MAV̄INGIZI-RISALA 18

Ɓaulusu ɗagoni Korintiyo

1Ɓaanda ya v̄ale Ɓaulusu alawa Atheni, andre Korintiyo. 2Apara Muyahudi hule akohiriwa Akila, mutru wa shi Pontusu, aka awaswili tsi hale ulawa Italiya, waye na mushe wahe Priskila, mana Klaudiyusu aka atoa ãmuri amba piya Mayahudi walawe Romu. Ɓaulusu andre awapara, 3na ha iv̄o wakana muhono wa hazi moja, aketsi na wao, wafanya hazi v̄umoja. Waka wafanyizi wa nyumba za haima. 4Kula Suku ya Uv̄umuzi Ɓaulusu akoka hari mwa mahadisi moni na iNyumba ya Uswali na udjereɓu ayakinishe Mayahudi na Magiriki.

5Wakati Silasi na Timutausu wawaswili ha ulawa Makadoniya, Ɓaulusu akorumia piya uwakati wahe ha ujudza uUrongozi wa Mungu. Akolawa ushahidi mbeli za yaMayahudi amba Insa ɗe Mutsahuliwa. 6Ɓadi ha iv̄o wakomukanyusha na umuruhana, Ɓaulusu ahukutra nguo zahe, amwesa awaambia: «Damu yanyu naimutrishiyeni shitswani hanyu. Tsisi djukuma. Rangu av̄asa nisendra ha wale tsi Mayahudi.»

7Ɓas alawa v̄ale, andre ha mutru akohiriwa Titiyusu Yustusu, alio amba akomuria Mungu; inyumba yahe ika kariɓu na iNyumba ya Uswali. 8Na v̄ale Krispusu, dhwamana wa iNyumba ya Uswali, aja amuamini Raɓi v̄umoja na piya udjama wahe. Tsena, Makorintiyo wengi wakomuvulishia Ɓaulusu waamini, amwesa waɓaĩshiwa|uɓaĩsha.

9V̄uka uku, Mola amuambia Ɓaulusu hari mwa nida: «Usuriye, lagua, wala usuɓurihe; 10mana wami yangu tsa v̄umoja na wawe, wala kav̄u mutru atsohubambao, ahurendre mbovu; mana tsina umati mwengi moni na liɗago lilo.» 11Ɓas, aka v̄ale hari mwa mwaha na mezi sita ha usomedza watru wa Korintiyo uUrongozi wa Mungu.

12Wakati Galiyo aka ahetsiwa muɓole wa liɓavu la Akaya, yaMayahudi ha nia moja wahimi kinyume na Ɓaulusu, wamuv̄ingi hari mwa lipa la mahakama 13ha urongoa: «Mutru unu asusariɓia watru waãɓudu Mungu ha namuna kinyume na iSharia.»

14Ɓas, wakati Ɓaulusu aandrisa uɓua ihanyo yahe, na Galiyo aambia yaMayahudi: «Na djeli ika trongo ya ukatili au shitrendrwa mbovu halisi, natsomuvulishiani wanyu Mayahudi, mauri ɗe namuna yalazimu. 15Ɓadi rangu ilio amba yao mahadisi yahusu urongozi, madzina, au iSharia yanyu, ɓasi izo zanyu. Tsisutsaha nanamua trongo mauri ɗe zizo.» 16Ɓas, awatoa hari mwa lipa la mahakama lile. 17Sa ile watru wale piya wamusiki Sustani, dhwamana wa iNyumba ya Uswali, wamuɓuɓua mbeli na inyumba ya mahakama, wala kayamutria shuhuli Galiyo.

Ɓaulusu asuregea ɗagoni Antiyokiya

18Ɓaulusu ɓaanda aɓaki Korintiyo hari mwa wakati mwengi tsena, alishi wananya wa shi uaminifu wale, apashia, atreke uendra Siriya v̄umoja na Priskila na Akila. Aka adziv̄alisa ishitswa ɗagoni Kenkereya, mana aka alishi nadhara. 19Uwaswili yawo Efeso, Ɓaulusu alishi wanyahe v̄ale, angia moni na iNyumba ya Uswali, amwesa ahadisi na yaMayahudi|Mayahudi. 20Wamumia aɓaki tsena hari mwa mwana muda na wao. Ɓadi kawakuɓalia. 21Awalaga ha urongoa: «[Inilazimu niv̄itse umusherehio ujao Yerusalemu.] Nitsomuregeani neka Mungu av̄endze.» Ɓas, atreke ulawa Efeso, 22ashuku Kaisariya, amwesa ahea Yerusalemu ile arongodze iDjama Ndziwaminifu; ulawa v̄ale ashuku Antiyokiya.

23Ɓaanda av̄itsa mwana muda Antiyokiya hule, Ɓaulusu afungu musafara av̄iriye yimikaɓala ya Galatwiya na Frugiya, ha utria ɓari piya maswihaɓa.

Hadisi yapatana na Priskila, Akila na Aɓulusu

24V̄uka Muyahudi wa shi Aleksandriya akohiriwa ha lidzina la Aɓulusu, aka awaswili Efeso. Aka muhodari wa urongozi, amwesa akana ujuzi muɓole hari mwa uMuangishio Mutwaharifu. 25Aka asomedzewa uhusuana na indzia ya Raɓi, tsena ha djitihadi ɓole akojudza na usomedza ha namuna yarahara trongo zamuhusu Insa, ɓadi akojua tu ɗe umuɓaĩsho wa Yahaya|Yahaya Muɓaĩshizi. 26Aandrisa urongoa ha uhodari moni na iNyumba ya Uswali. Ɓaanda Priskila na Akila wamukia, wamuv̄ingi v̄umoja na wao, amwesa wamueledza ha namuna yarahara zaidi indzia ya Mungu.

27Ɓaanda akotsaha andre Akaya, wananya wa shi uaminifu wale wamutria ɓari, amwesa waangishia wanyawo waaminifu wamurenge ha uzuri. Uwaswili yahe, ha ineema ya Mungu, aparihwana na manufa maɓole mbeli za wale waamini. 28Mana hari mwa yamahadisi yahe na yaMayahudi, akowashindra ha hadhwira na udhiɓitisha ha yiMiangishio Mitwaharifu amba Insa ɗe uMutsahuliwa.

Currently Selected:

MAV̄INGIZI-RISALA 18: swb

Highlight

Copy