MAFILIPI 1

1Ɓaulusu na Timutausu, warumishi wa Kristi-Insa, ha piya watwaharifu hari mwa uv̄umoja wawo na Kristi-Insa walio ɗagoni Filipi, ha yamadhwamana na wasaidizi: 2Rehema na utrulivu nazimuendreleyeni ha ulawa ha Ɓaɓatru Mungu na Raɓi Insa-Kristi.

Mamilio na himida ha yaMafilipi

3Nisumuhimidia Mwalangu Mungu kula namomunahanani. 4Kula namomumiliani piyanyu, wami umilia ha furaha, 5ha siɓaɓu ya lifuvu mulirengao hari mwa iIndjili rangu isuku ya handra ata leo. 6Tsina yakini na itrongo ini, amba Monyewe uandrisa hazi ndzuzuri iyo moni hanyu, atsoendrelea ha uikamilisha mupaka isuku ya umuregeo wa Kristi-Insa.

7Iyo haki neka nisumufikirini piyanyu namuna iyo, mana nisumuv̄ingani rohoni, wanyu mulio amba neka hari mwa zifungo za silisili zangu, mauri hari mwa idifaĩ na uhakikisha iIndjili, musurenga fuvu piyanyu hari mwa ineema nadjaãliwayo. 8Kweli amba shahidi Mungu ha uv̄endza nilionayo na wanyu piyanyu, uv̄endza wa Kristi-Insa.

9Iyo niitsahao hari mwa mamilio yangu, ɗe amba uv̄endza yanyu yendre na uzidishiha ujuzi wa kweli, na wanyu ushindra muelewe ha ukamilifu zitrongo, 10pare mujuwe mutsahuwe ilio mahususu, tsena muke wa kweli ɓila tuhuma isuku ya umuregeo wa Kristi, 11amwesa ike amba mujadziwa mavuna ya uhaki yajao ha indzia ya Insa-Kristi, ha utukufu na sifa ya Mungu.

Muendreleo-mbeli wa iHaɓari Ndjema

12Nisutsaha mujuwe, wananyangu, amba izo zanipara, ha kinyume zitsongesha umuendreleo-mbeli wa iIndjili. 13Kweli amba moni na piya lidjumba la umuɓole wa isirikali, mauri ɗe hari mwa piya yimikaɓala yangina, iv̄enuha amba tsa hari mwa zifungo za silisili ha siɓaɓu ya Kristi. 14Ha zifungo za silisili zangu ɗe uwengi wa wananya wa shi uaminifu wangia ɓari hari mwa uv̄umoja wawo na Raɓi, ata wasuɓutuo wajudze Urongozi wa Mungu ɓila trisidzo.

15V̄wa ɓaãdhwi kweli wamujudzao Kristi ha uwivu na mashindrano, ɓadi wasalia ha nia ndjema. 16Wao wasuifanya ha mahaɓa, iv̄o wajuao amba tsa v̄anu ha uwania iIndjili. 17Na wa handra wale umujudza Kristi ha mashindrano, wala tsi ha umo warahara. iNia yawo ɗe ufanya namuna amba zifungo zangu zizidi uka ndziro. 18Kav̄u taãɓu! Ha namuna yotsi itsokao, neka ha umo munafiki au warahara, Kristi asujudzwa. Na wami nisujiv̄iwa nayo.

Amwesa nitsojiv̄iwa raha, 19mana nisujua amba iyo itsoniv̄ingia uhuyifu ha mamilio yanyu, na ha umusada wa iRoho ya Insa-Kristi. 20Trongo naiv̄a matso ha kusudi niitumainiao, ɗe amba tsitsoona haya na itsokao yotsi, ɓadi nike na uhodari watsimu, amba rangu av̄asa ata ha daima, Kristi atsotukuziwa mwilini hangu, neka tsa hayi, au neka tsifu. 21Mana hanguju uhayati wangu ɗe Kristi, na ufa, uwo tanafu. 22Ɓadi neka amba uka hayi duniani v̄anu itsonidjaãlia hazi yendza mavuna, tsisujua iv̄i ɗe nitsahuwe. 23Nisuvurwa uv̄andre iyo mili: tsina ushauku wa ulawa tsena nike na Kristi, mana iyo ɓorwa mbali tu. 24Ɓadi uɓaki ulemenguni ina mana zaidi ha siɓaɓu ya wanyu. 25Ɓasi tsina yakini na wiyo, nisujua amba nitsoɓaki, tsena nitsoendrelea na wanyu piyanyu ha siɓaɓu ya umuendreleo-mbeli wanyu, na ifuraha hari mwa uaminifu wanyu, 26ile ha wami uzidi siɓaɓu ya udzifaharisha hari mwa uv̄umoja wanyu na Kristi-Insa, wakati nitsorudio hanyu.

27Ɓadi namudziv̄inge ha namuna yastahiki iIndjili ya Kristi, ile pare neka nisuja nimuoneni, au tsisuja, nikiye amba musiki hodari ha nia moja, amwesa ha ãzima moja musuwanilia uaminifu wa iIndjili, 28ɓila udzilisha murisidziwe na itsokao yotsi na wao walio kinyume. Hawo uwo udhiɓitifu wa uangamifu, ɓadi yahusu wanyu, wa uhuyifu; na iyo isulawa ha Mungu. 29Kweli amba yahusu Kristi, mudjaãliwa irehema tsi tu amba ya utria uaminifu wanyu hahe, ɓadi tsena ya uondesheha ha siɓaɓu ya waye, 30ha uwania kondro wiyo-wiyo na iyo mwaona hangu, tsena munikiao nayo raha.

Currently Selected:

MAFILIPI 1: swb

Highlight

Copy