MUV̄ENULIO 7
7
Watru 144 000 watrilwa muhuri wa Mungu
1Ɓaanda ya v̄ale, tsiono malayika nne zahima hari mwa zikotso nne za ishiv̄andre ya tsi. Zakozia zipev̄o nne za ishiv̄andre ya tsi, ile v̄wasuke ata pev̄o yavudzia, tsi hari mwa ishiv̄andre ya tsi, tsi ɓaharini, wala ata hari mwa muri moja. 2Amwesa tsiono malayika yangina yakohea uv̄andre wa jua la uhea, tsena ika isiki umuhuri wa Mungu alio hayi. Ashelemedzea ha ji lendza nguvu zimalayika nne zile zaka zaãmurishiwa zifanyiye mbovu ishiv̄andre ya tsi na iɓahari, amba: 3«Mwasurendreye mbovu ishiv̄andre ya tsi, ɓila iɓahari, wala yimiri, ata mupaka ritriye muhuri usoni mwa warumishi wa Mungu watru.» 4Amwesa tsikia iindadi ya wale watrilwa umuhuri: watru alifu miya wa aruɓaini na nne (144 000) wa piya zingudjama za Israila:
5Hari mwa udjama wa Yuda watru alifu kumi na mbili
(12 000) watrilwa umuhuri,
hari mwa udjama wa Ruɓen 12 000,
hari mwa udjama wa Djadi 12 000,
6hari mwa udjama wa Ashira 12 000,
hari mwa udjama wa Nafutali 12 000,
hari mwa udjama wa Manasi 12 000,
7hari mwa udjama wa Sameana 12 000,
hari mwa udjama wa Lawi 12 000,
hari mwa udjama wa Isakari 12 000,
8hari mwa udjama wa Zaɓuluna 12 000,
hari mwa udjama wa Yusufu 12 000,
na hari mwa udjama wa Ɓenyamini 12 000.
Nida yahusu idunia yapindra nguo ndjeu
9Ɓaanda ya v̄ale, tsiono dunia ha uɓole ilio amba kav̄u ata mutru akoshindra aihasiɓu, ya kula nishani, kula kaɓila, kula umati, na kula luha. Waka wahimi mbeli na ishiri ya ufalume, tsena mbeli na uMwana Ɓariɓari, amwesa waka wapindri nguo ndjeu, wasiki na mahuri mihononi. 10Wakoshelemedza ha ji lendza nguvu amba:
«Ukombofu, uwo wa Mungu watru aketsi hari mwa
ishiri ya ufalume,
tsena wa uMwana Ɓariɓari.»
11Na piya zimalayika zika zihimi uzingidzia ishiri ya ufalume, uwadzaɗe, v̄umoja na ziumbe nne zendza roho zile. Wareme uso wawo v̄otsi mbeli na ishiri ya ufalume na usudjudia Mungu 12ha urongoa:
«Amina!
Sifa, utukufu, hikima, uhimidifu,
hishima, ushindzi na nguvu
nazimuendreleye Mungu watru mida ha mida.
Amina!»
13Ɓas moja hari mwa wadzaɗe wale arenge umurongo, anidzisa: «Wale wapindra zinguo ndjeu, wale watru trini, walawa hav̄i?»
14Tsimudjiɓu: «Mutukufu, wawe usujua.»
Amwesa aniambia: «Wao ɗe walawao hari mwa lidjondo ɓole. Wafua nguo zawo, wazifanya ndjeu hari mwa idamu ya uMwana Ɓariɓari. 15Iyo ɗe imana ata
‹walio mbeli na ishiri ya ufalume ya Mungu,
wasumufanyia ĩɓada uku na mutsana
moni mwa iNyumba Ndzitwaharifu yahe.
Monyewe uketsi hari mwa ishiri ya ufalume
atsowav̄ishidza ha umukayo wahe.
16Kawatsoona ndza tsena,
wala kawatsoona nyora tsena.
liJua kalitsowarema,
wala hari kaitsowavudza.
17Mana uMwana Ɓariɓari
alio hari-hari na ishiri ya ufalume atsowatsunga#7:17 atsowatsunga: Au: atsoka mutsunga wawo.
na uwav̄inga hari mwa matso ya maji ya uhayati.
Na Mungu atsov̄angua kula tsozi la matso yawo.› »
Currently Selected:
MUV̄ENULIO 7: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
