कलस्सी 1
1
1को़न्ज्योक्की थुल यो़प्पल ख्रीष्ट् येशुगी ठीक्नल ङ पावल् धङ् हज्यरङ्गी पी़न्ज्या तीमोथीगी 2खीत्रङ् उन कलस्सीन यो़क्केन्, को़न्ज्योक्की मी चङ्म ख्रीष्ट्तङ् मत् ढेब तेम्बर् च्येम्मे पी़न्ज्या घयेत्ल हीगो ढीन तोङ्गो़त्। खीत्रङ् घयेत्ल हज्यरङ्गी यप् को़न्ज्योक् च्यानी थुज्यी धङ् ॱसीम् दीव युङ्ज्ये यो़प्प तोङ्।
थु छ्यी पुन ॱसुव तब ३-१४
3खीत्रङ्गी ढीक्ल ङीक्की ॱसुव तोबे यङ्ल ङीक्की हज्यरङ्गी को़न्ज्योक्, चोव ज्यीन्दक् येशु ख्रीष्ट्की यप्ल छीगङ् थु छ्यी पु पुब झ्यीक्को़त्। 4घन्ड हीन् सीन्न येशु ख्रीष्ट्ल खीत्रङ्गी छ्य स्यक्न युङे लेमु दी धङ् को़न्ज्योक्की मी चङ्म घयेत्ल झ्यम्ब झ्यीप्प दी ङीक्की ॱह घोज्युङ्। 5खीत्रङ्गी ढीक्ल तेङ् यी़न दक्सुम् झ्यीन स्यक्न यो़प्प दी गन्दीय थोप्केन् बेत् ॱनो़बे रीगो दी खीत्रङ्ल यो़क्केन् झ्यीनी, हुनी क खीत्रङ्गी हुगो डस्सीगी लेमु झ्यीक्केन् बेत्। हीगी रीगो हीगो खीत्रङ्गी गोम दीम्बे केच्च्य ॱह घोवे यङ्नीरङ् झ्यी ॱस्यीदुक्। 6हीगी दीम्बे केच्च्य ॱनेम्बु हीगो जम्बुलीङ्ल घल अक् धर्न फीन्नी, घङ् धर्स दीदु डेबु छ्यागेन् बेत्। ॱनी खीत्रङ् च्याल आक् धर्न ॱलीत्नी, खीत्रङ्गी गोमनीरङ् गन्दीय को़न्ज्योक्की थुज्यी ॱनङ ॱह घोनी, हुल पीबे डेबु खीत्रङ्गी घुङ्न अक् छ्यान दुक्। 7हीगी थुज्यीगी केच्च्य हीगो खीत्रङ्गी इपाफ्रास् च्यानी ॱह घोव बेत्। खोङ्जो ङीक्की झ्यम्बे ले च्यीक्की छ्यीट्टो खीत्रङ्गी ढीक्ल ख्रीष्ट्की ॱयोक्पु तेम्बोक्म झ्यीक्केङ्गी मी च्यीक् बेत्। 8धम्बे थुगी लम् ज्यी़त्नी खीत्रङ्गी घन्दुक्मे झ्यम्ब झ्यीगुक्क हुगी केच्च्य दी खोङ्जो़ ङीत्ल ॱस्येच्च्युङ्।
9ॱनी हुगी केच्च्य हुगो घोनी ङीक्की खीत्रङ्गी ढीक्ल छीगङ् ॱसुव तप् तब झ्यीक्को़त्। को़न्ज्योक्की थुल घङ् यो़प्प दी जेङ् खीत्रङ्गी गन्दीक्म ॱह घोन खेसील थो़न्ज्ये यो़प्प धङ् धम्बे थुगी धो़र्रीक् थोज्ये यो़प्प तोङ्। 10ॱनी खीत्रङ्गी मीजीगी छ्यलु दी चोव ज्यीन्दक्ल ओ़ब युङ्ज्ये यो़प्प धङ् हीनी छीगङ् खीत्रङ्गी चोव ज्यीन्दक् थु गुवे ले झ्यीत् छुज्ये यो़प्प धङ् गये लेगी ढङ्गी डेबु छ्याज्ये यो़प्प धङ् को़न्ज्योक्की थुरीक् हरुङ् ज्यीक्तु ॱह घोज्ये यो़प्प तोङ्। 11ॱनी हरुङ् गुर् थेक्प धङ् ङङ्रीन् झ्यीप्पल तो़त्वङ् छ्यीम्मु च्येम्मे को़न्ज्योक्की ॱस्यीक् दी खीत्रङ्ल ॱङीच्च्ये यो़प्प तोङ् सीन्न को़न्ज्योक्ल स्युदेन् ज्यक्को़त्।
