MAEFESO 2

Uhayati muv̄ia hari mwa uv̄umoja na Kristi

1Yamuhusuni wanyu, muka mufu ha yamahosa na madhambi yanyu, 2yalio amba mwakoyafanya ha uɗunga maendreleo ya ulemengu unu, mwakotuĩ umutawalizi wa iyezi ya hawani, lidjini lirendrao av̄asa ha wao kawatuĩ. 3Na wasi piyasi wajau rika hari mwa ihisaɓu yawo, tsena rakoɗunga zingushauku za shiuɓinadamu zatru, rakofanya mav̄endzeleo ya yimili yatru na ya zifikira zatru; tsena ha ihali ya shiuɓinadamu yatru, rika ristahiki ihadhaɓu, mauri ɗe wasalia. 4Ɓadi Mungu waye mutadjirifu wa poreho na ha siɓaɓu ya uv̄endza muɓole ariv̄endza, 5wasi raka rafa ha yamahosa yatru, ariẽshisa v̄umoja na Kristi. Ɓasi ha rehema ɗe mwahuyiwa. 6Hari mwa uv̄umoja watru na Kristi-Insa, Mungu ariregeza hayi v̄umoja na waye, tsena ariketsisa v̄umoja na waye hari mwa yimikaɓala ya pev̄oni, 7ile aonese hari mwa yimida yijao utadjirifu wazidishiha wa urehema wahe aridjaãliawo ha uwema wahe hari mwa uv̄umoja watru na Kristi-Insa. 8Mana ha rehema ɗe mwahuyiwa, ha ndzia ya uaminifu. Na iyo kaisuja ulawa hanyuju, ɓadi iyo ɗe ineema ya Mungu. 9Na iyo kaisi ata hata ha zitrendro, ile v̄usuke ata mutru ajua udziɓua. 10Mana wasi ra ɓuumbio lahe, riumbwa hari mwa uv̄umoja na Kristi, pare rifanye zitrendro ndjema Mungu azitayarisha rangu kaɓula amba rizifanye.

Uv̄umoja wa watru wa mbali na mbali ha uaminifu wawo na Kristi

11Namunahane ɓasi wanyu mulio amba ha ãswili, wanyu wa nishani zangina muhiriwao «tsi matahiriwa» na wao wadzihirao «matahiriwa», trongo yafanyiwa mwilini ha muhono wa mwanadamu, 12amba wakati uwo mwakoka ɓila Kristi; muka v̄ondze na umati#2:12 umati wa Israila: Yaãni, watru watsahulwa na Mungu. wa Israila, muka wadjeni na yimikataɓa|mukataɓa ya uwahadi, kamwakana tama wala Mungu ulemenguni. 13Ɓadi av̄asa, hari mwa uv̄umoja na Kristi-Insa, wanyu mwaka mbali hale hule, mukuruɓisiwa ha idamu ya Kristi.

14Mana waye ɗe amani yatru, waye alio amba afanya amba waili wale wafanyihe moja; ha utoa fidia umwili wahe, akomoa uuhura wa mutsapushiano, ne ɗe uãduwi. 15Azimi hatwi iSharia na ziãmuri zayo na masharutwi yazo, ile hari mwa uv̄umoja na iwaye yahe, afanye amba waili wale wake mutru moja muv̄ia ha ujisa iamani, 16na uwaparanisa na Mungu wao waili ha mwili moja, ha ndzia ya umuri wa pawa: na v̄av̄o aangamidza uãduwi. 17Aja ajudze ihaɓari ya amani ha wanyu mulio amba muka mbali, na iamani ha wao waka kariɓu. 18Kweli amba ha ndzia yahe wasi waili risujua rimukuruɓia Ɓaɓa, ha Roho moja wiyo-wiyo.

19Ɓasi ha izo, kamusi tsena wadjeni wala watru wa v̄ondze, ɓadi muna uraĩa moja na watwaharifu, mwa hari mwa udjama wa Mungu. 20Muja muundrwa hari mwa umusingi wafanyiha ha yaMav̄ingizi-Risala|Mav̄ingizi-Risala na yimitrume, musingi ulio amba Insa-Kristi waye-waye ɗe liɓwe la nyongaju. 21Hari mwa waye ɗe piya liɓundro lafungamanisiha, lihimao like nyumba ndzitwaharifu ilio ya Mola. 22Ɗe hari mwa uv̄umoja na waye, ɗe wanyu wajau mwaundrwa v̄umoja, pare muke makazi ya Mungu ayaketsiao ha iRoho.

Currently Selected:

MAEFESO 2: swb

Highlight

Copy