1 MAKORINTIYO 9

Haki za Muv̄ingizi-Risala

1Hali tsisi hari mwa unafasi? Hali wami tsi Muv̄ingizi-Risala? Hali tsamuona Insa, Raɓi watru? Hali wanyu tsi mavuna ya urumishi wangu ha Raɓi? 2Neka ha wangina wami tsi Muv̄ingizi-Risala, ɓadi ha wanyu anga, wami tsa. Mana wanyu ɗe mulio sawa na umuhuri udhiɓitishao Uv̄ingizi-Risala wangu ha Raɓi.

3Hifadhwi yangu ɗe ini mbeli za wao waninamuao: 4Hali karisina ruhusa ya uɗya na unwa? 5Hali ɓasi karisina ruhusa ya uv̄inga v̄umoja na wasi mwananya mutrumama muaminifu amma mutrumushe, mauri ɗe namuna wafanyao Mav̄ingizi-Risala yasalia, na wananyahe wa Raɓi, na Sefasi#9:5 Sefasi: Yaãni, ɗe Monye.? 6Au wami tu na Ɓarnaɓasi, ɗe rilio amba karisina ruhusa rasufanye hazi#9:6 hazi: Yaãni, wami tu na Ɓarnaɓasi ɗe ralazimu rifanye hazi ha yimihono yatru pare riẽshi??

7Mbani aparofanya hazi ya djeshi adziliv̄ao monyewe mushahara wahe? Mbani ataɓuo mizaɓiɓu wala kaɗyi yamavuna? Au mbani atsungao ɓangwe wala kano dzia la liɓangwe? 8Hali trongo zini nisuzirongoa shiuɓinadamu tu? Hali iSharia kaisuzirongoa wajau? 9Kweli amba v̄uangihwa moni na iSharia ya Musa: «Usufunge ihanyo ya nyombe ikitsao mele.»#9:9 Namuangaliye Munahanisidziyo wa iSharia 25:4. Ɓasi v̄av̄o Mungu udzishapisa na nyombe ɓas? 10Tsi ha siɓaɓu ya wasi ɗe arongoa namuna ile? Ewa, ha siɓaɓu ya wasi ɗe zile zaangihwa, mana monyewe uv̄andra, alazimu av̄andre v̄umoja na tama, na monyewe ukitsa mele, alazimu akitse v̄umoja na tama ya upara lahe fungu. 11Neka ritaɓu hanyu ndjema za shiroho, ɓasi hali iyo trongo ɓole wasi uvuna hanyu zitru za urilela? 12Neka wasalia wana ruhusa ya upara fungu hanyu, ɓasi wasi karisinayo zaidi rahana wao?

Ɓadi kararumia ruhusa iyo. Ɗe ikinyume, risustahamili piya ile rasutriye kale iIndjili ya Kristi. 13Hali kamusujua amba wao wafanyao ihazi ya iNyumba Ndzitwaharifu, wao ulisiwa na iNyumba Ndzitwaharifu? Na wao warumishiao italatala ya masadaka, amba wana fungu hari mwa zitolewao talatalaju v̄ale? 14Ɗe ha inamuna iyo wajau, Raɓi ahetsi amba wao wajudzao iIndjili, waẽshi ha iIndjili.

15Ɓadi wami tsarumia ata moja hari mwa ruhusa zile, wala tsaangiha trongo zini amba pare nizidayi. Mana nisuona amba ɓorwa nife rahana wami utolewa isiɓaɓu ya sifa mauri ɗe ini. 16Kweli amba ujudza iIndjili, kaisi hanguju siɓaɓu ya sifa, mana ija farudhwi wami uifanya. Maondo trini hanguju neka tsisujudza iIndjili! 17Na djeli nakoifanya ha matamani yangu, natsotumainia shiliv̄o, ɓadi neka nisuifanya tsi ha matamani, v̄av̄o nisutsimidza urumishi nadhwaminishiwawo. 18Ɓasi shiliv̄o yangu ɗe iv̄i? Ɗe wami utamania ɓure-ɓure iIndjili niijudzao, wala tsi ha urumia ukamilifu wa zihaki nastahikiwa hari mwa iIndjili iyo.

19Wala ukana amba tsina unafasi mbeli za piya, tsidzifanya murumwa wa piya, ile nivune ha uwengi zaidi. 20Ha yaMayahudi|Mayahudi tsika mauri Muyahudi, ile nipare yaMayahudi; ha wao watawaliwa na iSharia tsika mauri mutru atawaliwa na iSharia, wakati ulio amba wami ha wami tsatawaliwa na iSharia, ile nipare wao watawaliwa na iSharia. 21Ha wao walio ɓila iSharia tsika mauri mutru kasina iSharia, wakati ulio amba wami ha wami kaisi amba tsisina iSharia ya Mungu, ɓadi tsitawaliwa na iSharia ya Kristi. Trongo ini tsiifanya, ile nipare wao walio ɓila iSharia. 22Ha tsi wahodari tsifanyishiha tsi muhodari, ile nipare wao tsi wahodari. Tsidzifanya kula namuna ha piya, ile ha kula namuna nihuyi ɓaãdhwi. 23Nisufanya piya zini ha siɓaɓu ya iIndjili, ile nipare fungu hari mwayo.

24Kamusujua amba waremezi-mbio moni na shandza urema mbio piyawo, ɓadi moja tu ɗe aparao ihishima? Ɓasi namureme mbio ha namuna ya uipara. 25Piya walio hari mwa mashindrano udziɓalidza na nyengi. Na wao ufanya trongo iyo, ile wapare hishima ilio amba muola. Ɓadi wasi yatru tsi muola, ya daima. 26Ha izo, wami nisurema mbio, ɓadi tsi mbio za ɓanaraju; nisuvutsa tsoma, ɓadi tsisuzivutsa hawani. 27Ha kinyume nisuruma mangavu umwili wangu, nisuufanya amba murumwa, ile ɓaanda naĩdhia wasalia, isuke amba tsiharaliwa.

Currently Selected:

1 MAKORINTIYO 9: swb

Highlight

Copy