12हुनी को़न्ज्योक्की मी चङ्म घयेत्तङ् कङ्ज्यीक्प खीत्रङ्ल आक् इगीगी मेङ्गे ज्यागक्तु फक् ॱनङ्गेन् यप्ल खीत्रङ्गी गव झ्यीन थु छ्यी पु पुब झ्यीज्यीत्। 13खोङ्गी हज्यरङ् घयेत् मेन्नक्की ॱवङ्गी लक्नी या टेन खोङ् रोरङ्गी झ्यम्बे ॱरेबी़ ज्यागक्ल ठीक्न हुन्दो हीन यो़क्केन् बेत्। 14हुन्दुक् झ्यीन हज्यरङ् घयेत् खोङ्गी ॱरेबी़ ठक्की थर्वल तो़न्न हज्यरङ्गी दीक्प घयेत् धक्तु ची़त्न यो़क्केन् बेत्।
ख्रीष्ट् छङ्म थम्ज्येक्की चो छ्यीस्स्यो १५-२३
15ॱमीक्की थोङ् ॱमीत् छुगेङ्गी को़न्ज्योक् घन्दुक् झ्यीब यो़प्प बेक्क हुगो ॱरेबुल तेन थोङ्गेन् बेत्। को़न्ज्योक्की घङ् छ्यादु ची़प्प घयेक्की थोक्ल यो़क्केन् चो दी खोङ् बेत्। 16घन्ड हीन् सीन्न जम्बुलीङ् धङ् तेङ् यी़न घङ् यो़प्प ॱमीक्की थोङ्गेन् धङ् ॱमीत् थोङ्गेङ्गी ढङ् छङ्म को़न्ज्योक्की खोङ्गी लक्नी जेत्न छ्यादु ची़प्प बेत्। ॱनी ॱवङ् च्येम्मे स्युडील दो़क्केन्, ॱवङ् च्योङ्गेन्, चो छ्यीया घयेत् धङ् ॱवङ् च्येम्म घयेत् एत् कुरीक् खोङ्गी लक्नीरङ् छ्यादु ची़प्प बेत्। ॱनी हुगो जेङ् खोङ्गी लक्नी खोङ्गी धो़ल्ल छ्यादु ची़प्प बेत्। 17ॱनी म दी खोङ् हीगो कुरीक् छ्यादु ॱमत् ची़प्पे एल्लानीरङ् यो़क्केन् बेत्। हीगो कुरीक् खोङ्गी सुङ्न यो़क्केन् बेत्। 18सी़बी़ गोदङ् छ्येत्मीत् खोङ् छ्यो़ छोगी गो धङ् चव खुङ् दी बेत्। ॱनी यङ् ढोङ्नी ॱसोम्बुल लोङ्गेन् गोम ॱएन्स्युक्म दी खोङ् बेत्। हुगो झ्यीनी खोङ् कुरीक्ले छ्यीस्स्यो धङ् थोस्स्योल थो़न्न यो़क्केन् बेत्। 19को़न्ज्योक्की थुल यो़प्पल यप्की थुरीक् छङ्म खोङ्ल छङ्न युङ बेत्। 20ॱनी जम्बुलीङ्न घङ् यो़प्प धङ् तेङ् यी़न घङ् यो़प्प घयेत् जेङ् को़न्ज्योक्तङ् डीक्न छ्यम्ज्ये यो़प्पल कुरुस्तु थो़म्बे खोङ् येशुगी ठक्की लम्नी को़न्ज्योक्कीरङ् डीक्च्या जेप्प बेत्।
