FILIMUNA 1
1
1Wami Ɓaulusu, mufungwa ha siɓaɓu ya Kristi-Insa, v̄umoja na umwananya wa shi uaminifu Timutausu, risuhuangishia Filimuna mushangirizi muv̄endzewa watru, 2na mwananyatru mutrumushe Afiati, na Arkiɓusa munyatru hari mwa uwanilia iIndjili, v̄umoja na iDjama Ndziwaminifu ingulidzanao ɗagoni haho: 3Urehema na amani zilawao ha Ɓaɓatru Mungu na Raɓi Insa-Kristi nazimuendreleyeni.
Uv̄endza na uaminifu wa Filimuna
4Nisumushukuria Mungu wangu kula sa namohunahana hari mwa mamilio yangu, 5mana nisukia ihaɓari ya uv̄endza waho na uaminifu ulionawo na Raɓi Insa, ha tanafu ya piya uwatwaharifu. 6Nisumia Mungu amba murengeo-fuvu waho hari mwa uaminifu uhuv̄ingiye ujuzi mukamilifu wa kula ndjema rilionayo hari mwa uv̄umoja watru na Kristi#1:6 Kristi: Au: kula ndjema rishindrao riifanye ha tanafu ya Kristi.. 7Kweli amba tsipara furaha ɓole v̄umoja na mutrilio-ɓari ha siɓaɓu ya uv̄endza waho, mana ha wawe mwananyangu wa shi uaminifu, ziroho za uwatwaharifu zirutuɓishiha.
Ɓaulusu asumumilia Onesimu ha Filimuna
8Iyo ɗe imana, ata iv̄o hari mwa uv̄umoja na Kristi niliona furswa ya uhuãmurisha ufanye izo zalazimu, 9ne nisuona ɓorwa nihutafadali ha siɓaɓu ya uv̄endza. Ha inamuna nilio wami Ɓaulusu muɗuhazi, na zaidi ya v̄av̄o tsena mufungwa iv̄o nimurumishiao Kristi-Insa, 10nisumilia hahoju umwana wangu wa shi uaminifu Onesimu#1:10 Onesimu: iMana ya lidzina lilo Mwendza Faida., alio amba afanyiha mwana wangu uka yangu hari mwa silisili. 11Mara ya handra kakohufayidisha, ɓadi av̄asa asuhufayidisha wawe na wami.
12Nisuhurudisiawo, waye alio shiga ya umwili wangu. 13Natsov̄endza aɓaki na wami anirumishiye ɓadala ya wawe, v̄anu nilio hari mwa silisili ha siɓaɓu ya iIndjili. 14Ɓadi tsatsaha nafanya trongo itsokao yotsi kaɓula ya utsaha shauri laho, pare yasuke amba zema zaho farudhwi, ɓadi ha uv̄endza yaho monyewe. 15Ukiri uka amba atsapushiana na wawe hari mwa mwana muda, ile urudi umupare ha daima, 16tsi amba murumwa raha, ɓadi zaidi ya murumwa, shi mwananya muv̄endzewa. Waye a namuna iyo hususwani hanguju, ɓasi ha mara ngav̄i atsokao namuna iyo hahoju, shimwili na hari mwa uv̄umoja na Raɓi!
17Ɓasi neka usuniona amba wami munyaho, murenge mauri ɗe wami. 18Neka ahukoso na trongo, au ana deni haho, tsiiremea shifuɓa. 19Wami Ɓaulusu ɗe niangihao ha umuhono wangu amba nitsohurudisiayo wami monyewe. Wala tsisuhuambia amba deni ulionayo hangu, ɗe inafusi yaho. 20Naam, mwananyangu, hari mwa uv̄umoja wa Raɓi, nirendreye hadja iyo, unirutuɓishe iroho ha siɓaɓu ya Kristi. 21Ɗe ha uaminifu wa utuĩvu waho ɗe nihuangishiao, tsena ha ujua amba utsofanya zaidi ya izo nitsahao.
22Ɓaanda ya v̄av̄o, nitayarishiye v̄ahanu v̄wa uketsi, mana nisutumainia amba ha yamamilio yanyu, niregezewe hanyu.
Masalamu ya mwiso
23Eɓafrasu, munyangu wa shiv̄a ha uv̄umoja wahe na Kristi-Insa, asuhusalimu, 24v̄umoja na washangirizi wangu Markusi, Aristarkusa, Demasu, na Lukasi.
25Rehema ya Raɓi Insa-Kristi naike v̄umoja na iroho yanyu.
Currently Selected:
FILIMUNA 1: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
