1 MONYE 5
5
Maosio ha uwaɓole wa iDjama Ndziwaminifu na yamashaɓaɓi
1Nisutria ɓari uwaɓole wa iDjama walio hari mwanyu, wami nilio muɓole mauri wao, shahidi wa yamatungu ya Kristi, tsena nitsorengao fuvu hari mwa utukufu ujov̄enulwao: 2namurundrise liɓangwe la Mungu mwadhwaminishiwalo, tsi ha mulazimisho, ɓadi ha uv̄endza yanyu, namuna Mungu atsahao, ɓila tsi ha mupario wendza aĩɓu, ɓadi v̄umoja na djitihadi. 3Tsi ha utawalia ha udziro wao mwadhwaminishiwa, ɓadi ha uka mifano mbeli za liɓangwe. 4Na wakati uMutsunga Muɓole atsov̄enuao, mutsopara ihishima yendza utukufu kaimenyeha.
5Wanyu wajau mashaɓaɓi, namudzituĩse ha uwaɓole. Piyanyu hari mwa maendreleo yanyu wanyu na wanyu, namudziɓangise uwekevu, mana v̄uangihwa:
«Mungu waye kinyume na wao wadzionao,
ɓadi waye udjaãlia urehema wahe ha waekevu.»#5:5 Namuangaliye Wasiya 3:34.
6Ɓasi namudzilishe waekevu utsini na ushindzi#5:6 ushindzi: iShigiriki isurongoa: umuhono wendza ushindzi. wa Mungu, ile amuhedzeni wakati auhetsi. 7Namutsuwe piya taãɓu zanyu, mumulishiyezo, mana waye na utungu na wanyu.
8Namukane zifikira zanyu, tsena muke hashiri. iÃduwi yanyu Iɓilisa asuzingidza mauri simba ingurumao, izunguhao mutru amuɗye. 9Namumukanyushe ha udzihodarisha na uaminifu wanyu, mujuwe amba wananyanyu wa shi uaminifu duniani v̄anu uv̄irisiwa hari mwa matreso yao-yao.
10Na ɓaanda itsokao amba muondesheha mwana wakati, Mungu wa kula rehema alio amba amuhirini ha uv̄umoja wanyu na Kristi murenge fuvu hari mwa utukufu wa daima wahe, atsomukamilishani waye-waye, amuhodarisheni, amuv̄eni nguvu tsena musike ha kusudi. 11Haheju ushindzi nauke ha daima na daima. Amina.
Masalamu ya mwiso
12Ɗe ha umusada wa Silvanus#5:12 Silvanus: Dzina langina lahe Silasi. nimurengao amba mwananya muaminifu, ɗe nimuangishiaoni wana mistari wanu, ile nimutriyeni ɓari na ulawa ushahidi amba iyo ɗe irehema ya kweli ya Mungu ɗe mwadzifungamanisa nayo.
13iDjama ya wao watsahulwa mauri ɗe wanyu ya shi Ɓaɓiluna#5:13 Ɓaɓiluna: V̄anu ɗe iDjama Ndziwaminifu ya Romu ɗe irongolwao. isumusalimuni, v̄umoja na mwana wangu Markusi. 14Namusalimiane wanyu na wanyu ha maɓuso ya shi mahaɓa.
Amani ju lanyu piyanyu mulio hari mwa uv̄umoja na Kristi.
Currently Selected:
1 MONYE 5: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