21ॱङर् खीत्रङ्गी ॱसम्ल धङ् छ्यलु दी अयेक्प झ्यीनी, खीत्रङ् को़न्ज्योक्की डल ॱसोङ्न, खोङ्दङ् ज्यङ्बोक्म झ्युङ्न यो़क्केन् बेत्। 22ॱनी हुन्दो खीत्रङ् हुगो डस्सी मेम्ब, खोङ्गी ॱरेबी़ ॱस्यस्सी़ ढोङे लेगी डीक्च्या जेप्प बेत्। हीगो खीत्रङ् चङ्म नक्चक् मीप्प, ङीबे च्यो़न् मीप्पल झ्युङ्न को़न्ज्योक्की ढुङ्दु खोङ्गी ठीक् छुज्ये यो़प्पल बेत्। 23ॱनी हुगो युङ् छुबल खीत्रङ्गी ॱह घोवे केच्च्य ॱनेम्बुल यो़क्केङ्गी रीगो दील खीत्रङ् थीरीय देत्न छ्य दी तेम्बर् स्यक्न दो़त् गोगेन् बेत्। हीगी केच्च्य ॱनेम्बु हीगो ॱनम्गी होक्ल छ्यादु ची़प्पे मी घयेत्ल ॱस्येत्न धर्न यो़क्केन् बेत्। ॱनी हीगो टोम्गेङ्गी ॱयोक्पु च्यीक् ङ झ्युङ्न यो़त्।
छ्यो़ छोगी ढीक्ल कले च्यो़क्केन् २४-२९
24खीत्रङ्ल फेम्ब युङे ढीक्ल हुन्दो ङल यो़प्पे दुक्प हील ङ गेस दुक्। घन्ड हीन् सीन्न ख्रीष्ट्की सी़बु हीम्बे छ्यो़ छोल फेम्ब युङे ढीक्ल ख्रीष्ट्की दुक्स्यी ॱमत् छङ दी ङे ङरङ्गी सी़ल गुर्न छङल सोगो़त्। 25खीत्रङ्ल को़न्ज्योक्की धो़ङ्गी केच्च्य छङ्म ॱस्यो़क्केल्ल खोङ्गी ङ छ्यो़ छोगी ॱयोक्पुल को़न यो़त्। 26ॱङो़न् धङ्बुनी मी घयेत्ल ॱमत् तो़म्बे ॱङीङ्बी़ केच्च्य हीगो हुन्दो ह खोङ्गी रोरङ्गी मी चङ्म घयेत्ल तो़न्न युङ बेत्। 27एल्ला ॱमत् तो़म्बे ॱङीङ्बु चा छ्यीम्मी़ केच्च्य हीगो ज्यी़त् ज्यी़त् घयेत्ल तो़न्ज्ये ॱनो़ब को़न्ज्योक्की थुल झ्युङ बेत्। हीगी केच्च्ये ॱङीङ्बु दी ख्रीष्ट् खीत्रङ्गी नङ्ल स्युन यो़क्केन् दी बेत्। हुगो झ्यीनी खीत्रङ्ल आक् इगीगी तो़त्वङ् च्येम्मे ओ़च्च्य झ्यीस्सल ॱलीक्केङ्गी रीगो यो़क्केन् बेत्। 28खोङ्गी धो़ङ्गी केच्च्य हीगो ङीक्की मी घयेत्ल ॱस्यो़क्को़त्। ख्रीष्ट्तङ् मत् ढेबे मी रीदङ् री फी़न्सुम् छङल झ्युङ्न, को़न्ज्योक्की ढुङ्दु ठीक् छुज्ये यो़प्पे धो़ल्ल ङीक्की खेबोक्म झ्यीन मी रीदङ् रील ॱलोप्स ज्यक्को़त्। 29ङल ख्रीष्ट्की ॱस्यीक् छ्यीम्मु ॱनङ्नी, हुनी हुगी ॱस्यीक् दीगी ङे टेत् च्येत्न हुगी ले हुगो डुप् छुब झ्यीक्को़त्।
Currently Selected:
कलस्सी 1: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
