MAEFESO 4

Uv̄umoja wa iDjama Ndziwaminifu, ɗe uMwili wa Kristi

1Ɓasi nisumutriani ɓari, wami nilio mufungwa ha siɓaɓu ya urumishi wangu ha Raɓi, mukane maendreleo yastahiki umuhirio mwaupara, 2hari mwa uwekevu na umakini, v̄umoja na suɓira. Namustahamiliane wanyu na wanyu hari mwa mahaɓa. 3Namufanye djitihadi ya usika uv̄umoja uv̄ingwao na iRoho, ha ukana iamani imufungamanisaoni. 4V̄wa mwili moja na Roho moja, mauri ɗe inamuna ilio amba itama mwahiriwa nayo moja, ne ɗe ile ya umuhirio wanyu. 5Raɓi waye moja, uaminifu uwo moja, muɓaĩsho moja, 6Mungu moja amma Ɓaɓa wa piya, alio uju na piya, ha piya, na hari mwa piya.

7Ɓadi kula moja hatruju adjaãliwa rehema, ha kadiri ya ishiv̄imo ya ineema ya Kristi. 8Iyo ɗe imana amba v̄urongolwa:

«Uhea yahe v̄ahanu v̄wa uju,

av̄ingi wafungwa wamuɗunge,

amwesa av̄a neema wanadamu.»#4:8 Namuangaliye Utende 68:18.

9Na v̄anu, mana yahe trini amba «uhea yahe», neka tsi amba ashuku wajau hari mwa yimikaɓala ya utsini shiv̄andreju mwa tsi? 10Ɓasi uwo ashuka, ɗe waye-waye ɗe ahea uju na piya zimbingu, ile akamilishe piya. 11Waye ɗe afanya amba ɓaãdhwi wake Mav̄ingizi-Risala, wasalia wake watru wajudzao marongozi washukidziwawo, wasalia amba wajudzizi wa iHaɓari Ndjema, na wasalia amba watsunga, iv̄o watru wasomedzao waaminifu, 12ile watwaharifu watayarishihe ha ihazi ya urumishi, pare umwili wa Kristi uundrishihe, 13ata mupaka riwaswili piyasi hari mwa uv̄umoja wa uaminifu na wa ujua ha kusudi uMwana wa Mungu, mauri watru waɓalihi, walingana na ishiv̄imo ya utru ukamilifu wa Kristi.

14Ha izo, karitsoka tsena wanatsa wav̄ingwao na maji, watangisiwao na kula pev̄o ya musomo, wapotezewao ha udjandja na yimipango ya unafiki ya wanadamu. 15Ɓadi ha urongoa ikweli ha mahaɓa, ritsohua hari mwa piya zitrongo ha ukaɓili inamuna ya ule alio ishitswa, ne ɗe Kristi. 16Ɗe ha waye ɗe umwili piya ha ukamilifu wawo waungatsiha na ufungiha hodari ha piya zifungo zilio moni mwawo. Ha izo, neka kula shiga isufanya ihazi yayo heli yalazimu, ɓasi piya umwili uhua na uhodarishiha hari mwa mahaɓa.

Maendreleo mav̄ia v̄umoja na Kristi

17Ɓasi tsini itrongo niirongoao tsena niishadidishao hari mwa uv̄umoja wangu na Raɓi: ɗe amba kamwalazimu mwadziv̄inga tsena mauri ɗe inamuna wadziv̄ingao watru wa zinishani zangina, walio amba fikira zawo kazina faida. 18Ãkili zawo zingia shidza. Wa mbali na uhayati wa Mungu, ha siɓaɓu ya ujinga ulio moni hawo ujao ha udziro wa ziroho zawo. 19Walatsishiwa na itrongo ya uona haya; wadzitria hari mwa taɓia mbovu na ufanya ɓila udzizia kula namuna ya utshafi.

20Ɓadi wanyu, tsi namuna iyo ɗe mwamujua Kristi. 21Neka anga amba kweli yahusu waye ɗe mwakia, tsena neka amba ha uv̄umoja wanyu na waye ɗe mwasomedzewa ha ulingana na ukweli ulio ha Insa, 22ɗe amba ilazimu mutsuwe maendreleo ya hale yanyu, mulishe itaɓia ya utru wanyu wa hale uangamiao ha zingushauku ndzidangamanyifu, 23tsena ilazimu mufanyihe watru wav̄ia hari mwa ziroho#4:23 ziroho: Au: ha iRoho hari mwa ziãkili zanyu. na zifikira, 24mudzipindrise uutru muv̄ia waumbwa ha mufano wa Mungu, hari mwa uhaki na utwaharifu zijao ha ukweli.

25Ɓasi namulishe unafiki, kula moja hari mwanyu aambiye munyahe ikweli, mana ra ziga za wasi na wasi. 26Mwamongia hasera, musulishe hasera zanyu zamuv̄ingani mwaãswi, na jua lasutswe hari mwa hasera zanyu. 27Mwasumuv̄e Iɓilisa nafasi. 28Uwo ahiɓao, asuhiɓe tsena; nadzirume ha ufanya hazi ya kweli ha mihono yahe monyewe, ile akane ya uv̄a uwo akosewa.

29Hanyoni hanyu v̄usulawe ata urongozi movu, ɓadi urongozi mwema utsoshindrao wakati walazimu, ufayidishe na uv̄ingia rehema wao waukiao. 30Musutriye huzuni iRoho Ndzitwaharifu ya Mungu, iRoho ilio amba ha wiyo muremwa muhuri wa isuku ya ukombofu. 31Ɓasi nazitolwe hari mwa wanyu kula unyongo wa roho, utukifu, hadhaɓu, umani, uruhana, tsena na kula aina ya uovu. 32Namuke wema na roho zendza poreho wanyu na wanyu; namuswamihiane, mauri ɗe inamuna Mungu amuswamihini ha uv̄umoja wanyu na Kristi.

Currently Selected:

MAEFESO 4: swb

Highlight

Copy