२ कोरीन्थी 9
9
चेन्ड टो़प्पे ढीक्ल ॱलोप्स १-१५
1को़न्ज्योक्की मी चङ्म घयेत्ल दगु झ्यीच्च्येमे धो़ङ्गी ढीक्ल ह हीले मङागी केच्च्य ङ ढी मीत् गो़ब यो़त्। 2टो़च्च्येमे लेल खीत्रङ्गी ॱलो़नी ॱसीम्नी टो़क्केन् हीम्ब ङल ॱस्यो़च्च्ये यो़त्। अखैया लुङ्बन यो़क्केन् खीत्रङ् घयेक्की ननीङ्नीरङ् टो़च्च्येम ठोक्क झ्यीन यो़क्केन् बेत् सीन्न मासीडोनीयागी पी़न्ज्या घयेत्ल ङे खीत्रङ्गी ढीक्ल ङोम्ज्येत् ॱस्येत् छरेन्। खीत्रङ्ल हुन्दुक् झ्यीबे स्यीदङ् यो़प्प दी ॱह घोनी, हुब घयेत् मङागी ॱसीम्ल आक् हुगो डस्सीगी स्यीदङ् लङ्सोङ्। 3ङे खीत्रङ्गी ढीक्ल ॱस्येप्पे ङोम्ज्येत् दी धो़म्मीत्ल डोज्ये मीप्पल ङे ॱयोङ्ल ॱस्येत्न टेप्पे खीत्रङ्गी एल्लानी ठोक्क झ्यीन यो़प्पे केच्च्य दी हुन्दुक् दीरङ् युङ्ज्ये यो़प्पल ङे हीगी पी़न्ज्या हीब तोङ्गेन् हीनो। 4स्येन् खीत्रङ्गी घुङ्दु दी़च्च्येमे ले दी ठोक्क झ्यीन मीप्पे कप्ल मासीडोनीयागी मी यरी खीत्रङ् च्याल ङदङ् दल युङ्न हुबे हुगो थोङ्न ॱनी, ङीक्की खीत्रङ्ल देङ् खीन यो़प्पल मीत् डीक्पे लेमु ङीत्ल छ्युवक् मेम्ब, खीत्रङ्ल आक् ङु छय युङ्गेन् बेत्। 5हीगी ढीक्ल खीत्रङ्गी टो़क्केन् सीरे हुगी ॱनङ्ज्येत् दी ङ युङले एल्ला ठोक्क झ्यीन लेमु डीक्च्ये यो़प्पल हीगी पी़न्ज्या हीब एल्ला डोरो झ्यी सीन्न सीर् गोयेत् ॱनो़ब छ्यर्च्युङ्। ॱनी हुगो झ्यीनी खीत्रङ्गी टो़क्केङ्गी ॱनङ्ज्येत् हुगो कर् फोक्न टो़त् गो़ ॱस्यर्केन् मेम्ब, ॱलो़लङ्गी लक् यङ्जो़त् झ्यीन टो़त् छुज्ये यो़प्पल बेत्।
6हीगो घोव झ्यीज्यीत्। मी ॱसी़ ॱमीत् ॱङीन् ॱस्येत्न ॱसो़न् नुङा तोप्कुक्क हुगोल तीङ्ला तो़न्दोक् दी इक् नुङारङ् युङ्गेन् बेत्। ॱनी यङ् लक् यङ्बोक्म झ्यीन मी ॱसी़ ॱसो़न् ॱस्यो छ्यीम्मु तोप्कुक्क हुगोल तो़न्दोक् दी इक् ॱस्यो छ्यीम्मुरङ् युङ्गेन् बेत्। 7फङ्गीन् फङ्गीन् कर् फोक्न टो़त् गोगो़त् ॱनो़न मेम्ब, ॱसोस्सोरङ्गी ॱसीम्बे छ्यक्चो़त् झ्यीन घजो़त् च्यीक् टो़च्च्ये ॱनो़गो़दङ् उजो़त् च्यीक्रङ् टो़च्च्यीत्। घन्ड हीन् सीन्न ॱसीम् गनी टो़क्केल्ल को़न्ज्योक् गुगेन् बेत्। 