़त्वङ् हरुङ् ज्यीक्तु युङ्ज्ये यो़प्प तोङ्।
7को़न्ज्योक्की थुज्यीगी लोङ्ज्यो़त्ल पीब हज्यरङ् घयेत् दीक्पे लक्नी ख्रीष्ट्की ठक्की ॱली़न हज्यरङ्गी ङीब घयेत् धक्तु ची़त्न यो़क्केन् बेत्। 8हज्यरङ्ल खोङ्गी थुज्यी छ्यीम्मु ॱनङ्न युङ्नी, झ्यी़रीक् धङ् धो़र्रीक् थोन यो़क्केन् बेत्। 9ॱनी हीगो धङ्बुनीरङ् खोङ्गी थुल ॱसोङ्न यो़क्केन्, ख्रीष्ट्की लम्नी डुप्च्ये ॱनो़बे ॱङीङ्बु दी हज्यरङ्ल तो़न्न युङ बेत्। 10हीगी ॱङीङ्बी़ धो़न् हीगो धी़जो़त् ॱलीबे ॱङेस्स्यो डुप्केन् बेत्। हुगी धी़गी यङ्ल तेङ् यी़न धङ् ॱस जम्बुलीङ्न घङ् यो़प्प घयेत् जेङ् ख्रीष्ट्की ॱवङ्गी होक्ल दी़न स्यक्न, हुगी गोल ख्रीष्ट् युङ्गेन् बेत्।
11खोङ् रोरङ्गी थुल यो़प्पे ढो़ल डीक्पे लेमु छीगङ् जेक्केङ्गी को़न्ज्योक्की ङीत् घयेत् ख्रीष्ट्तङ् मत् ढेब युङ्ज्ये यो़प्पल गोमनीरङ् ॱमीन खोङ्गी मीस्सीर्ल खो़च्च्ये यो़प्पल जेत्न यो़क्केन् बेत्। 12हीगो झ्यीनी ङीत् गोम ॱएन्स्युक्ल ख्रीष्ट्ल रीगो झ्यीन यो़क्केन् घयेक्की खोङ्ल तो़त्न, खोङ्ल तो़त्वङ् दी हरुङ् ज्यीक्तु युङ्ज्ये यो़प्पल बेत्।
13खीत्रङ्गी इक् हुगो डस्सी थर्वे दीम्बे केच्च्य ॱनेम्बुल छ्य स्यक्न यो़क्केन् बेत्। हुनी को़न्ज्योक्की छ्यो़त्तुम् जेप्पे धम्बे थु खीत्रङ्ल ॱनङ्न खीत्रङ्गी ॱसीम्ल ङोत्ताल झ्युङ्न यो़क्केन् बेत्। 14हज्यरङ् मीस्सीर् घयेत् दक्पु जेक्केन् को़न्ज्योक्की हज्यरङ् घयेत्ल थर्वे फक् दीम्बरङ् थोप्केन् हीम्बे ढीक्ल धम्बे थु हज्यरङ् हीनी तीङ्ला ॱली़न डोये यङ्गी धी़ थुक्ल बयीनाल ॱनङ्न यो़क्केन् बेत्। ॱनी हीगो को़न्ज्योक्ल तो़त्न, खोङ्ल तो़त्वङ् दी हरुङ् ज्यीक्तु युङ्ज्ये यो़प्पे ढीक्ल बेत्।
छङ्म थम्ज्येक्की गोल ख्रीष्ट् यो़क्केन् १५-२३
15चोव ज्यीन्दक् येशुल खीत्रङ्गी छ्य स्यक्न युङे लेमु धङ् को़न्ज्योक्की मी चङ्म घयेत्ल खीत्रङ्गी झ्यम्ब झ्यीन युङे लेमु ङे ॱह घोनी 16ङे ॱसुव तोबे यङ्ल खीत्रङ् ढेन्सो़ झ्यीन को़न्ज्योक्ल ज्यी़न्दु थु छ्यी पु पुब झ्यीक्को़त्। 17हज्यरङ्गी चोव ज्यीन्दक् येशु ख्रीष्ट्की को़न्ज्योक्, तो़त्वङ्गी ओ़च्च्य च्येम्मे यप्की धो़र्रीक् खीत्रङ्गी गदु ॱस्यीज्ये यो़प्पल धम्बे थुगी झ्यी़रीक् खीत्रङ्गी ॱसीम्ल ॱनङ्न ॱसल्च्ये यो़प्प तोङ् सीन्न स्युदेन् ज्यप् ज्यब झ्यीक्को़त्। 18-19को़न्ज्योक्की खीत्रङ् घन्दुक् झ्यीबे रीगोल भो़ब बेक्क, खोङ्गी मी चङ्म घयेत्ल घन्दुक् झ्यीबे तो़प्प च्येम्मे थर्वे फक् स्यक्न यो़प्प बेक्क, हज्यरङ् छ्य स्योक्केन् घयेक्की घुङ्दु ले जेक्केन् खोङ्गी ॱस्यीक् दी घन्दुक्मे छ्यीय यो़प्प बेक्क हुगो खीत्रङ्गी ॱसीम्गी ॱमीक् दी भीन थोङ्ज्ये यो़प्प तोङ् सीन्न ॱसुव तप् तब झ्यीक्को़त्। 20ॱनी खोङ्गी हुगी ॱस्यीक् छ्यीम्मु हुगो धङ् ख्रीष्ट् ढोङ्नरनी ॱसोम्बुल ॱलोङ्न तेङ् यी़ल खोङ्गी छ्यक् ॱये छ्योदु स्युदु ची़क्केङ्गी ॱस्यीक् दी च्यीक्प बेत्। 21ॱनी ॱवङ् च्योङ्गेन्, ॱवङ् च्येम्म, ॱस्यीक् च्येम्म धङ् ज्यीक्पोक्म मीङ् छ्यीम्मु च्येम्म घयेत् हीगी धी़गी यङ्लरङ् यो़त्, यङ् तीङ्मागी धी़लरङ् युङ्गो़त्न अक्, यङ् ॱस धङ् ॱनम्न घनरङ् यो़त्न अक्, हुन्दुक् झ्यीब कुरीक्की थोक्ल ख्रीष्ट्की ॱवङ् डोगेन् बेत्। 22ॱनी हुन्दुक् झ्यीन छङ्म थम्ज्येत् खोङ्गी ॱवङ्गी होक्ल स्यक्न खोङ् छ्यो़ छो छङ्म थम्ज्येक्की गोल को़न्ज्योक्की को़न स्यक्प बेत्। 23ॱनी छ्यो़ छो छङ्म खोङ्गी सी़ बेत्। ॱनी हीगी खोङ् छङ्मल सोगेन् बेत्। ॱनी म दी छङ्म थम्ज्येत् छङल सोगेन् दी खोङ् बेत्।
Currently Selected:
एफीसस् 1: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
