२ कोरीन्थी 3
3
1खीत्रङ्गी ङे केच्च्य हुल यङ् तम्दो़त् ॱस्यो़क्कुक् सीगो़ट्टो। ङीत् खीत्रङ् च्याल युङ् गो़ झ्युङ्, यङ् खीत्रङ् च्यानी ॱयोङ्ल डो गो़ झ्युङ्न अक्, ॱयोङ्माल गो़गेन् डस्सी ङीत्ल घन्डे ङोस्स्यीङ्गी यीगीगी गो़ज्येत् दी यो़प्प? 2मी कुरीक्ल ॱस्यो़च्च्ये यो़क्केन्, कुरीक्की डोक् ॱस्यीगेङ्गी ङीक्की ङोस्स्यीङ्गी यीगी दी खीत्रङ् बेत्। हीगो ङीक्की ॱसीम्ल आक् ढीन यो़त्। 3हुदु ङीक्की स्यप्च्यी़गी लेगी झ्युङे ख्रीष्ट्की ढीबे यीगी दी खीत्रङ्सो घयेत् झ्युङ्न यो़क्केन् बेत्। हुगो ॱनक्चागी ढीब मेम्ब, ॱसोम्बु हीम्बे को़न्ज्योक्की थुगी ढीब बेत्। हुगो दो ॱयम्बक्ल ढीब मेम्ब, कोलीमी ॱसीम्ल ढीन स्यक्न यो़क्केन् बेत्।
4को़न्ज्योक्ल ख्रीष्ट्की लम्नी ङीत् ॱलो खीनी, हुनी ङीक्की हुगो हुन्दुक् सीन्न सीर् छुगो़त्। 5ङीत्रङ्गी झ्यीबे ले घयेत्ल ङीत्रङ्गीरङ् नम् च्यो़क्केल्ल ङीत् मीत् ओ़ब यो़त्। ॱनी हीन्न अक्, ङीक्की घन्ड झ्यीत् छुगो़दङ् हुगो कुरीक् को़न्ज्योक् च्यानी युङ्गेन् बेत्। 6ङीत् खोङ्गी कगो़त् धम्स्यक् ॱसम्बे स्यप्च्यी़ ज्युक्केल्ल ओ़बे मील सो़ज्युङ्। हीगी कगो़त् धम्स्यक् हीगो यीगील ढीब हुगो डस्सीगी लुल मेम्ब, धम्बे थुगी लुल यो़क्केन् बेत्। यीगील ढीब हुगी च्यानी ॱस्यीव युङ्गेन् बेत्। ॱनी धम्बे थु च्यानी छी युङ्गेन् बेत्।
कगो़त् धम्स्यक् ॱसम्बे तो़त्वङ् ७-१८
7दो ॱयम्बक्ल ढीबे यीगी दी ॱनङे यङ्ल मोशागी झ्येत्ङेल झ्युङे तो़प्पे ओ़त् टक्सी दील इस्राएली घयेक्की फोरी त ॱमत् छुब बेत्। हुगो ये डोगेङ्गी तो़प्पे ओ़त् बेत्। ॱनी ॱस्यीवे लुल यो़क्केङ्गी स्यप्च्यी़गी ले हुल अक् त हुन्दुक्मे तो़प्पे ओ़त् युङ्न ॱनी, 8धम्बे थुगी लुल यो़क्केङ्गी स्यप्च्यी़गी लेल ॱसुम्ब हुले ज्यीक्पागी तो़प्प युङ्गेन् मेम्बेक्क ॱनी? 9छ्येप्प फोक्केन् हीम्बे स्यप्च्यी़गी लुल अक् त हुन्दुक्मे तो़प्पे ओ़त् युङ्न ॱनी, ॱनम्बर् धक्पल तो़म्बे स्यप्च्यी़गी लु हुल ॱसुम्ब हुले गज्येङ्गी ज्यीक्पागी तो़प्प युङ्गेन् बेत्। 10हन्देङ्गी हीगी नुक्मे तो़प्पे ज्यीक्पल तेन, ॱएम्मागी तो़प्पे ओ़त् हुगो त घन्ड अक् मेम्बेत् ॱनो़गुक्। 11फु ॱमीत् तक्केन् हुल त हुन्दुक्मे तो़प्पे ओ़त् युङ्न ॱनी, हुनी फु तक्केन् हील ॱसुम्ब घन्दुक्मे तो़प्प ज्यीक्प युङ्गेन् बेक्क।
12ङीत्ल हीन्दुक्मे रीगो यो़क्केन् झ्यीनी, ङीक्की ॱसङ्सोङ् मीप्प ॱस्यो़क्को़त्। 13ङीक्की मोशागी झ्यीब डस्सी झ्यीक्केन् मेन्। खोङ्जो़ रोरङ्गी झ्येत्ङेल ओ़त् टक्सी यो़प्पे यङ्ल घो़ कक्प दी तीङ्ला ओ़त् दी येन खुर्नी इक्, इस्राएली घयेक्की हुगो ॱह घोज्ये मीप्पल घो़ दी ॱमत् पीक्प स्यक्प बेत्। 14इस्राएली घयेक्की ॱसीम् दी गट्टक्प झ्यीनी, कगो़त् धम्स्यक् ॱङीङ्बे ॱसुङ्रप् डोन अक्, हुबे ॱह मीत् घोज्ये दी हुबे ॱसीम्ल मोशागी झ्येत्ङेल कक्पे घो़ हुगो डस्सीगी हजो़त् थुक् कक्न यो़क्केन् बेत्। घन्ड हीन् सीन्न हुब ख्रीष्ट्की लम्ल युङ्न मेन्द, हुगो मीत् भीगेन् बेत्। 15ॱनी मोशागी ॱसुङ्रप् डोक्पे यङ्ल हुबे ॱह मीत् घोज्ये दी हुबे ॱसीम्ल दङ् हरीङ् हुन्दो थुक्ल हुगी घो़ दीगीरङ् कक्न यो़क्केन् बेत्। 16नम् हुब चोव ज्यीन्दक् च्याल लोक्न युङ्गो़दङ् हुगी यङ्ल क हुबे ॱसीम्ल कक्न यो़प्पे घो़ दी भीगेन् बेत्। (थो़म्ब ३४:३४)
17चोव ज्यीन्दक् ॱनी धम्बे थु बेत्। ॱनी चोव ज्यीन्दक्की थुगी ले घदु जेक्को़दङ् हुदु मी घयेत् रङ्मो़ल थो़ङ्गेन् बेत्। 18हज्यरङ्गी झ्येत्ङेल हुगी कक्केङ्गी घो़ दी मीप्पल चोव ज्यीन्दक्की तो़प्पे ओ़त् दी फोक्केन् बेत्। हुनी हज्यरङ् च्येन्नी इक् हुगी ओ़त् दी फल्ल डोगेन् बेत्। ॱनी हीगो धम्बे थु हीम्बे चोव ज्यीन्दक्की सो़न, हुनी हज्यरङ् अङ् खोङ्गी तो़त्वङ् हुगोदङ् डगेल्ल गदु गदु ज्युर्केन् बेत्।
Currently Selected:
२ कोरीन्थी 3: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
