2 MAKORINTIYO 8
8
Ɓaulusu asutria ɓari watru wav̄e musada
1Wananyangu, risumujudzani ineema ya Mungu yadjaãliwa ziDjama Ndziwaminifu za Makadoniya. 2Ata ha iv̄o wakov̄irisiwa hari mwa taãɓu za kusudi, na wao wakozidi furaha hari mwa usikini muɓole wawo ata yakowav̄inga watowe musada ha utadjirifu, 3ha inamuna wakoshindra, tsiishuhudia, ata uzidi izo wakoshindra, tsena ha uv̄endza yawo wenyewe. 4Warirayi ha kusudi amba warenge fuvu hari mwa ineema ya urumishi wa utolea musada uwatwaharifu#8:4 uwatwaharifu: Yaãni, ɗe zimasikini ndziaminifu wa Yerusalemu.. 5Wafanya zaidi rahana izo rakofikiria. Wadziv̄a raɓuzi wao wenyewe ha Raɓi, iv̄o ha wasi, ha uɗunga yamav̄endzeleo ya Mungu. 6Iyo ɗe imana ramutria ɓari Titusa amba rangu aandrisa, amalidze ineema iyo hanyuju. 7Mauri ɗe inamuna mwazidishiha hari mwa piya zitrongo: uaminifu, urongozi, ujuzi, djitihadi ya kula namuna, na yamahaɓa mwayapara ha ndzia yatru, namuzidishihe wajau hari mwa ineema ya urumishi wa utoa musada.
8Wala tsisurongoa iyo amba ãmuri, ɓadi ha uvumbua idjitihadi ya wasalia, nisumuv̄ani ifurswa ya udhiɓitisha ukweli wa uv̄endza yanyu. 9Mana musujua ineema ya Raɓi watru Insa-Kristi|Insa: waye alio amba akana utadjirifu, adzisikinisha ha tanafu yanyu, pare ha usikini wahe, wanyu mutadjirishihe.
10Na iyo fikira ɗe nitoao hari mwa trongo iyo: iyo ndjema hanyuju, iv̄o mwaka wa handra, tsi tu amba wa urendra, ɓadi tsena wa uitsaha rangu mwaha jana. 11Ɓasi av̄asa namumalidze uifanya, pare ishitrendro ilingane na ushauku wanyu, ha ulawana na izo mulionazo. 12Mana ushauku muɓole wamoka, uwo ukuɓalishiha ulingana na iyo mutru alionayo, ɓadi tsi na iyo mutru kasina.
13Mana ikusudi tsi ya umutriani hari mwa usongefu amba pare wasalia wav̄unguhe taãɓu, ɓadi ɗe ha uɗunga usawa. 14Wakati mauri ɗe unu rilionawo, iyo yamuzidishani itsowasaidi na izo wakosewa nazo, ile wakati watsozidishiwao, yawazidisha itsomusaidini na izo mwakosewa. V̄av̄o v̄utsoka usawa. 15Mauri ɗe inamuna yaangihwa: «Uwo aka angulidza nyengi kaka azidishiwa, na ule aka angulidza shashi, kakokosewa#8:15 Uwo aka angulidza... kakokosewa: Namuangaliye Mulawiyo 16:18..»
Titusa asuv̄elehwa Korintiyo ha siɓaɓu ya mutsango
16Mungu nahimidiwe, Monyewe utria rohoni ha Titusa djitihadi moja na iyo rilionayo na wanyu. 17Mana tsi tu amba akuɓali mutrilio-ɓari watru, ɓadi asuja hanyu v̄umoja na djitihadi ɓole, tsena ha uv̄endza yahe monyewe. 18Risuv̄eleha v̄umoja na waye umwananya wa shi uaminifu alio amba isifa yahe ha izo afanya ha tanafu ya iIndjili ienea hari mwa piya ziDjama Ndziwaminifu. 19Wala tsi tu, ɓadi atsahulwa na ziDjama Ndziwaminifu aɗungane na wasi hari mwa ishitrendro ya rehema ini radhwaminishiwayo, ha utukufu wa Raɓi waye-waye na uv̄enua inia ndjema yatru. 20Karisutsaha rasingidziwa na mbovu yahusu umutsango muɓole unu wadhwaminishiwa urumishini hatru. 21Mana djitihadi yatru ɗe ufanya ndjema, tsi tu amba mbeli za Raɓi, ɓadi tsena mbeli za wanadamu.
22Risuv̄eleha v̄umoja na wao mwananyatru wa shi uaminifu alio amba aridhiɓitisha ha mara nyengi na trongo nyengi idjitihadi yahe. Na v̄anu tsena asuzidi uiv̄enua ha uaminifu muɓole alionawo na wanyu. 23Hari mwa yamuhusu Titusa, waye munyangu tsena mushangirizi wangu hari mwanyu. Na ha wananya wa shi uaminifu wasalia, wao ɗe mawakala wa ziDjama Ndziwaminifu, ha utukufu wa Kristi. 24Ha izo, mbeli za ziDjama Ndziwaminifu, namuv̄e udhiɓitifu wa uv̄endza yanyu, tsena amba rikana haki ya udziɓua mbeli zawo ha siɓaɓu ya wanyu.
Currently Selected:
2 MAKORINTIYO 8: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
