MUV̄ENULIO 10

Nida yahusu malayika na umwana shio av̄erwa

1Amwesa tsiono malayika yangina yendza ushindzi, yakoshuka ulawa pev̄oni, yaka yapindra vingu na shitswa yayo ika izingidziwa na mukakamba. Uso wayo uka mauri ɗe lijua, na yimindru yayo mauri ngidzo za moro. 2Ika isiki muhononi mwana shio aka aɓuha. Ika ihetsi umundru wa hume ɓaharini, na umundru wa potro shiv̄andreju mwa tsi. 3Amwesa ishelemedza ha ji lendza nguvu, mauri simba ingurumao. Ushelemedza yayo, yamaguguma saɓa yahedza maji yawo. 4Wakati maguguma saɓa yale yalagua, nakwendra amba niangihe, ɓadi tsikia ji lalawa pev̄oni amba: «Sikidza liti izo zarongolwa na yamaguguma saɓa yale, ɓadi usuziangihe.»

5Ɓasi imalayika naiona yaka yahima uju na iɓahari na uju na ishiv̄andre ya tsi, ihedza umuhono wa hume pev̄oni, 6amwesa ilav̄a na Uwo aẽshio ha daima, aumba uwingu na izo zilio moni hawo, ishiv̄andre ya tsi na zilio moni hayo, iɓahari na zilio moni hayo, amba: wakati ukomo! 7Ɓadi hari mwa zisuku imalayika ya saɓa itsojao ivudziye liɓaragumu layo, iãdjaɓu ya shi Mungu itsotsimidziha ha uɗunga izo ajudza warumishi wahe, ne ɗe yimitrume.

8Amwesa liji naka nalikia ulawa pev̄oni lilagua tsena na wami ha urongoa: «Endra warenge umwana shio aɓuha muhononi ha imalayika yahima uju na iɓahari na uju na ishiv̄andre ya tsi.»

9Ɓasi tsendre tsipara imalayika, tsena tsiiambia iniv̄e umwana shio. Sa ile iniambia: «Irenge, amwesa uiɗye. Itsotria nyongo mimbani haho, ɓadi hanyoni haho itsoka ngizi mauri ya nyoshi.» 10Tsirenge umwana shio muhononi ha imalayika, amwesa tsimuɗyi. Hanyoni hangu ika ngizi mauri ya nyoshi, ɓadi wakati naiɗya, mimba yangu ingia nyongo. 11Ɓas tsiambilwa: «Ilazimu raha ulaguwe shi mutrume ashukidziwa marongozi yahusu uwengi wa umati, wa nishani, wa luha, na wafalume.»

Currently Selected:

MUV̄ENULIO 10: swb

Highlight

Compare

Copy