2 TIMUTAUSU 1
1
1Wami Ɓaulusu, Muv̄ingizi-Risala wa Kristi-Insa ha yamav̄endzeleo ya Mungu ya ujudza wahadi wa uhayati ulio ha Kristi-Insa, 2ha Timutausu mwana wa shi uaminifu muv̄endzewa wangu: Neema, urehema na amani zilawao ha Mungu amma Ɓaɓa na Kristi-Insa, Raɓi watru, nazihuendreleye.
Himida na mutrilio-ɓari
3Nisumuhimidia Mungu nimurumishiao ha roho ndziraharifu ɓila tuhuma, mauri ɗe wadzaɗe wangu, namohunahana hari mwa mamilio yangu kula sa, uku na mutsana. 4Nisunahana matsozi yaho, tsena tsina ushauku ya uja nihuone, ile pare nijaye furaha. 5Nisunahana wajau uaminifu wa kweli ulionawo, ulio amba uka kaɓula ha kokwaho Loyisi na ha mayaho Eunisia, na wami tsina yakini amba uwo wa hahoju wajau. 6Iyo ɗe imana ata nihunahanidzao uvudziye lijenge la ineema ya Mungu ilio moni haho ha uhukadzia yangu yimihono. 7Mana Mungu kariv̄a roho ɓaridi, ɓadi yendza ushindzi, uv̄endza na udzizia.
8Ɓasi usuone haya umulawia ushahidi Raɓi watru, wala wami nilio mufungwa ha siɓaɓu ya waye, ɓadi ondesheha v̄umoja na wami ha tanafu ya iIndjili, ha ushindzi wa Mungu. 9Arihuyi, tsena arihiri rike watwaharifu, tsi ha ulawana na zitrendro zatru, ɓadi ha siɓaɓu ya inia yahe monyewe, na irehema aridjaãliayo ha uv̄umoja na Kristi-Insa kaɓula ya umwandro wa yimida. 10iRehema iyo iv̄enulwa av̄asa ha umujilio wa Muhuyifu watru Kristi-Insa, alio amba ashindri uufa, tsena atria heuni uhayati kauna ufa, ha iIndjili. 11Ɗe ha iIndjili iyo ɗe nalishwa mujudzizi, Muv̄ingizi-Risala amma musomedza. 12Na iyo ɗe imana ata niparwao na maondo yanu, ɓadi tsisuyaonea haya, mana nisujua uwo namuamini, tsena tsina yakini amba ana ushindzi wa usika iyo nadhwaminishiwayo#1:12 nadhwaminishiwayo: Mutru atsojua aelewe iShigiriki tsena v̄anu amba isurongoa: anidhwaminishayo, au raha: namudhwaminishayo. ata mupaka Suku iyo.
13Ɗunga umufano wa marongozi mema wayakia na wami, ha uaminifu na uv̄endza, ulio hari mwa uv̄umoja na Kristi-Insa. 14Sika ha iRoho Ndzitwaharifu iẽshio hatru iãkiɓa ndjema wadhwaminishiwayo.
15Usujua amba piya walio Aziya waniɓauha, na mengoni mwao ɗe Figuli na Hermujanu.
16Raɓi naenedze urehema wahe hari mwa umuraɓa wa Onesiforu, mana anitria ɓari mara nyengi, wala kaona haya na silisili zangu. 17Ɓadi ha kinyume, uja yahe Romu, anizunguha ha djitihadi ata anipara. 18Raɓi namudjaãliye upara urehema ha Mola iSuku iyo. Wawe-wawe usujua ha uzuri kiasi anirumishia Efeso.
Currently Selected:
2 TIMUTAUSU 1: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
