MAHEƁRANIYA 1
1
Mungu av̄enushia uwanadamu ha uMwana wahe
1Mida ya hale, Mungu alagua na wadzaɗe watru ha mara nyengi na namuna nyengi ha ndzia ya yimitrume, 2ɓadi hari mwa zisuku za mwiso zini, alagua na wasi ha ndzia ya Mwana wahe, alio amba amufanya muarithi wa piya, na ha waye ɗe aumba ulemengu kamili. 3uMwana uwo alio umuvagio wa utukufu wa Mungu, na umufano mukamilifu wa utru wahe, asuv̄inga piya zitru ha urongozi wendza ushindzi wahe. Ɓaanda atsimidza umurahatsio wa yamadhambi, aketsi humeni mwa Monyewe Ufalume hari mwa yimikaɓala ya uju. 4Afanyishiha muɓole rahana zimalayika, ata lidzina aliarithi ne dzihu rahana lazo.
uMwana ɗe umuɓole wa piya
5Mana iv̄i hari mwa zimalayika Mungu aparoiambia amba:
«Wawe Mwana wangu;
ileo ini tsifanyiha Ɓaɓaho?»#1:5 Namuangaliye Utende 2:7. iShigiriki isurongoa tsihudza.
Amwesa tsena:
«Wami nitsoka Ɓaɓa haheju,
na waye hanguju, atsoka Mwana.»#1:5 2 Samueli 7:14.
6Na tsena, uv̄eleha yahe umudzalwa wa handra uwo ulemenguni, arongoa:
«Piya zimalayika za Mungu
nazimuãɓudu.»#1:6 Namuangaliye Munahanisidziyo wa iSharia 32:43.
7Uhusu zimalayika arongoa:
«Asufanya malayika zahe pev̄o,
na warumishi wahe ngulimi za moro.»#1:7 Namuangaliye Utende 104:4.
8Ɓadi uhusu uMwana arongoa:
«Shiri ya yezi yaho, wawe Mungu,
iyo ya daima, na itsimbo ya utawalizi waho,
iyo tsimbo ya haki.
9Uv̄endze uhaki, amwesa uenge uovu; iyo ɗe imana Mungu,
ata Mungu waho ahutsahua ha uhutsomolea shitswani matra ya furaha zaidi rahana wanyaho.»#1:9 Namuangaliye Utende 45:6,7.
10Na tsena:
«Wawe Raɓi, ɗe mwandroni
waumba ishiv̄andre ya tsi, na zimbingu izo,
hazi za yimihono yaho.
11Izo zitsokoma, ɓadi wawe wa v̄av̄o;
zitsoɗuhwa piyazo mauri nguo.
12Utsoziv̄era mauri koti,
zitsogaudziwa mauri nguo.
Ɓadi wawe, wa ɗe wawe-wawe,
na yimaha yaho kayitsokoma.»#1:12 Namuangaliye Utende 102:25-27.
13Na iv̄i hari mwa zimalayika yaparoambilwa amba:
«Ketsi humeni hangu
ata mupaka nifanye maãduwi yaho
yake shikadza-mindru yaho»?#1:13 Namuangaliye Utende 110:1.
14Hali piya izo tsi roho ndzirumishi zav̄elehwa zirumishiye wao watsowarithio uhuyifu?
Currently Selected:
MAHEƁRANIYA 1: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