8खीत्रङ्ल गो़बे खोज्येत् घयेत् कुरीक् छीगङ् युङ्ज्ये यो़प्प धङ् खीत्रङ्गी गये लेगी ढङ् घन्ड हीन्न अक्, हुगो झ्यीत् छुज्ये यो़प्पल खीत्रङ्ल थुज्यी ज्येबर् को़न्ज्योक्की ॱनङ् छुगेन् बेत्। 9हुगो झ्यीनी मी ढङ्बी़ लेमी़ ढीक्ल ॱसुङ्रप्ल ढीन यो़क्केन् बेत्।
मी टङ्बु घयेत्ल हुगी लक् यङ्सी तीक्केन् बेत्। हुगी गय झ्यीबे ढेन्सो़ दी फु तक्सी दो़क्केन् बेत्। (ॱसुङ्रप्की गुल्लु ११२:९)
10ॱसो़न् गो़बल ॱसो़न् धङ् सम गो़बल सम ॱनङ्गेन् को़न्ज्योक्की खीत्रङ्गी गये लेगी डेबु दी ज्येबर् छ्याज्ये यो़प्पल खीत्रङ्ल यो़प्पे ॱसो़न् घयेत् दी हरुङ् ज्यीक्तु सो़न ॱयोङ्ल फेम्ब युङल सोगेन् बेत्। 11खीत्रङ्गी लक् यङ्बोक्म झ्यीन छीगङ् टो़त् छुज्ये यो़प्पल घन्डे गो़ब तोक्प आक् मीप्प, को़न्ज्योक्की खीत्रङ् छ्युक्पुल बर्तु ची़क्केन् बेत्। हुनी क हज्यरङ् च्येन्नी हुबल अक् फेम्ब टेत्न, हुनी हुबे को़न्ज्योक्ल थु छ्यी पुगेन् बेत्। 12खीत्रङ्गी ॱनङे हुगी डेबु हुगी को़न्ज्योक्की मी चङ्म घयेत्ल गो़ब तोक्प घयेत् मीप्पल सोगेन् छ्युवक् मेम्ब, को़न्ज्योक्ल आक् थु छ्यी पुगेल्ल युङ्गेन् बेत्। 13खीत्रङ्गी ॱनङे ॱनङ्ज्येक्की ले हुगी खीत्रङ्गी धेप्प दी गस्सी यो़प्प हीम्ब कुरीक्की ॱह घो छुगेन् बेत्। हुनी ख्रीष्ट्की ढीक्की केच्च्य ॱनेम्बुल खीत्रङ्गी ख यच्च्येक्की छ्युवक् मेम्ब, क धङ् धम्ल चीन, लक् यङ्बोक्म झ्यीन हुब घयेत्ल धङ् हुनी ॱयोङ्माल आक् टेत्न, दगु झ्यीबे ढीक्ल हुब घयेक्की को़न्ज्योक्ल तो़प्प पुगेन् बेत्। 14खीत्रङ्ल को़न्ज्योक्की नुक्मे थुज्यीगी ज्यीक्प ॱनङ हीम्ब हुबे ॱह घोनी, खीत्रङ् ढेन्सी झ्यीन हुबे खीत्रङ्गी ढीक्ल ॱसुव तोप्केन् बेत्।
15को़न्ज्योक्ल थु छ्यी छ्यी। घन्ड हीन् सीन्न खोङ्गी हज्यरङ्ल तम्गी छीक्टल ॱस्यो़त् दीरङ् ॱमीत् छुगेङ्गी ॱनङ्ज्येत् हज्यरङ्ल ॱनङ्न यो़क्केन् बेत्।
Currently Selected:
२ कोरीन्थी 9: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
