1 MATESALONIKA 3
3
1Ɓasi ɓaanda karakoshindra rastahamili tsena, riono ndjema uɓaki ɗagoni Atheni weke wasi, 2amwesa rimuv̄elehe mwananyatru Timutausu, mushangirizi wa Mungu ha ihaɓari ndjema ya Kristi, ile amuhodarisheni na umutriani ɓari ha tanafu ya uaminifu wanyu, 3v̄wasuke ata mutru ataharakishiwa ha siɓaɓu ya yamatreso yao muyaẽshio. Mana musujua wanyu-wanyu amba irilazimu riv̄ire v̄av̄o. 4Wakati raka v̄umoja na wanyu, rakomuambiani na kaɓula amba ritsoparwa na matreso. Iyo ɗe yahidjiri, na wanyu musuijua. 5Iyo ɗe yatsonga amba ɓaanda tsakoshindra nastahamili tsena, tsimuv̄eleha Timutausu aje arenge haɓari ya uaminifu wanyu, ha trisidzo amba uMuzainifu aja amuzainini ata yaka amba hazi yatru kaina mana.
Haɓari ndjema zav̄ingwa na Timutausu
6Na av̄asa Timutausu aja arijilia ulawa hanyu. Ariv̄ingia haɓari ndjema za uaminifu wanyu, za uv̄endza yanyu, tsena amba ha daima wanyu urinahana ha uwema; arijudza amba muna ushauku muɓole murione, mauri ɗe namuna wasi riliona ushauku rimuoneni. 7Ha izo, wananyatru, hari-hari na piya mashaka na taãɓu zatru, ripara mutrilio-ɓari wamuhusuni, ha siɓaɓu ya uaminifu wanyu. 8Na av̄asa risuẽshi, iv̄o mwasika hodari hari mwa uv̄umoja wanyu na Raɓi. 9Ha kiasi jeje rishindrao rimuhimidiye Mungu husuana na wanyu, ha piya ifuraha rilionayo ha siɓaɓu ya wanyu mbeli za Mungu watru? 10Uku na mutsana risufanya mamilio v̄umoja na djitihadi pare rije rimuoneni, ile ritsimidze izo zakosa hari mwa uaminifu wanyu.
11Ɓasi v̄av̄o Mungu watru amma Ɓaɓa waye-waye, v̄umoja na Raɓi watru Insa, nawarengeledze ndzia yatru ata riwaswili hanyu. 12Raɓi naengedze na uzidisha uv̄endza mulionawo wanyu na wanyu, tsena na piya wasalia, mufano wa uwo rilionawo na wanyu. 13Nahodarishe roho zanyu ile zike ɓila tuhuma hari mwa utwaharifu mbeli za Mungu watru amma Ɓaɓa, wakati wa umujilio wa Raɓi watru Insa v̄umoja na piya watwaharifu wahe.
Currently Selected:
1 MATESALONIKA 3: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
