3 YUHANI 1
1
1Wami, muɓole#1:1 muɓole: Yaãni, moja mengoni mwa madhwamana hari mwa Djama Ndziwaminifu. Namuangaliye 1Timutausu 3:1-7. wa iDjama Ndziwaminifu, nisuhuangishia wawe muv̄endzewa Djayusu nihuv̄endzao hari mwa ikweli.
2Wawe muv̄endzewa, nisutumainia uke fetre hari mwa piya yimikaɓala, tsena uke hari mwa swiha ndjema, mauri iroho yaho namuna ilio fetre. 3Kweli amba tsijiv̄iwa ha kusudi iv̄o wananya wa uaminifu waja, tsena walawia ushahidi ikweli ulionayo, na inamuna udziv̄ingao hari mwa ikweli. 4Tsisina furaha ɓole rahana ukia amba wana wangu hari mwa uaminifu wasuẽshi hari mwa ikweli.
Djayusu asutrilwa ɓari asaidi uwav̄ingizi wa iHaɓari
5Wawe muv̄endzewa, usudziv̄inga ha uaminifu hari mwa piya izo ufanyao ha uwananya wa shi uaminifu, ata ha wao walio wadjeni. 6Wao walawa ushahidi mbeli za iDjama Ndziwaminifu iuv̄endza yaho. Utsofanya fetre neka uwasaidi amba waendreleye na musafara wawo, ha namuna yastahiki Mungu. 7Mana ɗe ha siɓaɓu ya lidzina la Kristi ɗe wao walawa, ɓila upara itsokao yotsi ha wale kawamuji Mungu. 8Ɓasi v̄av̄o wasi rilazimu rirenge ha uzuri watru mauri ɗe wao, ile rike washangirizi na wao hari mwa uendresa mbeli ikweli.
Diyutrifusa na Dimitriyusu
9Tsiangishia wana trongo iDjama Ndziwaminifu ɓadi Diyutrifusa, av̄endzao ake shitswa, kasurikuɓali. 10Iyo ɗe imana ata amba neka nisuja, nitsoeledza zitrendrwa zahe azifanyao ha utsambadza marongozi maovu kinyume na wasi. Wala tsi ɓasi tu, ɓadi waye-waye kasurenga wananya wa uaminifu, na wao watsahao wawarenge, ne asuwaɓalidza, tsena asuwaĩdzia hari mwa iDjama Ndziwaminifu.
11Wawe muv̄endzewa, wasutiɓe imbovu, ɓadi indjema. Uwo afanyao indjema, waye wa shi Mungu. Uwo afanyao imbovu, waye kamuji Mungu. 12Husuana na Dimitriyusu, watru piya wasumulawia ushahidi mwema, na ikweli wiyo-wiyo ne isumulawia ushahidi. Wasi wajau risumulawia ushahidi, amwesa usujua amba ushahidi watru, uwo kweli.
Ha ulindrilia rionane raha
13Tsina nyengi za uhuangishia, ɓadi tsisutsaha naifanya ha nyongo na kalamu. 14Nisutumaini uja nihuone tsi hale, v̄av̄o ritsohadisi maswa ha maswa. 15Utrulivu nauhuendreleye. Wandzani wasuhusalimu. Salimu uwandzani, kula moja ha lidzina lahe.
Currently Selected:
3 YUHANI 1: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.